دەنساۋلىق ساقتاۋ ءمينيسترى اجار عينيات 2022 جىلدىڭ ءبىرىنشى جارتىجىلدىعىندا ۇلتتىق جوبانىڭ ءىس-شارالارىن ىسكە اسىرۋ حالىق دەنساۋلىعىنىڭ نەگىزگى كورسەتكىشتەرىن جاقسارتۋعا مۇمكىندىك بەرگەنىن حابارلادى. ماسەلەن, قان اينالىم جۇيەسى اۋرۋلارىنان بولاتىن ءولىم-ءجىتىم 21,4%-عا, قاتەرلى ىسىكتەردەن 8,7%-عا, تىنىس الۋ اعزالارىنىڭ اۋرۋلارىنان 23%-عا جانە تۋبەركۋلەزدەن 12%-عا تومەندەدى. حالىقتىڭ جالپى ءولىم-ءجىتىمى 15,5%-عا ازايدى.
وتكەن كەزەڭدە كۇردەلى جانە جوعارى تەحنولوگيالىق مەديتسينالىق قىزمەتتەردىڭ 80 ءتۇرى بويىنشا 18 مىڭنان استام قىزمەت كورسەتىلدى. ونكولوگيالىق كومەكتىڭ ساپاسىن ارتتىرۋ ءۇشىن گامما-پىشاق جانە يادرولىق مەديتسينا ورتالىقتارى جۇمىس ىستەيدى, وندا 300-دەن استام وپەراتسيا جاسالدى جانە 400-گە جۋىق پاتسيەنت ەمدەلدى.
شالعايداعى اۋىلداردىڭ 1 ملن-نان استام تۇرعىنى ءۇشىن 149 جىلجىمالى مەديتسينالىق كەشەن كونسۋلتاتسيالىق-دياگنوستيكالىق قىزمەتتەر, ءدارى-دارمەك ۇسىنا وتىرىپ, مەديتسينالىق كومەك كورسەتتى. بيىل 10 وڭىردە مەديتسينالىق كومەك كورسەتكەن 2 «جاردەم» جانە «سالاماتتى قازاقستان» مەديتسينالىق پويىزدارىنىڭ جۇمىسى دا قايتا جانداندى.
اجار عينياتتىڭ ايتۋىنشا, جالپى اۋىلدىق ەلدى مەكەندەردى مەديتسينالىق-سانيتارلىق العاشقى كومەكپەن جانە دياگنوستيكامەن قامتۋ جوسپار بويىنشا 47% بولعاندا, 49%-عا دەيىن جەتكىزىلدى. تەگىن مەديتسينالىق كومەكتىڭ كەپىلدىك بەرىلگەن كولەمى اياسىندا جانە مىندەتتى الەۋمەتتىك مەديتسينالىق ساقتاندىرۋ جۇيەسىندە امبۋلاتوريالىق دەڭگەيدەگى مەديتسينالىق كومەكتىڭ كولەمى 56%-عا دەيىن جەتكىزىلدى.
سونداي-اق اۋداندىق اۋرۋحانالاردى زاماناۋي كومپيۋتەرلىك توموگرافتارمەن, رەنتگەن اپپاراتتارىمەن جابدىقتاۋ جالعاسۋدا, استانا جانە الماتى قالالارىندا ەكى عىلىمي-يننوۆاتسيالىق كوپبەيىندى كلينيكا سالىنىپ جاتىر, بىرقاتار وڭىردە 8 بالالاردى وڭالتۋ ورتالىعى اشىلدى.
وڭىرلەردە ۇلتتىق جوبانى ىسكە اسىرۋ بارىسى تۋرالى جامبىل وبلىسىنىڭ اكىمى نۇرجان نۇرجىگىتوۆ پەن شىمكەنت قالاسىنىڭ اكىمى مۇرات ايتەنوۆ باياندادى.
