«قازاقستاننىڭ مادەنيەت كۇندەرى قازاقستان مەن چەحيا اراسىنداعى ەكىجاقتى بايلانىستاردى نىعايتۋعا ەلەۋلى ۇلەس قوسادى, مۇنداي شارالار ءبىزدىڭ ۋاقىتتا ماڭىزدى. قازاقستان مادەنيەتى كوپ قىرلى جانە بىرەگەي», دەيدى چەحيا مادەنيەت مينيسترلىگى حالىقارالىق قاتىناستار دەپارتامەنتىنىڭ ديرەكتورى پەتر حنيزدو.
چەح كورەرمەندەر ءار ءتۇرلى مۋزىكالىق جانە ونەر ۇجىمدارىنىڭ قويىلىمدارىن تاماشالاۋعا مۇمكىندىك الدى. فەستيۆال اياسىندا «قازىرگى قازاقستان» فوتوكورمەسى, «مەنىڭ وتانىم - قازاقستان» بالالار سۋرەتتەرىنىڭ كورمەلەرى ۇيىمداستىرىلدى.
فەستيۆالدىڭ اشىلۋ سالتاناتى باعدارلاماسىنىڭ كونتسەرتتىك بولىگىندە ورتا ازيا حالىق فولكلورلىق توپتارى, قازاق كۇيلەرىنىڭ ورىنداۋشىلارى ونەر كورسەتتى, ال پراگادا وقىپ جاتقان قازاق ستۋدەنتتەرى بەلگىلى قازاق شىعارمالارىن ورىندادى.
فەستيۆال ەكى اپتاعا سوزىلادى, ونىڭ اياسىندا قازاقتىڭ بەلگىلى قوعام جانە ساياسي قايراتكەرلەرى, اقىن-جازۋشىلار, مەملەكەت قايراتكەرلەرى قانىش ساتباەۆ, جۇسىپبەك ايماۋىتوۆ, شوقان ءۋاليحانوۆ, «الاش» قوعامدىق-ساياسي قوزعالىسىنىڭ جەتەكشىسى احمەت بايتۇرسىنوۆقا ارنالعان دەرەكتى فيلمدەر كورسەتىلەدى جانە قازاقستاننىڭ تاۋەلسىزدىك جىلدارىنداعى جەتىستىكتەرى مەن سەمەي يادرولىق پوليگونىنىڭ جابىلۋىنىڭ 30 جىلدىعىنا ارنالعان فوتوكورمەلەر وتەدى.
