سىندارلى كەزەڭدەگى سەرپىن

بيىل تالاي كومپانيا ەلەۋلى قيىندىقپەن بەتپە-بەت كەلدى. مۇنى «قازترانسويل» اق دا باستان كەشىپ وتىر. ايتالىق, كومپانيا جىل باسىنان بەرى وندىرىستىك جۇمىسكەرلەر جالاقىسى دەڭگەيىنىڭ جانە قىزمەت كورسەتۋشى كومپانيالار جۇمىسىنا اقى تولەۋ شىعىندارىنىڭ وسۋىنە بايلانىستى شىعىستاردىڭ جوسپارلانباعان وسۋىنە تاپ بولدى. گەوساياسي وزگەرىستەر ماگيسترالدىق مۇناي قۇبىرلارى جۇيەسىنىڭ سەنىمدى جۇمىسىنا تەرىس اسەر ەتتى, كۇردەلى قارجىلىق سالىمدار كوزدەلگەن جوبالاردى ىسكە اسىرۋعا قاجەتتى سىرتتان اكەلىنەتىن ماتەريالدار مەن جابدىقتار قۇنى جانە ولاردى جەتكىزۋ نارقى دا ارتتى. اتالعان قيىندىقتار بىرىنەن سوڭ ءبىرى تىزبەكتەلىپ, تۇپتەپ كەلگەندە كومپانيانىڭ قارجىلىق ناتيجەلەرىنە اسەرىن تيگىزبەي قويمادى.

«قازترانسويل» اق-نىڭ 2022 جىل­دىڭ ءبىرىنشى جارتىجىلدىعىنداعى شوعىر­لاندىرىلعان تازا تابىسى 15,8 ملرد تەڭگەنى قۇرادى. بۇل 2021 جىلدىڭ سايكەس كەزەڭىندەگى كورسەتكىشتەن 18 ملرد تەڭگەگە نەمەسە 53 پايىزعا تومەن. قۇمكول كەن ورىندارىندا مۇناي قورىنىڭ سارقىلا باس­تاۋىنا بايلانىستى ونى ءوندىرۋ كولەمىنىڭ بارعان سايىن قىسقارا ءتۇسۋى سالدارىنان ءبىزدىڭ كومپانيانىڭ مۇناي قۇبىرلارى جۇيەسى بويىنشا مۇناي ايداۋ كولەمى دە ازايۋدا. دەگەنمەن «قازترانسويل» اق جىل قورىتىندىسى بويىنشا جوسپارلى كورسەتكىشتەردى ورىنداۋعا جانە قالايدا وڭ قارجىلىق ناتيجەلەرگە قول جەتكىزۋدى كوزدەپ وتىر. الدىندا اتالعان ءۋاجدى سەبەپ-سالدار­لارعا بايلانىستى ول ناتيجەلەر 2021 جىلعى كورسەتكىشتەردەن, ارينە, ءبىرشاما تومەن بولماق.

كومپانيا وسىنداي كۇردەلى جاعدايدا ءوزىنىڭ ۇزاقمەرزىمدى قارجىلىق تۇراق­تىلىعىن قامتاماسىز ەتۋ جانە ينۆەس­تيتسيالىق تارتىمدىلىعىن ساقتاۋ ءۇشىن قاجەتتى شارالاردى ىسكە اسىرۋدا. بۇل رەتتە ماگيسترالدىق قۇبىرلار جۇيەسى بويىنشا مۇناي تاسىمالداۋ كولەمى مەن جۇك اينالىمىن ۇلعايتۋ, مۇناي تاسىمالداۋ تاريفتەرىن ارتتىرۋ بويىنشا مۇمكىن ىقپالدى ءىس-قيمىلدار ويلاستىرىلدى. مىسالى, بيىلعى 1 ماۋسىمنان باستاپ «قازترانسويل» اق-نىڭ ماگيسترالدىق قۇبىرلارى ارقىلى ەكسپورت ماقساتىندا مۇناي ايداۋ قىزمەتىنە تاريف 20 پايىزعا ءوستى. ال 1 قىركۇيەكتەن قازاقستاننىڭ ىش­كى نارىعىنا كومپانيانىڭ مۇناي ايداۋ بو­يىنشا رەتتەلىپ كورسەتىلەتىن قىزمەتىنە 1 توننا ءۇشىن 1 مىڭ كيلومەترگە 4 328,04 تەڭگە مولشەرىندە ۋاقىتشا وتەمدىك تاريف قول­­دانىلا باستادى. بۇعان دەيىن بيىلعى

