قازانداعى «تاتنەفت ارەنا» مۇز سارايىندا جەتى مىڭعا جۋىق جانكۇيەردىڭ قاتىسۋىمەن وتكەن ويىندا ەلوردالىقتار ماتچ تاعدىرىن نەبارى ەكىنشى كەزەڭنىڭ وزىندە شەشىپ تاستادى. ءبىرىنشى كەزەڭنىڭ 18-مينۋتىندا «بارىس» ساپىنان قازاقستاندىق قورعاۋشى سامات دانيار مەرگەندىگىمەن كوزگە ءتۇسىپ, وسى ماۋسىمداعى العاشقى گولىن سوقتى. ۇزىلىستەن كەيىن ايدىن يەلەرى سان باسىمدىعىن پايدالانىپ, 22-مينۋتتا تارازى باسىن تەڭەستىردى. گولدىڭ اۆتورى – كيريلل پەتروۆ. دەگەنمەن جەرگىلىكتى جانكۇيەرلەردىڭ قۋانىشى ۇزاققا سوزىلمادى. ارادا بەس مينۋت وتكەندە ءادىل بەكەتاەۆ نىسانانى ءدال كوزدەپ, ويىنداعى جانە ءوزىنىڭ وسى ماۋسىمداعى ەكىنشى شايباسىن سوقتى.
كەيىننەن 32-مينۋتتا «بارىستىڭ» كانادالىق شابۋىلشىسى ليندەن ۆەي سان باسىمدىعىن جۇزەگە اسىرىپ, تابلوداعى كورسەتكىشتى 1:3-كە جەتكىزدى. ەكىنشى كەزەڭنىڭ اياقتالۋىنا ءتورت مينۋت قالعاندا ارتيوم گاليموۆ ەسەپ ايىرماسىن قىسقارتقانىمەن, قالعان ۋاقىتتا «بارىس» ەسەپتەگى باسىمدىعىن ساقتاپ قالدى – 2:3. مۇنىڭ الدىندا جەرلەستەرىمىز نيجني نوۆگورودتا «تورپەدودان» 3:1 ەسەبىمەن جەڭىلىپ قالعان بولاتىن. 17 ۇپايمەن «شىعىس» كونفەرەنتسياسىندا التىنشى تۇرعان «بارىس» الداعى بەس ويىندى ەندى ەلوردادا وتكىزەدى. ەرتەڭ قىتايدىڭ «كۋنلۋن رەد ستار» كلۋبىن قابىلدايدى.
