«قازىر رەسەيمەن بىرلەسىپ ەدىل وزەنىن ساقتاۋ بويىنشا ۇلكەن فەدەرالدى باعدارلاما جۇرگىزىپ جاتىرمىز. سەبەبى ەدىل كاسپي تەڭىزىنە دە قۇيىلادى. ەدىلدىڭ جىلدىق اعىنى شامامەن 250 ميلليارد تەكشە مەتر سۋدى قۇرايدى. بۇل جۇمىستارمەن رەسەي تاراپى اينالىسادى. ءبىزدىڭ تاراپ جايىق وزەنىن ساقتاۋ بويىنشا ءىس-شارا كەشەنىن جۇرگىزۋدە», دەدى سەرىكقالي برەكەشەۆ سەناتتا وتكەن بريفينگتە.
ءمينيستردىڭ ايتۋىنشا, سوڭعى بىرنەشە جىل ىشىندە وزەننىڭ جىلدىق اعىنى ەكى ەسە ازايدى.
«بۇعان كليماتتىق وزگەرىستەر مەن رەسەي اۋماعىنداعى وزەن اعىنىنىڭ جوعارى رەتتەلۋى سەبەپ بولۋى مۇمكىن. رەسەيدە كوپتەگەن سۋ قويمالارى سالىندى. ءبىز كورشى مەملەكەتپەن وسى باعىتتا جۇمىس ىستەپ جاتىرمىز», دەدى ۆەدومستۆو باسشىسى.
ونىڭ ايتۋىنشا جايىقتى ساقتاۋ جۇمىستارى 2024 جىلى اياقتالادى دەپ كۇتىلۋدە.
«بۇل جۇمىستى 2024 جىلعا دەيىن اياقتاۋدى جوسپارلاپ وتىرمىز. ءىس-شارالار كەشەنىنە وزەن ءتۇبىن تەرەڭدەتۋ, جاعالاۋدى نىعايتۋ جۇمىستارى, سونداي-اق وزەن ارناسىن عىلىمي زەرتتەۋ جاتادى», دەپ تولىقتىردى ەكولوگيا مينيسترلىگىنىڭ باسشىسى.
