Digital Nomads IT قوعامداستىعىنا 400 قازاقستاندىق مۇشە. كەزدەسۋدە جاس ماماندار پرەزيدەنتكە ەلىمىزدە IT-سەكتوردى دامىتۋ جولدارىنا قاتىستى ۇسىنىستارىن جەتكىزدى. ال Google-ءدىڭ ينجەنەر-باعدارلاماشى اراي سابىرجان الەمدىك ءىت-كومپانياداعى جۇمىسى تۋرالى بايانداپ بەردى. «الماتى قالاسىنىڭ تۋماسىمىن. 2017 جىلى حالىقارالىق اقپاراتتىق تەحنولوگيالار ۋنيۆەرسيتەتىن ءتامامداپ, كومپيۋتەر سالاسىندا باكالاۆر دارەجەسىن الدىم. 2018 جىلى سان-فرانتسيسكو قالاسىنا كەلىپ, ءبىراز ستارتاپ كومپانيالاردا جۇمىس ىستەدىم. قازىرگى تاڭدا Google كومپانياسىندا ۆيرتۋالدى ماشينالاردىڭ باعدارلاماشىسىمىن», دەدى اراي سابىرجان. قاسىم-جومارت توقاەۆ ارايدىڭ Google كومپانياسىمەن كەلىسىمشارتىنىڭ مەرزىمى تۋرالى سۇرادى. «كەلىسىمشارت تولىق مەرزىمگە جاسالدى», دەپ جاۋاپ بەردى وتانداسىمىز. اڭگىمە بارىسىندا مەملەكەت باسشىسى ءىت سالاسىنداعى بىلىكتى مامانداردىڭ قازاقستانعا دا قاجەت ەكەنىن ايتىپ: «ارينە, اقش-تا جاقسى, بىراق قازاقستان ودان دا كەرەمەت! ءسىز وتانىڭىزدا دا قىزمەت ىستەي الاسىز دەپ ويلايمىن», دەدى.
سونىمەن قاتار كەزدەسۋدە, DCVC كومپانياسىنىڭ ۆەنچۋرلىق ينۆەستورى ءارى ديرەكتورى اننا فوكينا, Booking.com كومپانياسىنىڭ مەنەدجەر-باعدارلاماشىسى الىبەك داتباەۆ ءسوز سويلەدى. وسى ورايدا, الىبەكتىڭ جەتەكشى مەكەمەدەگى قىزمەتى مەن جەتىستىگىن ايتىپ وتكەن ءجون.
– Booking-كە دەيىن مەن اقش-تا تۇرىپ, جۇمىس ىستەدىم. الايدا قىسقامەرزىمدى ۆيزانىڭ ۋاقىتى بىتكەن سوڭ ول ەلدەن كەتۋگە تۋرا كەلدى. قازاقستانعا ورالدىم, بىراق جۇمىسىمدى شەتەلدە جالعاستىرعىم كەلدى. سودان امەريكالىق كومپانيالارعا تۇيىندەمەمدى جىبەرىپ وتىردىم, ۋاقىت ايىرماشىلىعىنا بايلانىستى سۇحباتقا كوبىنەسە تۇنگى ۋاقىتتا ونلاين قوسىلاتىنمىن. جۇمىس ۆيزامنىڭ جوقتىعىنا بايلانىستى كوپ كومپانيا مەنەن باس تارتتى. ءسويتىپ, اقش-تى قويىپ ەۋروپا ەلدەرىن قاراستىردىم. سول كەزدە Booking-تە ونلاين كودتاۋ بايقاۋى ۇيىمداستىرىلىپ, سوعان قاتىستىم. شامالى ۋاقىتتان سوڭ ماعان Booking-ءتىڭ كادر جونىندەگى قىزمەتكەرى حابارلاستى. بىرنەشە سۇحباتتان سوڭ, ولار مەنى باس كەڭسەسىنە شاقىردى, ءتورت كۇندىك ۇشاق پەن قوناقۇيدىڭ اقىسىن وزدەرى تولەدى. وسىلايشا, امستەردامدا ءتۇرلى Booking قىزمەتكەرلەرىمەن تولىققاندى سۇحبات جۇرگىزىلدى. سودان كەيىن شەشىم قابىلداندى. ءۇش كۇننەن كەيىن ولاردان جۇمىسقا شاقىرتۋ الدىم, – دەيدى الىبەك داتباەۆ. قازىر وتانداسىمىز Booking-ءتىڭ بەلدى قىزمەتكەرى, جۇمىسقا ورنالاسقان بويدا ادال قىزمەت ەتۋگە بارىن سالعان.