1 قاڭ­­تاردان بەرى 1 مىڭ كيلومەترگە  1 توننا ءۇشىن 3 728,82 تەڭگە مولشەرىندە ۋاقىت­شا وتەمدىك تاريف قولدانىلىپ كەلگەن ەدى. 2023-2025 جىلدارى مۇناي جەتكىزۋ ءتاريفى تونناسىنا 1 مىڭ كيلومەترگە 4 355, 57 تەڭگە دەڭگەيىندە بولۋى كوزدەلىپ وتىر.

كومپانيا ءوز قىزمەتتەرىنىڭ جاڭا تۇتىنۋشىلارىن تارتۋ جانە مۇناي تاسىمالداۋ باعىتتارىن ءارتاراپتاندىرۋ بويىنشا دا جۇمىس ىستەپ جاتىر. اتاپ ايتقاندا, رەسەي مۇنايىن ەل اۋماعى ارقىلى قىتايعا جىلىنا 10 ملن توننا كولەمىندە تاسىمالداۋ تۋرالى شارتتى 10 جىلعا ۇزارتۋعا ءوزارا كەلىسسوزدەر جۇر­گىزىلەدى. سونىمەن قاتار رەسەي مۇ­نايىنىڭ قىتايعا ترانزيت كولەمىن ۇلعايتۋ مۇمكىندىگى دە زەرتتەلىپ جاتىر.

قازاقستاندىق جۇك جونەلتۋشىلەرگە باتىس قازاقستان – باتىس قىتاي باعىتىن, اقتاۋ مەن باتۋمي كەمەجايلارى مۇناي قۇيۋ تەرمينالدارىنىڭ قۋاتتارىن پايدالانۋ, مۇناي تاسىمالداۋدا ىقتيمال قاتەرلەردى ازايتاتىن بالامالى باعىتتار نۇسقالارى ۇسىنىلادى.

قازاقستاننىڭ باتىس وڭىرىندە, ەڭ الدىمەن, مۇناي ءوندىرۋشى جانە ونەر­كاسىپ كاسىپورىندارىنىڭ سۋ تۇتىنۋ كولە­مى بولاشاقتا وسە تۇسپەك. وسى احۋالدى ەسكەرىپ, «قازترانسويل» اق ەنشىلەس كاسىپورنى – «ماگيسترالدىق سۋاعىزعىسى» جشس سەنىمدىلىك پەن قاۋىپسىزدىكتى ارتتىرۋ ءۇشىن «استراحان – ماڭعىستاۋ» ماگيسترالدىق سۋ قۇبىرىن قايتا قۇرۋ جانە كەڭەيتۋ» ينۆەستيتسيا­لىق جوباسىن ىسكە اسىرۋدا. بۇل رەتتە تاريفتەردىڭ ءادىل دەڭگەيىن قالىپتاستىرۋ نازاردا بولادى. سۋ قۇبىرىنىڭ قۋاتىن كەڭەيتۋ تۇتىنۋشىلارعا سۋدىڭ مول كولەمىن جەتكىزۋگە, ال تاريف بەلگىلەۋدىڭ جاڭا ءتاسىلى كاسىپورىننىڭ شىعىنسىز قىزمەت ەتۋىنە مۇمكىندىك بەرەدى.

