سونىڭ ىشىندە قاراعاندى وبلىسىنىڭ ترانزيتتىك الەۋەتىن ارتتىرۋعا ارنالعان تاپسىرمالارى, كولىك كوممۋنيكاتسياسىن دامىتۋعا بايلانىستى مىندەتتەرى مەن مەجەلەرى تۇششىمدى.
بارشاعا ءمالىم, قاراعاندى وبلىسى تەرريتورياسى اۋقىمدى, ەلىمىزدەگى ۇلكەن وبلىس. ءوڭىر ترانزيتتىك جولدار توعىسىندا تۇر. سول سەبەپتى دە جولداردىڭ جاعدايى حالىقتى قاتتى الاڭداتادى. اسىرەسە قاسيەتتى قارقارالى, مىس مەكەنى جەزقازعان جولىنىڭ ساپاسى سىن كوتەرمەيدى. اتالعان جولدارعا پرەزيدەنتتىڭ نازار اۋدارۋى ونداعى كۇردەلى دە كۇرمەۋلى ماسەلەنى شەشپەك. ءتىپتى ۇكىمەتكە قاراعاندى-قارقارالى تاس جولىن ەكى جىل ىشىندە سالۋ تۋرالى تاپسىرماسى ايماق ەكونوميكاسىن ىلگەرىلەتۋگە اسەر ەتەرى داۋسىز.
ءبىز راسىمەن وڭىرلىك ءتۋريزمدى دامىتامىز دەسەك, ەڭ الدىمەن كولىك جولدارىنىڭ جوندەلۋىنە باسا ءمان بەرگەنىمىز ءجون. سەبەبى بۇل ماسەلەنىڭ وڭ شەشىلۋى ايماق ەكونوميكاسىنىڭ وسۋىنە سەپتىگىن تيگىزەدى. سونىمەن قاتار پرەزيدەنتتىڭ ءىرى كاسىپورىنداردىڭ مەملەكەت الدىنداعى جاۋاپكەرشىلىگىن كۇشەيتۋ تۋرالى ءسوزى بۇقارانىڭ كوكەيىنەن شىققانى داۋسىز. وسى باعىتتا ەل پرەزيدەنتىنىڭ «قۋاتتى وڭىرلەر – ەل دامۋىنىڭ درايۆەرى» دەگەن ۇستانىمى وتە دۇرىس.
سونداي-اق عالىم رەتىندە, وقۋ ورنىندا ۇزاق جىلدار ەڭبەك ەتكەن ۇستاز رەتىندە ماعان مەملەكەت باسشىسىنىڭ وڭىرلىك ۋنيۆەرسيتەتتى دامىتۋ تۋرالى باستاماسى ۇنادى. وقۋ ورىندارىنىڭ جانىنان زەرتحانالار اشۋعا قامقورلىق تانىتۋى دا قۋانارلىق جاڭالىق. مۇنداي كەزدەسۋلەر پرەزيدەنت پەن حالىق اراسىنداعى بايلانىستى نىعايتا تۇسەدى.
نۇرلان دۋلاتبەكوۆ,
ە.ا.بوكەتوۆ ۋنيۆەرسيتەتىنىڭ رەكتورى, اكادەميك
