كونفەرەنتسيا كوممەرتسيالىق ەمەس ۇيىمدار وكىلدەرىنىڭ, قور دونورلارىنىڭ, ورتالىق جانە جەرگىلىكتى اتقارۋشى ورگانداردىڭ, پارلامەنت وكىلدەرىنىڭ جانە حالىقارالىق ۇيىمداردىڭ قاتىسۋىمەن zoom پلاتفورماسىندا ۇيىمداستىرىلدى.
قورىتىندى كونفەرەنتسيادا قوردىڭ نەگىزگى قىزمەتى جانە ەلىمىزدە قايىرىمدىلىقتى دامىتۋ بويىنشا ۇسىنىستاردى ازىرلەۋ نەگىزىندە جۇرگىزىلگەن جۇمىستىڭ ناتيجەسى تۋرالى ايتىلدى. 1 شىلدەدە باستالعان كونفەرەنتسيا وسى ۋاقىت ىشىندە 1 173 ۇكىمەتتىك ەمەس ۇيىم (ۇەۇ) وكىلدەرىنىڭ قاتىسۋىمەن 43 zoom-كونفەرەنتسيا وتكىزگەن. ۇەۇ-نىڭ ۇسىنىستارىن زەردەلەۋ ماقساتىندا ۇەۇ ءۇشىن ونلاين-ساۋالداما ىسكە قوسىلىپ, وعان 1 041 رەسپوندەنت قاتىسقان. قوردىڭ باسقارما توراعاسى بولات جامىشەۆ جۇرتشىلىق الدىندا قوردىڭ جاڭارتىلعان تۇجىرىمداماسى مەن پروسپەكتىسىن تانىستىرىپ, ۇكىمەتكە ۇندەۋ جانە كونفەرەنتسيا دەكلاراتسياسى قابىلدانعانىن ايتتى. تۇجىرىمدامانىڭ قولدانىستاعى رەداكتسياسىن دايىنداۋدا مەملەكەت باسشىسىنىڭ 11 قاڭتاردا پارلامەنت ءماجىلىسىنىڭ وتىرىسىندا «قازاقستان حالقىنا» قورىن قۇرۋ تۋرالى تاپسىرماسى نەگىز بولعان. قور قايىرىمدىلىق سالاسىندا ءىرى جەكە كاپيتالدىڭ تۇراقتى اعىمىن قامتاماسىز ەتەتىن دونورلىق پەن قايىرىمدىلىق ەكوجۇيەسىنىڭ درايۆەرىنە اينالۋ ءۇشىن قوعامدىق سەكتور ۇيىمدارىنىڭ كومەگىمەن قايىرىمدىلىق باعدارلامالارى ازىرلەنىپ, ىسكە اسىرىلادى.
«قازاقستان حالقىنا» قورى كۇردەلى كەزەڭدەردە حالىقتى ماتەريالدىق-تەحنيكالىق قۇرال-سايماندارمەن جابدىقتاۋ, رەسمي جانە بەيرەسمي ءبىلىم بەرۋدى ىلگەرىلەتۋگە جاردەمدەسۋ, حالىققا الەۋمەتتىك قىزمەتتەر كورسەتۋدىڭ قولدانىستاعى جۇيەلەرىنىڭ تيىمدىلىگىن ارتتىرۋعا قاتىسۋ, الەۋمەتتىك يننوۆاتسيالاردى قولداۋ, ايرىقشا جاعدايلاردا جەكەلەگەن ازاماتتارعا جانە توتەنشە جاعدايلار كەزىندە كەشەندى كومەك كورسەتۋ اياسىندا التى باعىت بويىنشا جۇمىس جۇرگىزەدى.
ينفوگرافيكانى جاساعان امانگەلدى قياس, «ەQ»
كونفەرەنتسيا بارىسىندا اقپارات جانە قوعامدىق دامۋ ۆيتسە-ءمينيسترى دانيار قادىروۆ پەن «قازاقستان حالقىنا» قورىنىڭ قامقورشىلىق كەڭەسىنىڭ توراعاسى قايىربەك سۇلەيمەنوۆ ءسوز السا, پلەنارلىق سەسسيادا قايىرىمدىلىق سالاسىنداعى نەگىزگى ماسەلەلەر جونىندە قوعامدىق قوردىڭ قامقورشىلىق كەڭەسىنىڭ مۇشەسى, Help Today قوعامدىق قورىنىڭ توراعاسى ەلميرا اليەۆا, اۋىلدىق اۋماقتاردى قوعامدىق دامىتۋ قورىنىڭ ۇيلەستىرۋشىسى دانيار توقتارباەۆ, «پوليمەتالل ەۋرازيا» كومپانياسىنىڭ باس ديرەكتورى قانات دوسمۇقامەتوۆ, «بولاشاق ك» قوعامدىق قورىنىڭ ديرەكتورى جىبەك بيسەنوۆا, قوعامدىق دەنساۋلىق ساقتاۋ مەنەدجەرلەرىنىڭ قازاقستاندىق قاۋىمداستىعىنىڭ اتقارۋشى ديرەكتورى اينۇر ايىپحانوۆا ءسوز سويلەدى.