جۇرتشىلىققا ءمالىم, «قازترانسويل» اق وتاندىق كومپانيالاردىڭ ىشىندە ءبىرىنشى بولىپ ءوز اكتسيالارىنان حالىققا ۇلەس ۇسىندى, ياعني حالىقتىق IPO-عا شىقتى. بۇل جۇمىسقا سول تۇستا ۇلتتىق كومپانيامىزدى باسقارعان قايراتەر قايىرگەلدى قابىلدين باستاعان ۇجىم ىقىلاسپەن اتسالىستى. ەندى «قازمۇنايگاز» ۇلتتىق كومپانياسى ءبىز ءجۇرىپ وتكەن وسى جولمەن جۇرمەك. بۇل ورايدا «قازترانسويل» اق وتاندىق نارىقتا IPO-عا قاتىستى ايتارلىقتاي مول تاجىريبە جيناقتاعانى بەلگىلى. 2012-2020 جىلدار ارالىعىندا «قازترانسويل» اق ءوز اكتسيونەرلەرىنە كومپانيانىڭ ديۆيدەندتىك ساياساتىندا مالىمدەلگەن تازا پايدانىڭ 40 پايىزدىق مولشەرىنەن ەداۋىر اساتىن تابىس تولەدى. 2015-2019 جىلدارى ديۆيدەند مولشەرى ءتيىستى كەزەڭدەگى اكتسياعا شاققانداعى پايدادان اسىپ ءتۇستى. ورنالاستىرۋ باعاسىنا ورتاشا جىلدىق پايدا كىرىسى 15,62 پايىزدى قۇرادى. ياعني «قازترانسويل» اق ءوز اكتسيونەرلەرى­نە مەيلىنشە ءتيىمدى ديۆيدەندتىك ساياسات جۇرگىزدى.

بيىل جانە تاياۋ كەلەشەكتە الەۋمەت­تىك-ەكونوميكالىق احۋال ايتارلىقتاي تاۋەكەلدەردى جانە ەكىۇدايلىق جاعدايدى باستان كەشۋ كەزەڭى بولعالى تۇر. وسىعان وراي كومپانيا قارجىلىق تۇراقتى­لىق­تى قامتاماسىز ەتۋگە كۇش سالىپ وتىر. بۇل ينۆەستورلاردىڭ ۇزاقمەرزىمدى مۇددەلەرىنە تولىق ساي كەلەدى. بولاشاقتا الەمدىك ەكونوميكادا جاعداي وڭالىپ, گەوساياسي احۋال قالىپقا كەلگەن كەزدە «قازترانسويل» اق تابىسىن ەسەلەي وتىرىپ, حالىق اراسىنداعى اكتسيونەرلەرى­نە ديۆيدەندتەردى 40 پايىز مولشەر دەڭگەيىندە تولەۋ تاجىريبەسىنە ورالاتىن بولادى, ديۆيدەند مولشەرىن ارتتىرۋ نازاردان تۇسپەيدى.

«قازمۇنايگاز» اق IPO-عا دايىندالۋ بارىسىندا ءوزىنىڭ اكتسيالارى مەن «قازترانسويل» اق اكتسيالارىنىڭ نارقىن قازاقستاننىڭ قور نارىعىندا ءبىر دەڭگەيدە ۇسىنۋ تۋرالى قورىتىن­دىعا كەلگەنىن اتاپ وتكىم كەلەدى. بۇل «قازترانسويل» اق اكتسيالارىن كەرى ساتىپ الۋ تۋرالى ماسەلەنىڭ تۋىنداۋى مۇمكىندىگىن جويادى.

