دوستوەۆسكي «قۇدايلار ۇلتقا بولىنگەندە, ولار ولەدى», دەيدى. دەمەك ۇلتتى ۇيىستىراتىن – دۇنيەتانىم. ال ونى ازدىراتىن, توزدىراتىن – الاۋىزدىق. اياعى ۇزەڭگىدەن شىقسا دا, تىزەسى جەرگە تيمەگەن الاش جۇرتى ازاپتى عۇمىرى مەن ۇزىنا تاريحىندا باسىنان نەبىر ءداۋىر وتكىزدى. اششىسىن دا, تۇششىسىن دا سارقا تاتتى. اششىسى تۇسىندا جاسقانىپ, تۇششىسى تۇسىندا ماستانىپ كورگەن ەمەس. جەڭىپ تە كوردى, جەڭىلىپ تە كوردى. بىراق وسىنى سەزىنۋ – ساياسي ءومىردىڭ ەڭ ءبىر قيىن ساتتەرىندە بىزگە ءبىر بەرىك رۋحاني مەدەت بولعانداي.
بۇگىنگى اقوردالى قازاقستان كەشەگى التىن وردالاردىڭ تىكەلەي مۇراگەرى. تاۋەلسىزدىك – ىرىس, دامۋدىڭ كەپىلى. ال تىرەگى – بىرلىك. بىراق بۇگىن زامان باسقا. قارۋدىڭ ورنىنا قالام, قالامنىڭ ورنىنا كومپيۋتەر كەلگەن زامان. تەحنولوگيانىڭ ءوزى كۇندە وزگەرىپ, ءوسىپ بارا جاتىر. تولقىندى تولقىن قۋادى, تولقىننان تولقىن تۋادى. الەم اسىعىستا. ءومىردىڭ ءوزى كۇندە وزگەرىپ جاتىر. سوندىقتان, نە ىلگەرى باساسىڭ, نە كەيىن كەتەسىڭ. باسقا جول جوق.
«ساياسات» دەگەن تەرميندى ءبىزدىڭ داۋىرىمىزگە دەيىنگى IV عاسىردا اريستوتەل ەنگىزگەن ەكەن. ول ونى «مەملەكەتتى باسقارۋ ونەرى» دەپ اتاپتى. مىنە, وسى جەردە اينالامىزداعى حالىقارالىق, ىشكى ساياسي احۋالدى, جۇرتىنىڭ مۇڭىن تامىرشىداي تاپ باسىپ وتىرعان مەملەكەت باسشىسى قاسىم-جومارت كەمەل ۇلى توقاەۆ ۇلتىنىڭ ۇنىنە ءۇن قوسا, وي تاستادى.
2019 جىل. «سىندارلى قوعامدىق ديالوگ قازاقستاننىڭ تۇراقتىلىعى مەن وركەندەۋىنىڭ نەگىزى», دەپ اتادى سول كەزدەگى جولداۋىن. 2020 جىل. «جاڭا جاعدايداعى قازاقستان – ءىس پەن قيمىلدىڭ كەزەڭى» دەپ ۇران تاستادى. 2021 جىلى «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» دەپ ورەلى ويىن جالعاستىردى. ال 2022 جىلدىڭ ناۋرىزىندا «جاڭا قازاقستان – جاڭارۋ مەن جاڭعىرۋ جولى» دەپ كورسەتتى. وسىدان بىرنەشە كۇن بۇرىن, 2022 جىلى 1 قىركۇيەكتە «ادىلەتتى مەملەكەت. ءبىرتۇتاس ۇلت. بەرەكەلى قوعام» دەپ ءۇش تاعاندىق قاعيداتتى العا تارتىپ, حالقىن بىرلىككە شاقىردى. تۇجىرىم – بۇل بەس جولداۋ مەملەكەت باسشىسى حالىق پەن مەملەكەت جاعىندا ەكەندىگىن كورسەتتى.
كۇنى كەشە ەلىمىزدە وتكەن الەمدىك جانە ءداستۇرلى دىندەر كوشباسشىلارىنىڭ جەتىنشى سەزىندە ادىلەتتى الەم ماسەلەسىن قوزعادى. ريم پاپاسىن قارسى العان كەزدە مەملەكەت باسشىسى ء«سىز ءبىزدىڭ ەلگە ادامزاتتىق بەتبۇرىس كەزىندە كەلدىڭىز», دەپ پاراساتتى ويىن جالعادى. بەس جولداۋدىڭ ىشىندە حالقىنىڭ بۇكىل مۇڭ-مۇقتاجى قامتىلدى. بىراق سونىڭ ىشىندە 1 قىركۇيەكتەگى جولداۋدىڭ اتاۋىنىڭ ءوزى كوڭىلگە ۇلكەن سەنىم ۇيالاتادى. «ادىلەتتى مەملەكەت. ءبىرتۇتاس ۇلت. بەرەكەلى قوعام». ياعني ادىلەتتى مەملەكەتتە تۇراتىن ءبىرتۇتاس ۇلت بەرەكەلى قوعامعا كەپىل. ارينە, جولداۋدىڭ ىشىندە شوقتىعى بيىك نەبىر شەشىمدەر بار. سونىڭ ىشىندە – حالىق قورىنان كەلەشەك ۇرپاقتارىمىزعا اشىلاتىن ەسەپشوت. كەشەگى الپاۋىتتار پىشاق ۇستىنەن ۇلەستىرگەن ميلليونداعان گەكتار جەر تەلىمى مەملەكەتكە قايتارىلدى. قاڭتار وقيعاسى كەزىندە اسا اۋىر قىلمىس جاساماعاندارعا كەشىرىم جاسالدى.
