قازاقستان حالقى ساياسي وزگەرىستەردىڭ ماڭىزىن ءتۇسىنىپ, پرەزيدەنتتىڭ باستامالارىن قولدايدى. سونىڭ بىردەن-ءبىر دالەلى – 2022 جىلعى ماۋسىمدا وتكەن جالپىحالىقتىق رەفەرەندۋمعا ەل ازاماتتارىنىڭ كوپشىلىگىنىڭ قاتىسۋى. مەملەكەت باسشىسى كەزەكتەن تىس پرەزيدەنت سايلاۋىن بيىل وتكىزۋ جونىندە شەشىم قابىلدادى. الداعى سايلاۋدى قازاقستان تاريحىنداعى جاڭا ساپالى كەزەڭنىڭ باستاۋى رەتىندە قابىلدايمىن. بۇل – ادىلەتتى قوعام قۇرۋ جولىنداعى ماڭىزدى قادام.
جۋىردا مەملەكەت باسشىسى قاسىم-جومارت توقاەۆتىڭ پاۆلودار وڭىرىنە جاساعان ساپارىنان, ونىڭ جەرگىلىكتى جۇرتشىلىقپەن جۇزدەسۋىنەن ۇققانىم – پرەزيدەنت وڭىردەگى جاعدايدىڭ بارىنەن حاباردار ەكەن. مەملەكەت باسشىسىنىڭ وبلىس تۇگىلى, ءاربىر اۋدان مەن قالاداعى جاعدايدى نازاردا ۇستايتىنى قۋانتتى.
ەكىباستۇز جىلىتۋ ماۋسىمىن جىل سايىن قيىندىقپەن وتكىزەدى. شاھاردى جىلىتىپ وتىرعان جالعىز جىلۋ-ەلەكتر ورتالىعىنىڭ جاعدايى تىم ناشار. جەرگىلىكتى بيلىك قولدان كەلگەنىن جاساپ جاتىر. قاسىم-جومارت توقاەۆ ءوڭىر حالقىمەن بولعان كەزدەسۋدە جىلۋ-ەلەكتر ورتالىعىنىڭ ماسەلەسىن ايتقاندا, ەل تىلەگىنىڭ پرەزيدەنتكە جەتكەنىن ۇقتىق. دەمەك ەندىگى جەردە ەكىباستۇزدىقتاردى جىلدار بويى الاڭداتىپ كەلگەن ماسەلەنىڭ وڭ شەشىم تابارىنا سەنەمىز. قىستىڭ كوزى قىراۋدا. الدا نە بولارىن بىلمەيمىز, بويدا قورقىنىش بار. پرەزيدەنتتىڭ بۇگىنگى ءسوزى ۇرەي قۇشاعىندا وتىرعان ەكىباستۇزدىقتارعا زور ءۇمىت سىيلادى.
جالپى, پرەزيدەنت پاۆلودار وڭىرىندەگى ءتۇيىندى ماسەلەلەردى دە, ايماقتىڭ دامۋىن قامتاماسىز ەتەتىن باسىم باعىتتاردى دا اتاپ, ايقىنداپ بەردى. سونىڭ ىشىندە جاستارعا مۇمكىندىك بەرىلەتىنىن باسا ايتتى. جاستارعا سەنىم ارتا وتىرىپ, جاۋاپكەرشىلىكتى سەزىندىرۋ ماڭىزدى. پرەزيدەنتتىڭ قاي سالادا بولماسىن جاستارعا جاعداي جاساپ, مۇمكىندىك بەرۋ كەرەك دەگەن پىكىرىن تولىق قولدايمىن.
جاس ۇرپاق اعا بۋىننىڭ ءومىر جولىنان تاعىلىم الا ءبىلۋى كەرەك. شەتەلدە جۇرگەن جاستارىمىزدىڭ كەز كەلگەن ساتتە ەلگە ورالۋىنا مۇمكىندىك بار. ءتىپتى شەتەلدە جۇرسە دە سول جاقتان ەل مۇددەسىنە قىزمەت جاساي الادى. پرەزيدەنت اتاپ وتكەندەي, باستىسى ءبىز ولارعا مەملەكەتشىلدىك رۋحىن ءسىڭىرىپ, ەل يگىلىگىنە قىزمەت ەتۋگە جۇمىلدىرا ءبىلۋىمىز كەرەك. قازىرگى جاستاردىڭ ءورشىل يدەيالارى مەن ەرىك-جىگەرى قازاقستاندى دامىتاتىن باستى كۇش ەكەنى دە انىق. باستىسى, ولاردىڭ وسى الەۋەتىن دۇرىس ارناعا باعىتتاۋ كەرەك.
قاسىم-جومارت توقاەۆتىڭ قاتىسۋىمەن وتكەن جيىننان كوپ وي تۇيدىك. پرەزيدەنت وبلىس باسشىلىعىنا اۋقىمدى مىندەتتەر جۇكتەدى. سولاردىڭ ءبارى ويداعىداي جۇزەگە اسسا ەكەن دەگەن تىلەگىمىز بار.
سەرىك زاڭوۆ,
ەكىباستۇز گرەس-2 ستانساسىنىڭ اۋىسىم باسشىسى,
ەكىباستۇز قالالىق قوعامدىق كەڭەسىنىڭ مۇشەسى
پاۆلودار وبلىسى
