ۇكىمەت • 30 قىركۇيەك، 2022

وتباسىنداعى زورلىق-زومبىلىق ۇكىمەت نازارىندا

78 رەت كورسەتىلدى

قر پرەمەر-ءمينيسترى ءاليحان سمايىلوۆتىڭ توراعالىعىمەن وتكەن قۇقىق بۇزۋشىلىقتاردىڭ الدىن الۋ جونىندەگى ۆەدومستۆوارالىق كوميسسيانىڭ وتىرىسىندا وتباسىلىق-تۇرمىستىق زورلىق-زومبىلىقتىڭ الدىن الۋ شارالارىن كۇشەيتۋ جانە قاۋىپسىزدىكتى قامتاماسىز ەتۋدىڭ سەرۆيستىك مودەلىن ەنگىزۋ ماسەلەلەرى  قارالدى، دەپ حابارلايدى Egemen.kz.

ىشكى ىستەر ءمينيسترىنىڭ ءبىرىنشى ورىنباسارى مارات قوجاەۆ پوليتسياعا جىل سايىن تۇرمىستىق زورلىق-زومبىلىق فاكتىلەرى بويىنشا 100 مىڭنان استام ءوتىنىش كەلىپ تۇسەتىنىن باياندادى. بۇل رەتتە جاعدايلاردىڭ 60%-ىندا جابىرلەنۋشىلەر قۇقىق بۇزۋشىلارعا قاتىستى شارالار قابىلداۋدان باس تارتادى. 2022 جىلى 37 مىڭ ادام اكىمشىلىك جاۋاپكەرشىلىككە تارتىلدى. بۇل رەتتە وتباسىلىق-تۇرمىستىق قاتىناستار سالاسىنداعى قىلمىستىق قۇقىق بۇزۋشىلىقتار سانى 7%-عا (623-تەن 583-كە دەيىن) تومەندەدى. 

مەملەكەت باسشىسىنىڭ تاپسىرماسى بويىنشا ءىىم وتباسىلىق-تۇرمىستىق سالاداعى زورلىق-زومبىلىقتىڭ الدىن الۋ ءۇشىن جاۋاپكەرشىلىكتى قاتاڭداتۋ شارالارىن، سونداي-اق وتباسىنىڭ شىرقىن بۇزۋشىلاردى وڭالتۋ جانە ولارمەن تاربيە جۇمىسىن جۇرگىزۋدى قامتيتىن قادامداردى ازىرلەدى.

وسىلايشا، بۇل سالاداعى ءىس-قيمىلداردى ۇيلەستىرۋ ءۇشىن ۋاكىلەتتى مەملەكەتتىك ورگاندى بەلگىلەۋ ۇسىنىلىپ وتىر، بۇل رەپرەسسيۆتى شارالارعا ەمەس، ازاماتتاردىڭ الەۋمەتتىك-ەكونوميكالىق پروبلەمالارىن، بالالاردى تاربيەلەۋ جانە جالپى، وتباسى مارتەبەسىن كوتەرۋ ماسەلەلەرىن شەشۋگە باسىمدىق بەرۋگە جول اشادى. 

سونىمەن قاتار تۇرمىستىق قىلمىستاردى تىركەۋدىڭ ءوتىنىش بەرۋ تۇرىنەن انىقتاۋ سيپاتىنا كوشۋ جوسپارلانۋدا، بۇل پوليتسياعا قۇقىق بۇزۋشىنى جابىرلەنۋشىلەردىڭ ءوتىنىشىنسىز، ياعني تۇرمىستىق زورلىق-زومبىلىق جاساۋ فاكتىسى بويىنشا جاۋاپقا تارتۋعا مۇمكىندىك بەرەدى. وسىلايشا، جازانىڭ بۇلتارتپاۋشىلىق ءپرينتسيپى قامتاماسىز ەتىلەدى.

بۇدان باسقا، اكىمشىلىك قاماۋعا الۋدىڭ ەڭ از مەرزىمىن 5 تاۋلىكتەن باستاپ (بۇرىن بولماعان) بەلگىلەۋ، تەرگەۋ كەزەڭىندە وتباسىنىڭ شىرقىن بۇزۋشىنى وقشاۋلاۋ جانە ونى سوتتىڭ قاماۋعا الۋ مۇمكىندىگىن قاراستىرۋ، سونداي-اق تاراپتاردىڭ تەك ءبىر رەت جانە سوتتا عانا تاتۋلاسۋىنا مۇمكىن بەرۋ ۇسىنىلۋدا. 

