جارىستىڭ العاشقى كۇنىندە «ۇلكەن دۋلىعا» ساناتىنداعى تۋرنيرلەردە قاتارىنان ءۇش جىل (2014, 2015, 2016) توپ جارعان شۆەيتساريالىق ستەن ۆاۆرينكا, بىلتىرعى توكيو وليمپياداسىنىڭ قولا جۇلدەگەرى رەسەيلىك اسلان كاراتسەۆ, سونىمەن قاتار الەمدىك رەيتينگتە 13-ورىندا تۇرعان كانادالىق فەليكس وجە-الياسسيم دا كۇتپەگەن جەردە قارسىلاستارىنا جول بەردى.
بيىل اقپاندا روتتەردامدا (نيدەرلاند) وتكەن ATP 500 ءتۋرنيرىنىڭ فينالىندا الەمنىڭ التىنشى راكەتكاسى گرەكيالىق ستەفانوس تسيتسيپاستى تىزە بۇكتىرىپ, جارىس جەڭىمپازى اتانعان 22 جاستاعى وجە-ءالياسسيمنىڭ شاماسى بۇل جولى 34 جاستاعى يسپانيالىق تاجىريبەلى تەننيسشى روبەرتو باۋتيستا-اگۋتقا (اتر 21) جەتپەدى. ءبىرىنشى سەتتە روبەرتو 6:4 ەسەبىمەن باسىم تۇسكەنىمەن, فەليكس ەكىنشى سەتتە ءبىراز قارسىلاسىپ باقتى. كانادالىقتىڭ ەكى گەيمدە برەيك جاساپ, بۇل سەتتى ءوز پايداسىنا اياقتايتىن تاماشا مۇمكىندىگى بولعان ەدى. الايدا روبەرتو ەسەپ 6:6 بولعان كەزدە تاي-برەيكتى ءتيىمدى پايدالانىپ, كەلەسى كەزەڭگە جولداما الدى – 7:6.
ءبىرىنشى كۇننىڭ كەشكى سەسسياسىندا ونەر كورسەتكەن رەسەيلىك اندرەي رۋبليوۆ (9) سەربيالىق لاسلو دجەرەنى (76) ەكى سەتتە 6:4, 6:3 ەسەبىمەن ەش قيىندىقسىز تىزە بۇكتىردى. بۇعان دەيىن تەننيسشىلەر كورتتا ءتورت مارتە كەزدەسىپ, ۇشەۋىندە اندرەي رۋبليوۆ باسىم تۇسكەن.
جارىستىڭ ەكىنشى كۇنىندە دە بىرقاتار تارتىستى كەزدەسۋلەر ءوتتى. ويىن كۇنىن رەسەيلىك كارەن حاچانوۆ (18) پەن امەريكالىق ماكسيم كرەسسي (32) اشىپ بەردى. ەكى تەننيسشى اراسىنداعى العاشقى كەزدەسۋدە حاچانوۆتىڭ مەرەيى ۇستەم بولدى – 6:4, 7:4. سونداي-اق تاعى ءبىر رەسەيلىك پاۆەل كوتوۆ 23 جاستاعى يسپانيالىق الەحاندرو داۆيدوۆيچ-فوكينانى (31) ەكى سەتتە – 6:4, 6:4 ەسەبىمەن ۇتتى.
وكىنىشكە قاراي, Astana Open تۋرنيرىنە ارنايى شاقىرتۋ العان قازاقستاندىق ميحايل كۋكۋشكين بىلتىرعى «رولان گارروس» جارىسىنىڭ ءفيناليسى گرەكيالىق ستەفانوس تسيتسيپاستان قاتارىنان بەسىنشى ماتچتا جەڭىلىپ قالدى – 3:6, 4:6. سونداي-اق ەكىنشى كۇننىڭ تۇسكى سەسسياسىندا كورتقا شىققان يتاليالىق ليۋكا ناردي (156) رەسەيلىك الەكساندر شەۆچەنكونى (146) ەكى سەتتە – 7:6, 6:2 ەسەبىمەن جەڭىپ, ەكىنشى اينالىمعا شىقتى.
بۇل كۇنى جانكۇيەرلەر يسپانيالىق جاس تالانتتى تەننيسشى كارلوس الكاراستىڭ ونەرىن اسىعا كۇتكەن ەدى. الايدا الەمنىڭ ماقتاۋلى تەننيسشىسى العاشقى اينالىمدا كۇتپەگەن جەردە بەلگيالىق داۆيد گوففەننەن ەكى سەتتە (7:5, 6:3) جەڭىلىپ قالدى. نەگىزى بۇل ماتچتا گوففەننىڭ ورنىنا دانيالىق حولگەر رۋنە ويناۋى كەرەك ەدى. بىراق 19 جاستاعى دانيالىق تەننيسشى جاراقاتىنا بايلانىستى استاناداعى تۋرنيرگە قاتىسۋدان باس تارتتى دا, ونىڭ ورنىنا ىرىكتەۋ سايىستارىنىڭ فينالىندا جەڭىلگەن بەلگيالىق داۆيد گوففەن شىقتى. ءسويتىپ, ىرىكتەۋ كەزەڭىنەن وتە الماعان تەننيسشى الەمنىڭ ءبىرىنشى راكەتكاسىن جەڭىپ, سەنساتسيا دەمەسەك تە ۇلكەن ەرلىك جاسادى.
