«بالالاردى قاۋىپسىز تاسىمالداۋ - ءبىزدىڭ باقىلاۋىمىزداعى ماڭىزدى سۇراقتاردىڭ ءبىرى جانە ءبىز وسى ماسەلەنى ۇنەمى كوتەرىپ كەلەمىز. بيىل بالالار جىلى اياسىندا قاۋىپسىزدىك تالاپتارىنا ساي كەلەتىن 515 جاڭا اۆتوبۋس ساتىپ الۋ ءۇشىن رەسپۋبليكالىق بيۋدجەتتەن اقشا ءبولىندى. جاڭا اۆتوبۋستار قاۋىپسىزدىك بەلدىكتەرىمەن, مەكتەپ سومكەسىنە ارنالعان سورەلەرمەن, ەسىكتەرى اشىق كەزدە قوزعالىستى تەجەيتىن مەحانيزممەن جانە تاعى دا باسقا قاۋىپسىزدىك قۇرالدارىمەن جابدىقتالعان», دەدى وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتى توراعاسىنىڭ ورىنباسارى دۋلات جەكەباەۆ.
كوميتەت توراعاسىنىڭ ورىنباسارى اۆتوبۋستاردى ساتىپ الۋعا بولىنگەن قارجىنى يگەرۋ جەرگىلىكتى اكىمدىكتەردىڭ قۇزىرەتىندە ەكەندىگىن ايتادى. قوعامدىق كولىكتەر ەلىمىزدە قۇراستىرىلاتىن بولعاندىقتان قوماقتى تاپسىرىس وتاندىق ءاۆتووندىرىس سالاسىن دامىتۋعا دا ۇلكەن ۇلەس قوساتىنىنا سەنىمدى. سوزىنشە, ەڭ باستىسى بالالارىمىزعا قاۋىپسىز, جايلى اۆتوبۋستارمەن قاتىناۋعا جاعداي جاسايمىز.
«جاڭا اۆتوبۋستار اقمولا, اقتوبە وبلىستارى سياقتى بىرقاتار وڭىرگە جەتكىزىلىپ, تاراتىلىپ جاتىر. ءبىز ەلىمىزدىڭ بارلىق ايماعىنداعى مەكتەپ اۆتوبۋستارىن كەزەڭ-كەزەڭىمەن جاڭارتامىز. ءبىرىنشى كەزەكتە پروبلەما بار وڭىرلەردى اۆتوبۋسپەن قامتۋدى جوسپارلاپ وتىرمىز. ماسەلەن, 515 اۆتوبۋستىڭ 101-ءى تۇركىستان وبلىسىنا جونەلتىلەدى», دەدى دۋلات جەكەباەۆ.