سونداي-اق الداعى جارتى جىل ىشىندە بيلىكتىڭ بار تارماعى – پرەزيدەنت, پارلامەنت, ۇكىمەت تۇگەلدەي سايلاۋدىڭ سۇزگىسىنەن وتەتىن بولدى. ەڭ عاجابى – مەملەكەت باسشىسى پرەزيدەنتتىك وكىلەتتىك مەرزىمىن قىسقارتىپ سايلاۋعا تۇسكەلى وتىر. ءبىر قاراساڭ, اتالى نار تاۋەكەل. شەشىمى – قاسىم-جومارت توقاەۆ استىنداعى تاعىن ەمەس, حالقىنىڭ باياندى باعىن ويلاعاندىعى دەپ بىلەمىن. كۇنى كەشە قولىنداعى بيلىگىن ءسۇتتى سيىرداي قاتتاپ ساۋعان زامانمەن سالىستىرعاندا. شاكارىم قاجى ايتپاقشى, بۇل ءان بۇرىنعى اننەن وزگەرەك بوپ شىقپاي ما؟! ءدال سولاي!
پرەزيدەنتىمىزدىڭ جوسپارلارى سان سالالى. ارمان-مۇراتتارىن ساپالى باسپالداقتارمەن اكەلە جاتىر. ارينە, مۇنىڭ بارىنە ۋاقىت كەرەك. دەي تۇرعانمەن, پىسىقتالعان, قورىتىندىلانعان دۇنيەلەردىڭ بارلىعىن جۇزەگە اسىرۋعا مۇمكىندىك بەرۋىمىز قاجەت. ءبىزدىڭ مىندەتىمىز – ءبىرتۇتاس سانالى ۇلت, بەرەكەلى قوعام بولىپ, سوزىندە ءپاتۋا, ىسىندە تياناق بار ەل باسشىسىنا ەڭ يگىلىكتى رەفورمالارىن جۇزەگە اسىرۋىنا ماندات بەرۋىمىز كەرەك.
وسىنىڭ بارلىعىن ويلاي, سالىستىرا كەلە, پرەزيدەنت بيلىگىنىڭ مەرزىمىن جەتى جىلعا ءبىر رەتتىك ەتىپ جاساۋدى ۇسىندى. بىرىنشىدەن, جەتى جىل – قازاقتا قاسيەتتى سان. قازاق «جەتىگە كەلگەنشە, جەردەن تاياق جەيسىڭ» دەيدى. بۇل – بالدىرعاننىڭ اياق باسىپ كەتۋ كەزەڭى. ال ەستى, سانالى پەندەگە جەتى جىل اقىل تولتىرۋ, بار تاجىريبەنى ورتاعا سالۋ, حالىقتىڭ مۇڭ-مۇقتاجىنا قۇلاق اسىپ, سودان ناتيجە شىعارۋ. مىنە, وسى ويدىڭ بارلىعى مەملەكەت باسشىسىنىڭ قاپەرىندە. سوندىقتان, وسى شەشىمدى حالىق بولىپ بارلىعى قولداۋدا. سوندىقتان, بۇل شەشىم تۇبەگەيلى اقيقات شەشىم دەپ ويلايمىن. شەشىمنىڭ ەرتەڭى – حالقىمىزدىڭ ريزىعى.
جوعىمىزدى بارداي ەتۋ, بارىمىزدى دارداي ەتۋ – ەلىمىزگە سىن. نايزانىڭ ۇشىن تات باسار, شوقپارلار شوققا تاستالار تولايىم زامانعا دا جەتەرمىز. تاۋەلسىزدىگىمىز باياندى, ەلدىگىمىز ماڭگىلىك بولعاي. تاريحتىڭ تار وتكەلىنەن سۇرىندىرمەي وتكىزگەن بابالار شاپاعاتى بىزگە دە تيگەي. ەلىمىز امان, جۇرتىمىز تىنىش بولسىن, اعايىن!
دوسقان جولجاقسىنوۆ,
قازاقستاننىڭ حالىق ءارتىسى