– قازىرگى جۇمىسىم العاشقى قىزمەتىمنەن بولەك. مەن قازىر مەنەدجەرمىن, باعدارلاما جاسامايمىن, باسقارۋ ماسەلەلەرىمەن كوبىرەك اينالىسامىن. قاراماعىمدا يزرايل, رەسەي, ءۇندىستان, نيدەرلاند, برازيليا, سلوۆەنيا ەلدەرىنەن كەلگەن باعدارلاماشىلار بار. كوماندامىز كوپۇلتتى. نەگىزى كومپانيانىڭ ءبىر عانا IT بولىمىندە 100-دەن استام ۇلت وكىلى قىزمەت ەتەدى. بارلىق كوماندا ءارتۇرلى, ارقايسىسىنىڭ مادەنيەتى دە ءارتۇرلى. بۇل مەنەدجەرلەر ءۇشىن ۇلكەن سىناق, ارينە, مەن ءۇشىن دە. ءار ادامعا جەكە قارىم-قاتىناس قاجەت. مەن ولاردىڭ وسۋىنە, جەكە جانە كاسىبي دامۋىنا جاۋاپتى بولعاندىقتان بۇل قيىن, بىراق قىزىق, – دەيدى الىبەك داتباەۆ.
Digital Nomads جيىنىندا مەملەكەت باسشىسىمەن وتاندىق IT سالاسىنىڭ الەمدىك ترەندتەرى مەن پەرسپەكتيۆالارىن تالقىلاعان كەزدەسۋگە زياتكەرلىك مەكتەپتەردىڭ تۇلەكتەرى ءدىلناز كامالوۆا مەن ازات سۇلەيمەنوۆ تە قاتىسقان ەدى.
ەلورداداعى فيزيكا-ماتەماتيكا باعىتىنداعى NIS تۇلەگى ازات سۇلەيمەنوۆ بەلگىلى امەريكالىق Lucid Motors كومپانياسىنىڭ وزىق موتورلى تەحنولوگيالار كومانداسىندا اعا ينجەنەر بولىپ قىزمەت اتقارادى.
مەكتەپتە ونىڭ سۇيىكتى ءپانى ماتەماتيكا بولدى. 2010 جىلى ازات نازارباەۆ ۋنيۆەرسيتەتىنە وقۋعا ءتۇسىپ, حيميالىق ينجەنەريا ماماندىعى بويىنشا ءبىلىم الدى. وقۋ بارىسىندا وڭتۇستىك كورەيا مەن لوس-اندجەلەستەگى كاليفورنيا تەحنولوگيالىق ينستيتۋتىندا تاعىلىمدامادان ءوتتى. ءوز ماماندىعى بويىنشا وقۋىن بوستون ۋنيۆەرسيتەتىندە جالعاستىردى.
Lucid Motors ستارتاپىنداعى ينجەنەر-مەحانيك لاۋازىمىنا جۇرگىزىلگەن ىرىكتەۋدە بىردەن كوزگە تۇسكەن ازات ەلەكتر قوزعالتقىشىن جاساۋمەن اينالىساتىن كوماندا قۇرامىندا جۇمىس ىستەي باستادى. كەيىن Lucid Motors كومپانياسى ونىڭ كوشباسشىلىق جانە كاسىبي قاسيەتتەرىن نازارعا الىپ, ازاتقا اۆتوكولىكتىڭ تيىمدىلىگىن ارتتىرۋعا ماماندانعان بولىمشەگە اۋىسۋدى ۇسىندى.
ال ءدىلناز كامالوۆا الماتىداعى فيزيكا-ماتەماتيكا باعىتىنداعى زياتكەرلىك مەكتەپتى اياقتادى. ول الەمنىڭ ۇزدىك جوعارى وقۋ ورىندارى – Harvard University, Stanford University, Princeton University, Lehigh University, Rice University, Duke University-دەن رەسمي شاقىرتۋ الدى. زياتكەردىڭ تاڭداۋى ستەندفورد ۋنيۆەرسيتەتىنە ءتۇستى.
