استاناداعى ۇلتتىق تەننيس ورتالىعىندا ورنالاسقان Beeline Arena سپورت كەشەنىندە ءوتىپ جاتقان باسەكەنىڭ باستاپقى كەزدەسۋىندە الەمنىڭ 54-راكەتكاسى نيدەرلاندتىق تاللون گريكسپۋردى تىزە بۇكتىرىپ, جانكۇيەرلەردىڭ قوشەمەتىنە بولەنگەن قازاقستاننىڭ ءبىرىنشى, الەمنىڭ 43-راكەتكاسى الەكساندر بۋبليك ەكىنشى اينالىمدا جەڭىلىپ قالدى. جەرلەسىمىز ەكىنشى كەزەڭدە الەمنىڭ 10-شى, وسى جارىستىڭ 7-راكەتكاسى پولشالىق حۋبەرت حۋركاچپەن شەبەرلىك بايقاسىپ, ەكى سەتتە 6:4, 6:7 ەسەبىمەن قارسىلاسىنا جول بەردى. وسىلايشا, بۋبليك شيرەك فينالعا جەتپەي جارىس جولىنان شىعىپ قالدى. ول ەكىنشى اينالىمدا پولشا تەننيسشىسىنە قارسى ەشقانداي ايلا-ءتاسىل قولدانا المادى. ءسويتىپ, ءوز جەرىمىزدە العاش رەت ۇيىمداستىرىلىپ جاتقان Astana Open ATP 500 تۋرنيرىندە بىردە-ءبىر قازاقستاندىق تەننيسشى قالمادى. جارىس ەندى شەتەلدىك تەننيسشىلەردىڭ ونەرىمەن جالعاسادى.
ەلورداداعى تۋرنيرگە دەيىن ءيزرايلدىڭ تەل-اۆيۆ قالاسىندا وتكەن Tel Aviv Watergen Open دوداسىنا قاتىسقان نوۆاك دجوكوۆيچ كارەراسىنداعى 89-شى جەڭىسىنە قول جەتكىزدى. فينالدا ول 2014 جىلعى اقش اشىق بىرىنشىلىگىنىڭ جەڭىمپازى حورۆاتيالىق مارين ءچيليچتى ەكى سەتتە – 6:3, 6:4 ەسەبىمەن ۇتقان بولاتىن. جەڭىمپاز دجوكوۆيچ ەلورداعا دا تەك جەڭىس ءۇشىن كەلگەنى بەلگىلى. قازاقستان تەننيس فەدەراتسياسىنىڭ پرەزيدەنتى بولات وتەمۇراتوۆتىڭ ارنايى شاقىرۋىمەن كەلگەن سەربيالىق ساڭلاق العاشقى اينالىمدا الەمدىك رەيتينگتە 81-ورىندا تۇرعان كريستيان گارينمەن شەبەرلىك بايقاسىپ, ءبىر ساعاتقا جالعاسقان ماتچتا قارسىلاسىن ەكى سەتتە تىزە بۇكتىردى – 6:1, 6:1. ەكىنشى اينالىمدا سەربيالىق تەننيسشى نيدەرلاند وكىلى بوتيك ۆان دە زاندشۋلپپەن شيرەك فينالدىڭ جولداماسىن ساراپقا سالدى.
ال حورۆاتيالىق مارين چيليچ ءۇشىن استاناداعى تۋرنير ءساتتى باستالعانىمەن, جارىستىڭ ەكىنشى كەزەڭىنەن ارىگە اسا المادى. رەسەيلىك كارەن حاچانوۆپەن ويناعان ول ءبىرىنشى سەتتە 6:2 ەسەبىمەن باسىم تۇسكەنىمەن, قالعان ەكى پارتيادا قارسىلاسى مىقتىلىق تانىتتى – 3:6, 3:6. سونداي-اق ءتۋرنيردىڭ ءبىرىنشى اينالىمىندا الەمنىڭ ءبىرىنشى راكەتكاسى يسپانيالىق كارلوس الكاراستى جەڭىپ, كىشىگىرىم سەنساتسيا جاساعان بەلگيالىق داۆيد گوففەن (66) ەكىنشى كەزەڭدە فرانتسيالىق ادريان ماننارينودان (51) جەڭىلىپ قالدى – 6:3, 1:6, 5:7.
يسپانيالىق روبەرتو باۋتيستا-اگۋت (21) پەن گرەكيالىق ستەفانوس تسيتسيپاس (6) شيرەك فينالعا جولداما الدى. باۋتيستا-اگۋت ەكىنشى كەزەڭدە رەسەيلىك پاۆەل كوتوۆتى ەكى سەتتە – 6:1, 7:6 ەسەبىمەن ۇتسا, تسيتسيپاس يتاليالىق ليۋكا نارديدەن (152) باسىم ءتۇستى – 7:6, 7:6.
وسىلايشا, Astana Open ءتۋرنيرىنىڭ شيرەك فينالىنا ادريان ماننارينو (فرانتسيا), اندرەي رۋبليوۆ (رەسەي), ستەفانوس تسيتسيپاس (گرەكيا), كارەن حاچانوۆ (رەسەي), روبەرتو باۋتيستا-اگۋت (يسپانيا), حۋبەرت حۋركاچ (پولشا) سەكىلدى تەننيسشىلەر شىقتى.