ايتا كەتۋ كەرەك, ۇكىمەتكە جولدانعان ۇندەۋدە الەۋمەتتىك ينفراقۇرىلىمعا, اۋىلدىق مەكتەپتەردەگى ءبىلىم بەرۋدىڭ, ازاماتتاردى وقىتۋدىڭ, الەۋمەتتىك قورعاۋدىڭ, ازاماتتاردىڭ جەكەلەگەن ساناتتارىن نىسانالى قولداۋدىڭ نازارعا الىنۋى قاجەت ەكەنى كورسەتىلدى.
«قازاقستان حالقىنا» قورى وسى ۋاقىتقا دەيىن قاڭتار وقيعاسىندا قازا بولعان اسكەريلەردىڭ وتباسى مەن اسكەريلەر قاتارىندا زارداپ شەككەن 154 ادامعا كومەك كورسەتكەن. جاراقات العان 6 بالانىڭ وتباسىنا قوردان 18 ملن تەڭگە بەرىلگەن. زارداپ شەككەن 19 وتباسىنا 133 ملن تەڭگە بولىنسە, جاپپاي تارتىپسىزدىكتەر كەزىندە قايتىس بولعان 18 ادامنىڭ وتباسىنا 126 ملن تەڭگە كولەمىندە قارجىلاي قولداۋ كورسەتىلگەن. قاڭتار وقيعاسىنان زارداپ شەككەندەر جونىندە: «باس پروكۋراتۋرادان ءتىزىمدى كۇتىپ وتىرمىز. ول تۋرالى پرەزيدەنت تە ايتقان. وسى ايدىڭ ىشىندە باس پروكۋراتۋرا ءتىزىمدى بەرسە, قازا بولعان ادامداردىڭ وتباسىلارىنا 7 ملن تەڭگەدەن بولەمىز», دەدى بولات جامىشەۆ.
ال قاڭتار وقيعاسىنا بايلانىستى باس پروكۋراتۋرانىڭ تىزىمىنە تىركەلمەي وزدىگىنەن كومەك سۇراعاندارعا كومەك بەرىلە مە دەگەن سۇراققا قوردىڭ باسقارما توراعاسىنىڭ ورىنباسارى ءلاززات شىڭعىسباەۆا: «وزدىگىنەن ءوتىنىم بەرەتىندەر كوپ. ءبىز ونى زاڭ جۇزىندە ناقتىلاۋ ءۇشىن باس پروكۋراتۋراعا ءوز حاتىمىزبەن قوسىپ جىبەرەمىز. ولار بىزگە ونىڭ كوتەرىلىسكە قاتىسى بار-جوعىن انىقتاپ, دالەلدەگەن سوڭ عانا كومەك بەرۋ جاعىن قاراستىرامىز», دەدى.
سونىمەن قاتار «قازاقستان حالقىنا» قورى ورتتەن زارداپ شەككەن قوستانايلىقتارعا تۇرعىن ۇيلەرى سالىنىپ بىتكەن سوڭ تۇرمىسقا قاجەتتى زاتتار الىپ بەرۋگە كومەكتەسەتىنىن ايتتى. قور جاڭا ۇيلەردى ينفراقۇرىلىممەن قامتۋعا دا قارجى بولمەك. قور توراعاسىنىڭ ورىنباسارى ءلاززات شىڭعىسباەۆا قورعا 150 ملرد تەڭگە تۇسكەنىن ايتىپ, الايدا قور قورجىنىنداعى وتىنىمدەردىڭ 40%-ى دەنساۋلىق ساقتاۋعا بايلانىستى بولعاندىقتان بۇل سالا ماسەلەلەرىنە باسىمدىق بەرىلىپ, كومەك ەڭ الدىمەن سيرەك كەزدەسەتىن ءدارى-دارمەكتەردى قاجەت ەتەتىندەرگە كورسەتىلەتىندىگىن تىلگە تيەك ەتتى.
ءبىلىم بەرۋگە قاتىستى بارلىق جوبا, ءبىلىم گرانتتارى دا اۋىلدىق جەردەگى وقۋشىلارعا ەسەپتەلسە, بەيىمدەلگەن سپورت جوباسى بويىنشا اۋىلدىڭ دا, قالانىڭ دا بالالارى قاراستىرىلعان. تەك تۇرعىن ءۇي جانە نەسيە تولەمەۋ ماسەلەلەرىنە قاتىستى 40 مىڭ ءوتىنىشى بار «قازاقستان حالقىنا» قورى مادەنيەت سالاسىنا ازىرگە كومەك كورسەتىلمەيتىندىگىن ايتادى.