وسى تاقىرىپ بويىنشا باس پروكۋروردىڭ ورىنباسارى جاندوس ومىراليەۆ، ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا جانە ادىلەت ۆيتسە-ءمينيسترى الما مۇقانوۆا بايانداما جاسادى. 

پرەمەر-مينيستر تۇرمىستىق زورلىق-زومبىلىقتىڭ الدىن الۋدا جاڭا الەۋمەتتىك سەرۆيستەردى، ونىڭ ىشىندە وتباسىنىڭ تسيفرلىق كارتاسىن بەلسەندى قولدانۋ قاجەتتىگىن اتاپ ءوتتى.

«تسيفرلىق تەحنولوگيالاردى جانە دەرەكتەردى تالداۋدى پايدالانا وتىرىپ، قانداي دا ءبىر پروبلەمالار تۋىنداۋى مۇمكىن قاۋىپتى ايماقتاعى وتباسىلاردى انىقتاۋ قاجەت. قىلمىستاردىڭ نەمەسە باسقا دا زاڭسىز ارەكەتتەردىڭ جاسالۋىن كۇتپەي، ەڭ الدىمەن، وسىلارعا نازار اۋدارۋ كەرەك. قۇقىق بۇزۋشىلىقتىڭ سالدارىمەن كۇرەسۋدەن گورى ونىڭ الدىن العان الدەقايدا دۇرىس»، دەدى پرەمەر-مينيستر.

ونىڭ ايتۋىنشا، وڭىرلەر اكىمدەرىنىڭ قىزمەتىن باعالاۋ رەيتينگىنە تۇرمىستىق زورلىق-زومبىلىقتىڭ الدىن الۋ دەڭگەيىنىڭ ينديكاتورلارىن ەنگىزۋ ماسەلەسىن قاراستىرۋ، سونداي-اق داعدارىس ورتالىقتارىنىڭ تاپشىلىعى ماسەلەسىن شەشۋ جونىندە شارالار قابىلداۋ قاجەت.

ىشكى ىستەر مينيسترلىگىنە وتباسىلىق-تۇرمىستىق سالاداعى زورلىق-زومبىلىق ءۇشىن جاۋاپكەرشىلىكتى قاتاڭداتۋ جونىندەگى زاڭ جوباسىن ازىرلەۋ شەڭبەرىندە حالىقپەن كەڭىنەن ءتۇسىندىرۋ جۇمىستارىن جۇرگىزۋ تاپسىرىلدى.

سونداي-اق ۆاك وتىرىسىندا قاۋىپسىزدىكتى قامتاماسىز ەتۋدىڭ سەرۆيستىك مودەلىنە كوشۋ ماسەلەسى قارالدى، ونىڭ شەڭبەرىندە ازاماتتارعا ساپالى پوليتسيا قىزمەتتەرىن كورسەتۋگە جانە قۇقىقتىق ءتارتىپ سالاسىنداعى پروبلەمالاردى بىرلەسىپ انىقتاۋ جانە شەشۋ ءۇشىن مەملەكەتتىك ينستيتۋتتاردىڭ قوعاممەن تۇراقتى ارىپتەستىك قاتىناستارىن قالىپتاستىرۋعا باسا نازار اۋدارىلادى.

پرەمەر-مينيستر ءىىم-گە مەملەكەتتىك ورگانداردىڭ وسى باعىتتاعى جۇمىسىن ءتيىمدى ۇيلەستىرۋدى قامتاماسىز ەتۋدى، ال وڭىرلەردىڭ اكىمدىكتەرىنە جەرگىلىكتى جەرلەردە سەرۆيستىك مودەلدى ساپالى ماسشتابتاۋ جونىندە شارالار قابىلداۋدى تاپسىردى.

«بۇل – مەملەكەت باسشىسى باستاماشى بولعان قۇقىق قورعاۋ سالاسىنداعى ماڭىزدى رەفورمالاردىڭ ءبىرى. جىل قورىتىندىسى بويىنشا ءاربىر ءوڭىردىڭ وسى باعىتتاعى جۇمىسىنا باعا بەرىلەدى»، دەدى ءاليحان سمايىلوۆ.

سوڭعى جاڭالىقتار

QazaqGaz ديرەكتورلار كەڭەسىنىڭ قۇرامى وزگەردى

قازاقستان • 02 جەلتوقسان، 2022

ماۋلەن اشىمباەۆ قىتاي حالقىنا كوڭىل ايتتى

پارلامەنت • 02 جەلتوقسان، 2022

ۇقساس جاڭالىقتار