ەستەرىڭىزگە سالا كەتەيىك, «قازترانسويل» اق 2000 جىلداردىڭ باسىنان باستاپ قازاقستان – قىتاي باعىتى بويىنشا مۇناي قۇبىرىن تارتۋدى ىسكە اسىرىپ كەلەدى. باتىس قازاقستاننان قىتايعا ماگيسترالدىق مۇناي قۇبىر­لارى جۇيەسىن قالىپتاستىرۋ كومپانيا ءۇشىن عانا ەمەس, بۇكىل ەل ەكونوميكاسى ءۇشىن اسا ءىرى جانە ستراتەگيالىق ماڭىزدى ينۆەستيتسيالىق جوبا سانالادى. جوبا جاڭا مۇناي ايداۋ ستانسالارىن سالۋدى جانە جۇمىس ىستەپ تۇرعاندارىن قايتا قۇرۋدى, سونداي-اق ىشكى نارىققا جانە قىتايعا ەكسپورتقا مۇناي تاسىمالداۋ كولەمىنىڭ ۇلعايۋىنا قاراي مۇناي قۇبىرىنىڭ وتكىزۋ قابىلەتىن بارلىق ۋچاس­كە بويىنشا كەزەڭ-كەزەڭىمەن ارتتىرۋدى كوزدەيدى.

جاقىندا قازاقستاننىڭ ەنەرگە­تي­كا مينيسترلىگى الداعى جىلدارى مۇ­ناي ءوندىرۋدى ۇلعايتۋ جوسپارلانىپ وتىرعانىن مالىمدەدى. وسىعان قاتىستى ايتارىمىز, اتىراۋ – سامارا مۇناي قۇبىرىندا, اقتاۋ كەمەجايىندا, اتاسۋ – الاشانكوۋ مۇناي قۇبىرىندا قاجەتتى وندىرىستىك قۋات جەتكىلىكتى. سونداي-اق ت.قاسىموۆ اتىنداعى مۇناي ايداۋ ستان­ساسىندا مۇناي اسپاقۇيارلىعىن (ەستاكادا), شاعىر مۇناي قۇيۋ پۋنكتىن پايدا­لانۋ مۇمكىندىگى بار. كومپانيانىڭ كاسپي قۇبىر كونسورتسيۋمىنا مۇنايدى اۋىس­تى­رىپ تيەۋ ءۇشىن دە مۇمكىندىگى از ەمەس. ياعني كومپانيا ۇلتتىق وپەراتور رەتىن­دە ەلىمىزدە كەلەشەكتە ءوندىرۋ ارتا تۇسە­تىن مۇناي كولەمىن تاسىمالداۋ ءۇشىن قاجەت­تى قۋاتتاردى جەتكىلىكتى قامتاماسىز ەتە الادى. مۇناي ءوندىرۋ ودان ءارى ۇلعاي­عان جاعدايدا كومپانيامىزدىڭ ماگيست­رال­دىق مۇناي قۇبىرلارىنىڭ وتكىزۋ جۇيەسى دە كەڭەيە تۇسەدى.

الماعايىپ گەوساياسي تاۋەكەلدەر جاعدا­يىندا مۇناي تاسىمالداۋ باعىت­تارىن ءارتاراپتاندىرۋ مەن دامىتۋ وزەكتى بولىپ قالا بەرەدى. قازاق­ستاندىق مۇنايدى قايتا ايداۋ باعىت­تارىن تاسىمالداۋدىڭ جانە ءارتاراپتان­دىرۋدىڭ كوپتارماقتى دا تاراپتى جۇيەسىن قۇرۋ بويىنشا جوس­پاردا ترانس­كاسپي باعىتى مەن ورتالىق ازيا باعى­تى دا قامتىلاتىن بولادى.

