ەلوردا • 26 قىركۇيەك، 2022

ەلورداداعى «نۇر بەسىك» شاعىن اۋدانىندا گازداندىرۋ ماسەلەسى شەشىلدى

استانا قالاسىنىڭ اكىمى التاي كولگىنوۆ «نۇر بەسىك» شاعىن اۋدانىنا بارىپ، جەرگىلىكتى تۇرعىندارمەن اۋداندى دامىتۋ ماسەلەسىن تالقىلادى. بۇل تۋرالى اكىم ءوزىنىڭ Instagram پاراقشاسىندا حابارلادى، دەپ جازادى Egemen.kz.

بوتاكوز باقبەرگەن

«قالا تۇرعىندارىمەن تۇراقتى تۇردە كەزدەسىپ تۇرامىز. «نۇر بەسىك» (كوكتال-1 ەلدى مەكەنى) شاعىن اۋدانىنىڭ تۇرعىندارىمەن بىرلەسە اۋداننىڭ ودان ءارى دامۋىن تالقىلادىق. قالا تۇرعىندارى الەۋمەتتىك نىساندار (مەكتەپتەر، بالاباقشالار، مەديتسينالىق ورتالىقتار) قۇرىلىسى، كارىز، ءۇي قۇجاتتارىن راسىمدەۋ، قوسىمشا اۆتوبۋستاردى ىسكە قوسۋ، جىلى ايالدامالار ورناتۋ، اۋلالاردى، تروتۋارلاردى اباتتاندىرۋ، ينتەرنەت وتكىزۋ سەكىلدى وزگە دە ماسەلەلەردى كوتەردى»، دەپ جازدى قالا باسشىسى.

اۋدان تۇرعىندارى ماڭىزدى پروبلەمالاردى بۇعان دەيىن دە قوزعاپ كەلگەن، ولاردىڭ باسىم بولىگى، اتاپ ايتقاندا اۋىز سۋ، كارىز، جارىقتاندىرۋ، گازداندىرۋ، جول جانە باسقا دا الەۋمەتتىك ماسەلەلەر شەشىمىن تاپتى.

ەلوردا اكىمىنىڭ ايتۋىنشا، شاعىن اۋدانداعى ۇيلەردىڭ جارتىسىنان كوبى كوگىلدىر وتىنعا كوشىرىلدى، كوشەلەردى جارىقتاندىرۋ جۇمىستارى جۇرگىزىلدى، 14 كوشەنىڭ 13-ءى اسفالتپەن جابىلدى، اۋلالار اباتتاندىرىلىپ، ايالدامالار ورناتىلدى.

«قالا تۇرعىندارى كوتەرگەن ماسەلەلەردى ەسكەرە وتىرىپ، اتالعان شاعىن اۋداندا مەكتەپ سالۋ، قوعامدىق ورىنداردى اباتتاندىرۋ ماسەلەلەرى جوسپارعا ەنگىزىلدى. ال بالاباقشا بويىنشا ينۆەستورلار تارتامىز. سول سياقتى مەديتسينالىق ورتالىقتار سالامىز (قالا تۇرعىندارى تىعىز ورنالاسقان سارىارقا اۋدانىندا)، ينتەرنەت وتكىزەمىز. بۇل جولعى كەزدەسۋدە دە قوزعالعان پروبلەمالاردى شەشۋ ماسەلەسىن قولعا الدىق، ونى ورىنداۋ كەستەسىن جاسايمىز. ەلدى مەكەندەردى دامىتۋ ماسەلەسى مەملەكەت باسشىسىنىڭ باقىلاۋىندا»، دەپ جازدى ەلوردا اكىمى.