استاناداعى «وتان انا» مونۋمەنتىنىڭ جانىنداعى «وتان قورعاۋشىلار» الاڭىندا اسكەر قاتارىنا شاقىرىلۋشىلاردى قازاقستان قارۋلى كۇشتەرىنىڭ قاتارىنا سالتاناتتى شىعارىپ سالۋ ءراسىمى جانە «استانا جاستارى مەن ارميا – ءبىرتۇتاس» اكتسياسىنىڭ اشىلۋ سالتاناتى ءوتتى.
استانا قالاسىنىڭ قورعانىس ىستەرى جونىندەگى دەپارتامەنتى «نۇر وتان» پارتياسى استانا قالالىق فيليالىنىڭ, «جاس وتان» جاستار قاناتىنىڭ قولداۋىمەن ۇيىمداستىرعان ءىس-شارا اسكەري قىزمەتتىڭ بەدەلىن ارتتىرۋعا, جاسوسپىرىمدەردى قازاقستان ارمياسىنىڭ قاتارىنداعى قىزمەتكە دايىنداۋعا باعىتتالىپ وتىر.
جاستار الدىندا قارۋلى كۇشتەردىڭ ارداگەرلەرى, «نۇر وتان» پارتياسىنىڭ وكىلدەرى ءسوز سويلەدى.
ءىس-شارا بارىسىندا دوڭگەلەكتى اسكەري تەحنيكا مەن اتىس قارۋلارى, ساربازداردىڭ كيىم-كەشەك ۇلگىلەرى, سونداي-اق, اسكەر تەكتەرى مەن تۇرلەرى كورسەتىلگەن كورمە ءوتتى. ەلوردا تۇرعىندارى مەن مەيماندارى اتىس قارۋلارىمەن جانە ۇسىنىلعان اسكەري تەحنيكامەن تانىسا الدى.
بۇل اكتسياعا 3000-عا جۋىق اسكەر قاتارىنا شاقىرۋ جاسىنا دەيىنگى جانە اسكەر قاتارىنا شاقىرۋ جاسىنداعى جاستار قاتىستى.
كوكتەمگى اسكەري قىزمەتكە شاقىرۋ اياسىندا استانا قالاسىنان 500-گە جۋىق اسكەر قاتارىنا شاقىرىلۋشى مەرزىمدى اسكەري قىزمەتكە جىبەرىلەدى. جاس بۋىن اەروۇتقىر اسكەرلەرى مەن ارنايى اسكەرلەر بولىمدەرىنىڭ ساپىن تولىقتىراتىن بولادى. بيىلعى كوكتەمدە قازاقستان رەسپۋبليكاسىنىڭ قارۋلى كۇشتەرىنە, باسقا دا اسكەرلەرى مەن اسكەري قۇرالىمدارىنا 11 مىڭنان استام ادام شاقىرىلاتىن بولادى.
سالتاناتتى ءىس-شارا قر قك اەروۇتقىر اسكەرلەرى دەسانتتىق-شابۋىلداۋ بريگاداسىنىڭ «قالقان» ارنايى ماقساتتاعى ۆزۆودىنىڭ جانە مەملەكەتتىك كۇزەت قىزمەتى قۇرمەت قاراۋىلى روتاسىنىڭ ونەر كورسەتۋىنە ۇلاستى.
«ەگەمەن-اقپارات».