«قازترانسويل» اتالعان جوبالار بويىنشا جۇمىس جۇرگىزىپ كەلەدى. وسى جىلدىڭ سەگىز ايىندا كومپانيا اقتاۋ كەمەجايى ارقىلى باكۋ باعىتىندا تانكەرلەرگە 69 مىڭ توننا قازاقستاندىق مۇنايدى اۋىستىرىپ تيەۋدى قامتاماسىز ەتتى. ت.قاسىموۆ اتىنداعى مۇناي ايداۋ ستانساسىنىڭ اسپاقۇيارلىعى (ەستاكادا) ارقىلى وزبەكستان باعىتىندا قازاق­ستاندىق مۇنايدى تەمىر جول شاندارىنا قۇيۋ 53,9 مىڭ توننانى قۇرادى. بيىل رەسەي مۇنايىن وزبەكستان باعى­تىن­دا تران­زيتتەۋ جۇزەگە اسىرىلمادى. «قازترانسويل» اق قازاقستان اۋماعى بويىن­شا قىتايعا دا, وزبەكستانعا دا جانە باسقا ەلدەرگە دە جىلىنا قازىرگىدەي 10 ملن توننادان ارتىق مۇناي جەتكىزۋ كولە­مىن ۇلعايتۋ بويىنشا رەسەيلىك جانە باس­قا دا مۇددەلى سەرىكتەستەرمەن ىسكەرلىك ىن­تى­ماقتاستىقتى ودان ءارى دامىتۋعا دايىن.

بۇدان بولەك, رەسەي مۇنايىن قىتايعا ترانزيتتەۋ تۋرالى «روسنەفتپەن» كەلىسىم بار. قولدانىستاعى شارت 2023 جىلى اياقتالادى. قازىر ءبىز «روسنەفت­پەن» بىرلەسىپ 2023 جىلدان كەيىن دە قازاقستان ارقىلى قىتايعا رەسەي مۇنايىن تاسىمالداۋ قىزمەتتەرى تۋرالى شارتتى ۇزارتۋ بويىنشا قوسىمشا كەلىسىمگە قول قويۋعا دايىندىق جۇمىس­تارىن جۇرگىزىپ جاتىرمىز.

بۇل رەتتە الدىمەن قازاقستان مەن رەسەي فەدەراتسياسىنىڭ ۇكىمەتتەرى اراسىنداعى ۋاعدالاستىقتارعا قول جەتكىزۋ, ەكى ەلدىڭ ەنەرگەتيكا مينيستر­لىكتەرى اراسىنداعى كەلىسىمدەرگە قاجەتتى وز­گەرىستەر ەنگىزۋ جۇمىستارى اتقا­رى­لاتىن بولادى. ەكى تاراپ تا سىندارلى نيەتتى جانە ترانزيتتىك مۇنايدى تاسىمالداۋ تۋرالى كەلىسىمنىڭ قولدانىلۋ مەرزىمىن ۇزارتۋدى قولدايدى.

«قازترانسويل» اق ەكسپورتتىق باعىتتاردى ءارتاراپتاندىرۋ ءۇشىن 2008 جىلى باتۋميدە مۇناي تەرمينالىن ساتىپ العان بولاتىن. بىراق نارىقتارداعى جاع­داي جۇك جونەلتۋشىلەردىڭ جوسپارلارىنا ءوز تۇزەتۋلەرىن ەنگىزەدى. جەكە­لەگەن حالىقارالىق دالىزدەر بويىنشا جۇك اينالىمى قىسقاردى, سونىڭ قاتا­رىندا باتۋمي مۇناي تەرمينالىنىڭ دا جۇكتەمەسى ازايدى. بۇگىندە گەوساياسي جاعدايدىڭ وزگەرۋىنە بايلانىستى باتۋمي كەمەجايىنىڭ قۋاتى قايتادان سۇرا­نىسقا يە بولىپ وتىر. 2021 جىلدان باستاپ مۇناي مەن مۇناي ونىمدەرىن اۋىس­تىرىپ تيەۋ كولەمىنىڭ وسۋىنە باي­لانىستى باتۋمي تەرمينالىنىڭ قارجى­لىق كورسەتكىشتەردى دە جاقسارا ءتۇستى. ماسەلەن, باتۋمي مۇناي تەرمينالى توبى­نىڭ شوعىرلاندىرىلعان تابىسى 2021 جىلى 2,5 ملرد تەڭگە بولسا, ال وسى جىلدىڭ ءبىرىنشى جارتىجىلدىعىنىڭ وزىندە 1,9 ملرد تەڭگەنى قۇرادى.

