بۇل تۋرالى قازاقستاننىڭ ماشينا جاساۋشىلارى فورۋمى اياسىندا يندۋستريا جانە ينفراقۇرىلىمدىق دامۋ مينيسترلىگى يندۋستريالىق دامۋ كوميتەتى توراعاسىنىڭ ورىنباسارى ولجاس ساپاربەكوۆ مالىمدەدى.
اۆتوموبيل جاساۋدى دامىتۋ ماسەلەلەرىنە ارنالعان سەكتسيالىق وتىرىس بارىسىندا ولجاس ساپاربەكوۆ سالادا جۇزەگە اسىرىلىپ جاتقان جاڭا جوبالار جايىندا ەگجەي-تەگجەي باياندادى. بۇگىندە كورەيالىق Yongsan كومپانياسىمەن Hyundai Accent جانە Hyundai Tucson مودەلدەرىنە ارنالعان اۆتوموبيل ورىندىقتارىن ءوندىرۋ بويىنشا بىرلەسكەن جوبا پىسىقتالۋدا. سونىمەن قاتار «Hyundai Trans Kazakhstan» جشس زاۋىتىندا شىعارىلاتىن Hyundai Accent, Hyundai Tucson, Hyundai Santa Fe, Hyundai Elantra مودەلدەرىنە مۋلتيمەديالىق جۇيەلەردى ورناتۋ ءۇشىن MOTREX كومپانياسىمەن جۇمىس جۇرگىزىلۋدە. بۇل جوبالار شىعارىلاتىن مودەلدەردەگى قازاقستاندىق قامتۋ ۇلەسىن جانە جۇمىس ورىندارىنىڭ سانىن ۇلعايتۋعا مۇمكىندىك بەرەدى.
ماشينا جاساۋ تەحنولوگيالىق تۇرعىدان ونەركاسىپتەگى ەڭ كۇردەلى سالالاردىڭ ءبىرى. ماشينا جاساۋدا ءبىر جۇمىس ورنىن قۇرۋ وزگە بايلانىستى سالالاردا التى جۇمىس ورنىن اشۋعا مۇمكىندىك بەرەدى. سالانىڭ ماڭىزدى باعىتتارىنىڭ ءبىرى – اۆتوموبيل جاساۋ.
«2010 جىلدىڭ قورىتىندىسى بويىنشا اۆتوموبيل جاساۋ ماشينا جاساۋدىڭ بارلىق سالاسىنىڭ ىشىندە نەبارى 5 پايىزىن قۇرادى. 2021 جىلدىڭ قورىتىندىسى بويىنشا اۆتوونەركاسىپتىڭ ۇلەسى 32,1 پايىزعا دەيىن ارتتى. بيىلعى ءبىرىنشى جارتىجىلدىقتا بۇل كورسەتكىش 37,5 پايىزعا جەتتى. ناتيجەسىندە, قىسقا مەرزىم ىشىندە اۆتووندىرۋشىلەر سانى ارتىپ, ۇنەمى سالىق تۇسىمدەرىن قامتاماسىز ەتەتىن سالا قالىپتاستى», دەدى و.ساپاربەكوۆ.
ول مينيسترلىكتىڭ قىزمەتى وڭدەۋ ونەركاسىبى سالالارىن كەشەندى دامىتۋعا باعىتتالعانىن اتاپ ءوتتى. كاسىپكەرلىك كودەكس شەڭبەرىندە كولىك قۇرالدارىن ونەركاسىپتىك قۇراستىرۋ جانە كولىك قۇرالدارىنا كومپونەنتتەردى ونەركاسىپتىك قۇراستىرۋ تۋرالى جاڭارتىلعان كەلىسىمدەردى ەنگىزۋ جوسپارلانعان. سونداي-اق وقشاۋلاۋدى باعالاۋدىڭ بالدىق جۇيەسى ەنگىزىلدى. وسىلايشا, ۇسىنىلاتىن پرەفەرەنتسيالاردى ءتيىمدى پايدالانۋعا جانە بولۋگە مۇمكىندىك بار.
