قازاقستاننان اقش-قا تاۋار ەكسپورتتاۋى قاڭتار-شىلدەدە 77,2 پايىزعا ءوسىپ, 769,2 ملن دوللارعا جەتكەن. اقش-قا ەكسپورتتىڭ وسۋىنە شيكى مۇناي, فەرروقورىتپا سەكىلدى تاۋارلاردى جەتكىزۋدىڭ قارقىنى جوعارى بولۋى اسەر ەتكەن. اتاپ ايتقاندا, قازاقستاننان اقش-قا نەگىزىنەن مىنا تاۋارلار: شيكى مۇناي (ەكسپورتتاۋ 98,1 پايىزعا وسكەن); فەرروقورىتپا (+26,7 پايىز); كۇكىرت (+2,7 پايىز); سۋتەگى, سيرەك گازدار جانە باسقا بەيمەتالدار (+1,8 پايىز); تانتال جانە ودان جاسالعان بۇيىمدار (+1,7 پايىز) ەكسپورتتالادى.
ءوز كەزەگىندە قازاقستان اقش-تان جەتى اي ىشىندە 778,3 ملن دوللاردىڭ تاۋارىن ساتىپ العان. مۇحيتتىڭ ارعى بەتىنەن نەگىزىنەن, اۋا نەمەسە ۆاكۋمدىق سورعىلار, كومپرەسسورلار مەن جەلدەتكىشتەر, بولشەكتەپ ساتۋ ءۇشىن قاپتالعان دارىلىك زاتتار, جۇك اۆتوموبيلدەرى, ەكپە, پورشەندى ىشتەن جاناتىن قوزعالتقىشتار, جىلجىمالى قۇرام بولىكتەرى, قۇس ەتى جانە جەۋگە جارامدى قوسالقى ونىمدەر ساتىپ الىنادى.
ۇلتتىق ەكونوميكا مينيسترلىگىنىڭ ەكونوميكالىق زەرتتەۋ ينستيتۋتىنىڭ مالىمەتى بويىنشا, اقش قازاقستاننىڭ ەڭ ءىرى ينۆەستورلارىنىڭ ۇشتىگىنە كىرەدى. تاۋەلسىزدىك العالى بەرى اقش-تان ءبىزدىڭ ەلگە 57,5 ملرد دوللار كولەمىندە تىكەلەي ينۆەستيتسيا قۇيىلعان. امەريكالىق ينۆەستورلار نەگىزىنەن تاۋ-كەن ونەركاسىبى, مۇناي وڭدەۋ, شيكىزات سەكتورلارىندا ۇلكەن ۇلەسكە يە. 2022 جىلدىڭ 1 قاڭتارىنداعى جاعداي بويىنشا ەلىمىزدە امەريكالىق كاپيتالدىڭ قاتىسۋىمەن 695 كاسىپورىن تىركەلىپتى. ونىڭ 658-ءى – شاعىن, 15-ءى – ورتا, ال 22-ءسى ءىرى كاسىپورىندار.
رەسەيدەگى كۇردەلى احۋالعا بايلانىستى قازاقستاندا جۇمىس ىستەيتىن امەريكالىق كومپانيالار سانى ودان ءارى كوبەيۋى مۇمكىن. قازىر بىرقاتار شەتەلدىك گيگانت رەسەي نارىعىن تاستاپ كەتتى جانە تىڭ نارىق ىزدەۋ ۇستىندە. بۇل رەتتە قازاقستان تارتىمدى ينۆەستيتسيالىق كليمات ۇسىنا الادى جانە رەلوكاتسيا بويىنشا كەز كەلگەن ۇسىنىسقا اشىق ەكەنىن پرەزيدەنت قاسىم-جومارت توقاەۆ تا مالىمدەدى. ۇكىمەت قازىر وسى ماسەلە بويىنشا بەلسەندى جۇمىس جۇرگىزىپ جاتىر.