كومپانيا ءوز الدىنا قىزمەتتەردىڭ قوسىمشا باعىتتارىن دامىتۋ جانە ءارتاراپتاندىرۋ بويىنشا مىندەتتەر قويىپ وتىر. ترانسكاسپي ءدالىزىن پايدا­لانۋدىڭ وڭتايلى نۇسقالارى, ونىڭ ىشىندە تەڭىز جوباسىنىڭ ينۆەستورلارىن تارتۋ مۇمكىندىگى پىسىقتالىپ جاتىر.

ينۆەستيتسيالىق قوعامداستىق­تىڭ قىزىعۋشىلىعىن تۋدىراتىن «قازترانسويل» اق-نىڭ تاعى ءبىر ءىرى جوباسى «استراحان – ماڭعىستاۋ» ماگيست­رالدىق سۋ قۇبىرىن قايتا قۇرۋ جانە كەڭەيتۋ. بۇل قۇبىر 70 جىل بۇ­رىن سالىنعان. تۇششى سۋ جەتكىزۋدىڭ حالىق ءۇشىن دە, ونەركاسىپ جانە اۋىل شارۋا­شىلىعى كاسىپورىندارى ءۇشىن دە ۇلكەن الەۋمەتتىك جانە ەكونوميكالىق ماڭىزى زور. سۋ قۇبىرىن قايتا قۇرۋ جانە كەڭەيتۋ جوباسى قازاقستان پرەزي­دەنتىنىڭ تاپسىرماسى بويىنشا ىسكە اسىرىلۋدا جانە اتىراۋ مەن ماڭعىستاۋ وبلىستارىنىڭ 2021-2025 جىلدارعا ارنالعان الەۋمەتتىك-ەكونوميكالىق دامۋىنىڭ كەشەندى جوس­پارلارىنا ەنگىزىلگەن. جوبانى ىسكە اسىرۋ ەلىمىزدىڭ باتىس وڭىرىندە سۋ تۇتىنۋ­عا ءوسىپ وتىرعان سۇرانىس جاعدايىندا ماگيسترالدىق سۋ قۇبىرىن سەنىمدى پايدالانۋدى قامتاماسىز ەتۋگە مۇمكىندىك بەرەدى. استراحان – ماڭعىستاۋ سۋ قۇبىرىن جاڭعىرتۋ جوباسىن قارجىلاندىرۋ ءۇشىن قارىز قاراجاتى تارتىلادى.

وسى جىلدىڭ تامىز ايىندا رەتتەۋ­شى مەملەكەتتىك ورگان سۋ جەتكىزىپ بەرۋ باعاسىنىڭ 2022-2027 جىلدارعا ارنالعان ءتاريفىنىڭ ورتاشا دەڭگەيىن تەكشە مەترىنە 425,25 تەڭگە دەڭگەيىندە بەكىتتى. بىراق بۇل تاريف قارىز قاراجاتىنىڭ قايتارىمدىلىعىن, سونداي-اق سۋ قۇبىرىنىڭ شىعىنسىز جانە قاۋىپسىز پايدالانىلۋىن قامتاماسىز ەتپەيدى. مەملەكەت باسشىسى قىركۇيەك ايىنداعى جولداۋىندا مونوپوليالاردىڭ كىرىسىن شەكتەۋ مەن ينفراقۇرىلىمعا ينۆەستيتسيالاردى قامتاماسىز ەتۋ اراسىنداعى تەڭگەرىمدى ساقتاۋ, سونداي-اق تاريفتەردى جاساندى تەجەۋگە جول بەرمەۋ قاجەتتىگىن اتاپ ءوتتى. وسىنى ەسكەرە وتىرىپ, «قازترانسويل» اق ەنشىلەس ۇيىمى – «ماگيسترالدىق سۋاعىزعىسى» جشس بەكىتىلگەن ءتاريفتى قايتا قاراۋ بويىنشا, ونىڭ ىشىندە ء«تاريفتى ينۆەستيتسيالارعا ايىرباستاۋ» جاڭا تاريفتىك ساياساتىنا كوشۋ اياسىندا جۇمىستى جالعاستىرادى.