پرەمەر-مينيستر قازىرگى ۋاقىتتا جاڭا دەنساۋلىق ساقتاۋ وبەكتىلەرىن سالۋعا, مەديتسينالىق تەحنيكا ساتىپ الۋعا, زاماناۋي تەحنولوگيالاردى ەنگىزۋگە, كادرلاردى وقىتۋعا قوماقتى قاراجات جۇمسالىپ جاتقانىن ايتتى.
ماسەلەن, قىمبات مەديتسينالىق زەرتتەۋلەر قولجەتىمدى بولدى, بىلتىر ناۋقاستاردى راديوحيرۋرگيالىق ەمدەۋگە ارنالعان ورتالىق ازيا ەلدەرىندەگى تۇڭعىش گامما-پىشاق ورتالىعى اشىلدى, مەديتسينا قىزمەتكەرلەرىنىڭ جالاقىسى ايتارلىقتاي ءوستى.
«مەملەكەت باسشىسىنىڭ تاپسىرماسى بويىنشا «اۋىلدا دەنساۋلىق ساقتاۋدى جاڭعىرتۋ» پيلوتتىق جوباسى ازىرلەنۋدە, 2025 جىلعا قاراي اۋىلدىق ەلدى مەكەندەردە 650 العاشقى مەديتسينالىق-سانيتارلىق كومەك وبەكتىسىن سالۋ كوزدەلىپ وتىر. سونداي-اق 32 اۋداندىق اۋرۋحانا جاڭعىرتىلادى», دەدى ءاليحان سمايىلوۆ.
سونىمەن قاتار پرەمەر-مينيستر تەز ارادا شەشىلۋى ءتيىس بىرقاتار ماسەلەنى قوزعادى. اتاپ ايتقاندا, ۇكىمەت باسشىسى ازاماتتاردىڭ تمككك جانە ءمامس بويىنشا وتىنىشتەرىن ايتتى.
ء«بىرىنشى كەزەكتە دارىگەرلىك كومەكتىڭ كولەمى جەتكىلىكسىز دەپ شاعىم ايتۋدا. دەنساۋلىق ساقتاۋ جانە قارجى مينيسترلىگىمەن بىرلەسىپ, 1 قاراشاعا دەيىن ولاردى قارجىلاندىرۋدى جەتىلدىرۋ جونىندە ۇسىنىستار دايىنداۋدى تاپسىرامىن», دەدى ءا. سمايىلوۆ.
پرەمەر-ءمينيستردىڭ ايتۋىنشا, انا مەن بالا ءولىمىنىڭ كورسەتكىشتەرىن تومەندەتۋ ءۇشىن شۇعىل شارالار قابىلداۋ جانە ايەلدەر مەن جاڭا تۋعان نارەستەلەردىڭ دەنساۋلىعىنا تۇراقتى مونيتورينگ جۇرگىزۋ كەرەك. ودان بولەك, مۇمكىندىگى شەكتەۋلى بالالارعا ۋاقىتىلى وڭالتۋ كومەگىن كورسەتۋگە ەرەكشە نازار اۋدارۋ قاجەت.
«وڭىرلەرمەن بىرلەسىپ, زاماناۋي پەريناتالدىق ورتالىقتار سالۋ جانە بالالار اۋرۋحانالارىن كەرەكتى جابدىقتارىمەن جاراقتاندىرۋ جونىندە شارالار قابىلداۋ قاجەت», دەدى ول.
سونىمەن قاتار پرەمەر-مينيستر سۇرانىسقا يە ماماندىقتار بويىنشا ءبىلىم بەرۋ گرانتتارىنىڭ سانىن ارتتىرۋ ماسەلەلەرىن پىسىقتاۋدى جانە دەنساۋلىق ساقتاۋ جۇيەسىن تسيفرلاندىرۋ بويىنشا جۇرگىزىلىپ جاتقان جۇمىستار اياسىندا مەديتسينالىق اقپارات جۇيەلەرىنىڭ ينتەگراتسيالانۋىن قامتاماسىز ەتۋدى تاپسىردى.
