مەملەكەت باسشىسى بۇعان دەيىنگى جولداۋىن ساياسي رەفورماعا ارناسا, وسى سوڭعى جولداۋىندا ەلدىڭ الەۋمەتتىك-ەكونوميكالىق دامۋىنا ەرەكشە نازار اۋداردى.
رەفورمالاردىڭ نەگىزگى مازمۇنى – ءبىرىنشى كەزەكتە وسكەلەڭ ۇرپاقتىڭ مۇددەسى, ادامي رەسۋرستاردى دامىتۋ, مەملەكەتتىڭ الەۋمەتتىك قۇرامدى بولىگىن كۇشەيتۋ تاقىرىپتارىن قوزعادى. ياعني مىقتى ءارى بەلسەندى جانە باسەكەگە قابىلەتتى قوعام قۇرۋ ارقىلى تابىستى مەملەكەت قۇرۋ جولىن جالعاستىرۋ.
جولداۋدا پرەزيدەنت ادەتتەگىدەي, قازاقستاندىقتاردىڭ ەڭ وزەكتى ساۋالدارىنا ناقتى جاۋابىن بەردى. بۇل باستاۋ العان ساياسي وزگەرىستەردىڭ جالعاسى. پرەزيدەنتتىڭ ءسوزى مەن ءىسى ءبىر جەردەن شىعاتىنىنىڭ تاعى ءبىر دالەلى – وسى. مەملەكەت باسشىسىنىڭ پرەزيدەنت مانداتىن قىسقارتۋ جانە ۇزاقتىعى 7 جىلدىق ءبىر مەرزىممەن شەكتەۋ جونىندەگى باستاماسى قولداۋ تاپتى. مۇنىڭ ءبارى رەفورمالار باعىتىنىڭ دايەكتىلىگىن جانە ونىڭ ەلدەگى دەموكراتيانى نىعايتۋعا باعىتتالعانىن كورسەتەدى.
مەملەكەت باسشىسى جولداۋدا حالىقتى تولعاندىراتىن بارلىق وزەكتى ماسەلەنى قامتىدى. بۇل سۋ رەسۋرستارىنىڭ جەتىسپەۋشىلىگى, جول جوندەۋ, اۋىلداعى مەديتسينانى دامىتۋ, يگەرىلمەگەن جەرلەردى قايتارۋ جانە تاعى باسقالار.
شىنى كەرەك, ەڭ كۇتپەگەن جاڭالىق – بالالاردىڭ ەسەپشوتىنا ۇلتتىق قوردان اقشا اۋدارىپ وتىرۋ شەشىمى بولدى. 18 جاسقا دەيىن ءار بالانىڭ ەسەپشوتىنا اقشا اۋدارىلىپ, سودان كەيىن بالا ۇلكەن ومىرگە قادام باسقاندا ول اقشانى وقۋعا جانە ءۇي الۋعا جۇمساي الاتىنى ايتىلدى. مۇنداي تاجىريبەنى ءبىز اراب ەلدەرىنەن جانە باسقا دا دامىعان مەملەكەتتەردەن كورەتىن ەدىك. قىزىعىپ قارايتىن ەدىك. بۇل جاڭالىقتىڭ بىزگە كەلگەنى جاستارىمىزدىڭ ۇلكەن ومىرگە ەش قيىندىقسىز قادام باسىپ كەتۋىنە سەپتىگىن تيگىزەدى دەپ ويلايمىن. سەبەبى ءار جاس ءۇشىن ۇلكەن ومىرگە قادام باسقاندا جۇمىسقا ورنالاسۋ, ءۇي الۋ, ۇيلەنۋ دەگەن ماسەلەلەر وزەكتى.
جالپى, بيىلعى جولداۋدا مەملەكەت باسشىسى ەلدىڭ دامۋىنا, رۋحاني جانە ەكونوميكالىق وسۋىمىزگە زيالى قاۋىم وكىلدەرىن بەلسەندى بولۋعا شاقىردى. حالىقتىق, ەلدىك ماسەلەلەردە اۋىزبىرشىلىك پەن ىنتىماقتاستىق تانىتىپ, ەل دامۋىنا ادال قىزمەت ەتۋدە رۋحاني كۇش بەردى.
ەندىگى كەزەكتە, ءبىزدىڭ باستى مىندەتىمىز – جاڭا كەزەڭگە اياق باسىپ, ەلىمىزدىڭ سەنىمدى قورعاۋشىسى مەن قاۋىپسىزدىگىنىڭ تىرەگى بولۋ .
ايتا كەتۋ كەرەك, ۇلتتىق ۇلان اسكەرلەرى ىشكى ىستەر ورگاندارىنىڭ اجىراماس كۇش قۇرىلىمى رەتىندە ۇنەمى جەكە ازاماتتى, قوعام مەن مەملەكەتتى قىلمىستىق جانە باسقا دا زاڭعا قايشى ارەكەتتەردەن قورعاۋدى جۇزەگە اسىرادى. زاڭعا سايكەس ازاماتتاردىڭ جانە مەملەكەتتىڭ قۇقىقتارى مەن بوستاندىقتارىنىڭ كۇزەتىندە تۇرادى. جولداۋدا قۇقىق قورعاۋ ورگاندارىن رەفورمالاۋ تۋرالى ايتىلعان ۇسىنىستاردىڭ بارلىعىن ءبىز مەملەكەت باسشىسىنىڭ الدىمىزعا قويعان تىكەلەي تاپسىرماسى رەتىندە قاراستىرامىز.
ءوز كەزەگىندە, ۇلتتىق ۇلان – قۇقىقتىق ءتارتىپ اسكەرى بولعاندىقتان, ەشقانداي ارانداتۋشىلىققا, ەشكىمگە قوعامنىڭ تۇراقتىلىعى مەن قاۋىپسىزدىگىنە نۇقسان كەلتىرۋگە, مەملەكەتتىڭ تۇعىرىن شايقاۋعا جول بەرمەۋى ءتيىس.
سونداقتان ءبىزدىڭ «باتىس» وڭىرلىك قولباسشىلىعىمىزدىڭ جاۋىنگەرلەرى الداعى ۋاقىتتا دا ءوز قىزمەتتەرىن جوعارى جاۋىنگەرلىك ازىرلىكپەن, جاۋىنگەرلىك مىندەتتەردى تابىستى ورىنداۋمەن, وزدەرىنىڭ اسكەري بورىشىن ابىرويمەن اتقاراتىنىنا نىق سەنەمىن.
باقىت الازوۆ,
«باتىس» وڭىرلىك قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى,
پولكوۆنيك
ورال