اعىمداعى كەزەڭ الەۋمەتتىك-ەكونو­مي­كالىق احۋالدا تاۋەكەلدەر مەن بەلگىسىزدىككە تولى بولىپ تۇر. بۇل تەك «قازترانسويل» اق كومپانياسىنا عانا ەمەس, ءومىرىمىزدىڭ بارلىق باعىتىنا دا تەرىس اسەر ەتۋدە. سونىمەن قاتار قازىر بولىپ جاتقان ۇدەرىستەر دامۋدىڭ جاڭا مۇم­كىن­دىكتەرىن دە اشادى. قازىردىڭ وزىندە كوم­پانيانىڭ ماگيسترالدىق مۇناي قۇ­بىر­لارىنىڭ ىقپالداسقان جۇيەسى شەك­تەۋلى كولەمدە بولسا دا جۇك جونەل­تۋشى­لەردىڭ قاجەتتىلىكتەرىنە جىلدام بەيىمدەلە الدى.

بولاشاقتا بارلىق باعىت بويىنشا جەتكىلىكتى قۋاتتار قۇرۋ, ءتاريفتىڭ ءادىل دەڭگەيلەرىن بەلگىلەۋ كەزىندە «قازترانسويل» اق ەلدىڭ ەنەرگەتيكالىق قاۋىپسىزدىگىن قامتاماسىز ەتۋ تۇرعىسىنان ۇكىمەتتىڭ تالاپتارىنا, سونداي-اق شيكى­زاتتى تاسىمالداۋ باعىتتارىن تاڭداۋ ىڭعايىندا مۇناي-گاز سالاسىنىڭ قاجەت­تىلىكتەرىنە تولىق ساي كەلىپ وتىرعانىن اتاپ كورسەتەمىز.

بۇل رەتتە قازىردىڭ وزىندە قۇبىر جۇيەسىنىڭ جاڭا نىساندارىن سالۋ جانە جۇمىس ىستەپ تۇرعاندارىن جاڭعىرتۋ ءۇشىن جابدىق جەتكىزۋشىلەرىمەن ىسكەرلىك قاتىناستاردى جولعا قويۋ سالاسىندا بەلگىلى ءبىر جەتىستىكتەرگە قول جەتكىزدىك. اتاپ ايتقاندا, جابدىقتار مەن ماتەريال­داردى جەتكىزۋدىڭ جاڭا باعدارلىق جولدارى قالىپتاسۋدا. گەوساياسي جاعدايدىڭ قالىپقا كەلۋى تۇتىنۋشىلاردى كورسەتى­لەتىن قىزمەتتەردىڭ وڭتايلى نۇسقالارىن ساپاسى مەن قۇنى بويىنشا تاڭداۋىنا مۇمكىندىك بەرەدى. قازاقستاننىڭ مۇناي قۇبىرى كولىگى سالاسىنداعى ۇلتتىق وپەراتورى «قازترانسويل» اكتسيونەرلىك قوعامى­نىڭ قىزمەتتەرى وسكەلەڭ سۇرانىس­قا ساي كەلەدى جانە اكتسيونەرلەرگە ۇتىمدى, ينۆەستورلار ءۇشىن تارتىمدى بولىپ قالا بەرەدى.

الماس وڭعارسىنوۆ,

«قازترانسويل» اق باس ديرەكتورىنىڭ كورپوراتيۆتىك باسقارۋ جونىندەگى ورىنباسارى