جوبانىڭ ىسكە اسىرىلۋ بارىسى تۋرالى قالانىڭ تۇرعىن ءۇي جانە تۇرعىن ءۇي ينسپەكتسياسى باسقارماسىنىڭ بۇزۋ ءبولىمىنىڭ باسشىسى تولەگەن احمەتوۆ ونلاين-بريفينگتە ايتىپ بەردى.
ء«بىرىنشى كەزەڭ 2013-2017 جىلدار ارالىعىندا ءوتتى, ونىڭ بارىسىندا 228 اپاتتى ءۇي بۇزىلىپ, 3400-دەن استام وتباسى جاڭا اباتتاندىرىلعان تۇرعىن ءۇي الدى. 2018 جىلدان 2022 جىلعا دەيىنگى كەزەڭگە ەسەپتەلگەن ەكىنشى كەزەڭدى ىسكە اسىرۋ شەڭبەرىندە 56 اپاتتى ءۇيدىڭ تۇرعىندارىن 1082 پاتەرگە كوشىرۋ جوسپارلانعان», دەدى سپيكەر.
ماسەلەن, 2018 جىلى 86 پاتەر, 2019 جىلى – 197 پاتەر, 2020 جىلى – 209 پاتەر, 2021 جىلى – 257 پاتەر تۇرعىندارىن كوشىرۋ جۇزەگە اسىرىلدى.
اپاتتى ۇيلەردىڭ تۇرعىندارى ابىلايحان داڭعىلى مەن قاراساي باتىر كوشەسى بويىنداعى از قاباتتى تۇرعىن ءۇي كەشەنىنە كوشىرىلدى. قازىرگى ۋاقىتتا ولاردى فيزيكالىق بۇزۋ جۇمىستارى جۇرگىزىلىپ جاتىر. 2018-2021 جىلدارى بارلىعى 749 پاتەرلىك 38 ءۇيدىڭ تۇرعىندارى قونىس اۋداردى.
2022 جىلعا 333 پاتەرلىك 18 اپاتتى ءۇيدى كوشىرۋ جوسپارلانعان.
«قالا اۋداندارى اكىمدەرىنىڭ اپپاراتتارىمەن بىرلەسىپ بۇزۋ جوسپارى – ءۇشىنشى كەزەڭ – 2023-2027 جىلدارعا ارنالعان. 903 پاتەرگە 59 ءۇي قوسىلدى», دەدى تولەگەن احمەتوۆ.
ەستەرىڭىزگە سالا كەتەيىك, مەملەكەت باسشىسىنىڭ تاپسىرماسى بويىنشا تۇرعىن ءۇي جاعدايلارىن جاقسارتۋ ءۇشىن تۇرعىن ءۇي كەشەندەرىن جوندەۋ, ليفتتەردى اۋىستىرۋ, جەڭىلدەتىلگەن الەۋمەتتىك تۇرعىن ءۇي سالۋ, ۇزاققا سوزىلعان قۇرىلىستاردى اياقتاۋ بويىنشا جۇمىستار جۇرگىزىلىپ جاتىر.
