«قازىرگى جاعدايدا ۇكىمەت وتاندىق ءوندىرىستى قولداۋعا باعىتتالعان ساياساتتى جالعاستىرۋعا نيەتتى. بۇل – قولجەتىمدى شيكىزاتپەن جانە قارجىلاندىرۋمەن قامتاماسىز ەتۋ, ىشكى قۇندىلىقتى دامىتۋ, يمپورتقا تاۋەلدىلىكتى ازايتۋ, جۇمىس ىستەپ تۇرعان وندىرىستەردى جاڭعىرتۋ جانە جاڭا وندىرىستەردى قۇرۋ», دەدى ماشينا جاساۋشىلار فورۋمىنا قاتىسقان پرەمەر-مينيستر ءاليحان سمايىلوۆ.
قازاقستاندىق ماشينا جاساۋ سالاسىنىڭ باسىمدىقتارىنىڭ ءبىرى – تەمىرجول ماشينا جاساۋ سالاسى. وعان انىق دالەل – شەتەلدىك تىكەلەي ينۆەستيتسيانىڭ تارتىلۋى.
ء«بىزدىڭ زاۋىت General Electric Transportation تەحنولوگياسى بويىنشا لوكوموتيۆ قۇراستىرۋمەن اينالىساتىن ورتالىق ازياداعى جالعىز زاۋىت. قازىرگە دەيىن ءبىزدىڭ زاۋىت 450-دەن استام لوكوموتيۆ قۇراستىرىپ شىعاردى. التى ەلگە ەكسپورتتاي الدىق, ولار – قىرعىزستان, تاجىكستان, ازەربايجان, تۇرىكمەنستان, ۋكراينا جانە مولدوۆا. زاۋىت جاس ەكەنىنە قاراماستان ەكسپورتتىق الەۋەتىمىز جوعارى. ءوندىرىستى دامىتىپ جاتىرمىز. بيىل 43 لوكوموتيۆ قۇراستىرۋ جوسپارى تۇر. سونىڭ 14 بىرلىگى عانا قالدى. ءبىز ونى جىل سوڭىنا دەيىن جاساپ بىتىرەمىز. زاۋىت قۇرىلعالى بەرى «قازاقستان تەمىر جولى» نەمەسە باسقا دا ساتىپ الۋشىلار الدىندا ۇياتقا قالعان ەمەس», دەيدى «لوكوموتيۆ قۇراستىرۋ زاۋىتى» اق پرەزيدەنتى مارات تىلەۋباەۆ.
زاۋىت كەلەسى جىلى 90 لوكوموتيۆ شىعارۋدى جوسپارلاپ وتىر. اكتسيونەرلەر بيىل زاۋىتقا 2,5 ملرد دوللار كولەمىندە ينۆەستيتسيا قۇيعان. سول سەبەپتى ءوندىرىس ەكى ەسەگە ارتپاق.
«وتاندىق ماشينا وندىرۋشىلەرگە جايلى جاعداي جاساۋ ءۇشىن مەن مىناداي شارالاردى ۇسىنامىن. ونىڭ ءبىرىنشىسى – قازاقستاندىق وندىرۋشىدەن لوكوموتيۆ ساتىپ الۋ ءۇشىن جەكە تاسىمالداۋشىلارعا جەڭىلدەتىلگەن نەسيەلەۋ ۇسىنۋ, نەسيە مولشەرلەمەسى بويىنشا سىيلىقاقى ستاۆكاسىن سۋبسيديالاۋ. ەكىنشىدەن, ءبىزدىڭ ەلدە كەز كەلگەن لوكوموتيۆ ترانسپورتتىق باقىلاۋ كوميتەتىندە تىركەلەدى. سول تىركەۋگە دەيىن لوكوموتيۆتىڭ قانشالىقتى سەنىمدى ەكەنىن, قاۋىپسىز ەكەندىگىن انىقتاپ, قاراپ, باعالايتىن قابىلداۋ كوميسسياسىن قۇرۋ كەرەك. ەگەر راسىمەن شەتەلدەن يمپورتتالعان لوكوموتيۆ ءبىزدىڭ لوكوموتيۆتەردەن مىقتى بولسا, وندا ءسوز جوق, ساتىپ الا بەرسىن. ەگەر ولاي بولماي شىقسا, وندا بۇكىل جىلجىمالى قۇرامدى تىركەپ جىبەرمەۋدىڭ الدىن الار ەدىك», دەپ ءوز ۇسىنىسىن دا ءبىلدىردى زاۋىت باسشىسى.
«روستسەلماش» ديرەكتورلار كەڭەسىنىڭ توراعاسى كونستانتين بابكين «قازروستينجينيرينگ» كومپانياسىمەن جانە قازاقستاندىق اگرويننوۆاتسيالىق كورپوراتسيامەن بىرلەسىپ 5 كومباين مودەلىن, 4 تراكتور مودەلىن لوكاليزاتسيالاعانىن اتاپ ءوتتى.
«كەلەر جىلى تاعى ءبىر تراكتور مودەلىن ازىرلەۋدى جوسپارلاپ وتىرمىز. ءبىزدىڭ كومپانيامىز بەلسەندى دامۋدا. ءبىز ءۇشىن قازاقستان باسىم نارىق سانالادى جانە ماشينالارىمىزدى قازاقستاندىق سەرىكتەستەرىمىزگە ۇسىناتىن بولامىز», دەيدى ك.بابكين.
قازاقستان ماشينا جاساۋشىلار وداعىنىڭ توراعاسى مەيرام پىشەمباەۆتىڭ ايتۋىنشا, تاپ قازىرگى كەزەڭدەگى باستى مىندەت – يمپورت كولەمىن تومەندەتۋ.
«جالپى العاندا, ماشينا جاساۋ سالاسى – كەز كەلگەن ەل ەكونوميكاسىنداعى يندۋستريالىق قۋاتتىڭ باستى كوزىرى. بۇل سالاعا الەمدىك ونەركاسىپتىك ءوندىرىستىڭ 40 پايىزى تيەسىلى. قازاقستان ونەركاسىبىندەگى ماشينا جاساۋ ۇلەسى 7 پايىزدان اسپايدى. 2021 جىلى تاۋار يمپورتتاۋدىڭ جالپى كولەمى 41 ملرد دوللاردى قۇرادى. سونىڭ 17 ملرد دوللارى, ياعني 41 پايىزى – ماشينا جاساۋ ونىمدەرى. سوڭعى 10 جىلدا ءوندىرىس كولەمىن 370 ملرد تەڭگەدەن 2 جارىم ترلن-عا دەيىن جەتكىزە الدىق. ەندىگى ماقسات – يمپورتتان بارىنشا الىستاۋ», دەدى وداق باسشىسى.
بۇل سالادا 3 مىڭداي كاسىپورىن بار جانە ولاردا 115 مىڭنان استام ادام جۇمىس ىستەيدى. سالاداعى ەڭ ءىرى سەكتور – اۆتوموبيل قۇراستىرۋ (33,1 پايىز). جۋىق ارادا ەلىمىزدە جينالاتىن مودەلدەر سانى ارتا تۇسپەك. سونىمەن قاتار اۆتوكومپونەنتتەر (بامپەر, ورىندىق, تەرەزە, پلاستيك بولشەكتەر, دوڭگەلەك) ءوندىرىسىنىڭ دە اياسى كەڭەيەدى دەگەن جوسپار بار.