ءدىلناز كوپتەگەن حالىقارالىق جانە رەسپۋبليكالىق بايقاۋلاردىڭ جەڭىمپازى. ول – التسگەيمەر اۋرۋىنا شالدىققان ناۋقاستاردىڭ ءومىرىن جەڭىلدەتۋ ءۇشىن جاسالعان «اقىلدى» ءدارى قوبديشاسىنىڭ اۆتورى. بۇل ونەرتابىسى Google Science Fair جۋرنالىنىڭ «20 ۇزدىك يدەيا» تىزىمىنە ەندى. سيليكون القابىندا وتكەن Technovation Challenge بايقاۋىندا جەڭىسكە جەتكەننەن كەيىن ول Google-دىڭ شتاب-پاتەرىندە كورپوراتسيانىڭ باس ديرەكتورى سۋندار پيچايمەن كەزدەستى.
پرەزيدەنتتىڭ جاس ماماندارمەن كەزدەسۋىنەن كەيىن تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين دە پىكىر ءبىلدىردى.
– بۇگىن مەملەكەت باسشىسى قاسىم-جومارت كەمەل ۇلى قازاق جاستارىنىڭ باسىن قوسقان Digital Nomads قاۋىمداستىعىنىڭ مۇشەلەرىمەن كەزدەستى. قاۋىمداستىق الەمنىڭ تۇكپىر-تۇكپىرىندە الپاۋىت تەحنولوگيالىق كومپانيالاردا جۇمىس ىستەپ جۇرگەن قازاقستاندىق IT-مامانداردىڭ باسىن بىرىكتىرىپ وتىر. اتاپ وتەرلىگى, Digital Nomads مينيسترلىكتىڭ باستاماسى بويىنشا قۇرىلعان. بۇگىندە ونىڭ قۇرامىندا 400-دەن استام IT-مامان بار. كەزدەسۋگە جەر-جاھاننان 30-دان استام IT-مامان كەلدى. باسقوسۋ بارىسىندا IT سالاسىنىڭ وزەكتى ماسەلەلەرى تالقىلاندى, اتاپ ايتقاندا, ولاردىڭ قازاقستاندىق مامانداردىڭ جاڭا بۋىنىن دايىنداۋعا كومەكتەسۋى, سپورتتىق باعدارلامالاۋ جانە ۆەنچۋرلىق ينۆەستيتسيالار بويىنشا جوبالاردى ىسكە اسىرىپ جاتقانى تۋرالى ايتىلدى. بۇدان بولەك, Digital Nomads وكىلدەرى شەتەلدىك IT ماتەريالداردى قازاق تىلىنە اۋدارۋعا باعىتتالعان جوبالاردى جۇزەگە اسىرۋدا. وسىلايشا, ولار ەلىمىزدەن جىراقتا بولسا دا, مىڭداعان شاقىرىم جەردە تۇرىپ, قازاقستاننىڭ تۇراقتى دامۋىنا ۇلەستەرىن قوسۋدا. «ۇيىمداسقان ۇتادى» دەگەن قاناتتى ءسوز بار. ءبىر تابىستى مىسالعا توقتالا كەتەيىن. ءبىر كەزدەرى اقش پەن ەۋروپانىڭ جوعارى وقۋ ورىندارىندا ءبىلىم العان ءۇندىستان ازاماتتارى قازاق جاستارى سياقتى وزدەرىنىڭ IT ماماندارىنىڭ قاۋىمداستىعىن قۇرعان بولاتىن. ۋاقىت وتە كەلە وسى توپتان شىققان ءۇندى جاستارى الەمدەگى تانىمال IT-كومپانيالاردا باسشىلىق لاۋازىمداردى يەلەندى. قازىرگى ۋاقىتتا ولار ءوز وتانداستارىنىڭ ستارتاپتارىن قولداي وتىرىپ, وزدەرىنىڭ ەلىنە قوماقتى ينۆەستيتسيا تارتۋدا. مەن قازاق جاستارى دا وتاندىق IT-سالانى قولداي وتىرىپ, تۋعان ەلىمىزدىڭ دامۋىنا قولۇشىن سوزعانىن قالايمىن, – دەدى مينيستر.
اقش-تاعى كەزدەسۋ سوڭىندا قاسىم-جومارت توقاەۆ تا Digital Nomads وكىلدەرىنە تابىس تىلەپ, ولار ەلىمىزدىڭ دامۋى مەن وركەندەۋىنە ەلەۋلى ۇلەس قوساتىنىنا سەنىم ءبىلدىردى.
دۋمان اناش,
گۇلنار جولجان,
«Egemen Qazaqstan»
