اۋىل شارۋاشىلىعى مينيسترلىگىنىڭ حابارلاۋىنشا, ساقتاندىرۋ ونىمدەرى ءوندىرىستى جۇرگىزۋ ەرەكشەلىگىنە بايلانىستى ينتەنسيۆتى جانە جارتىلاي ينتەنسيۆتى الما باقتارىنا ارنالعان. ينتەنسيۆتى جانە جارتىلاي ينتەنسيۆتى باقتاردا وسىرىلەتىن الما اعاشتارىن وتىرعىزعاننان كەيىن ءۇشىنشى جىلدان باستاپ (ەكى قىستاعان سوڭ), سونىمەن قاتار ىشكى جانە سىرتقى نارىقتاردا جاڭا تەرىلگەن كۇيىندە وڭدەۋگە جىبەرۋ ءۇشىن الما جەمىسىن ساقتاندىرۋعا بولادى.
«الما باقتارىن (اعاشتارىن) ساقتاندىرۋ بۇرشاق, ءورت, قاتتى جەل, قىستا ۇسىك شالۋ, كوكتەمگى جانە كۇزگى ۇسىك شالۋ, نايزاعايدىڭ ءتۇسۋى, شامادان تىس قار جاۋ نەمەسە بۇتاق قابىعىنىڭ مۇزدان زاقىمدانۋى, جابايى جانۋارلاردىڭ زيان كەلتىرۋى نەمەسە جويۋى, بەلگىسىز تۇلعالاردىڭ زاڭدى نەمەسە زاڭسىز ارەكەتى سىندى تاۋەكەلدىڭ ءتۇر-ءتۇرىن قامتيدى. بۇل ءونىم بويىنشا ساقتاندىرۋ ءتاريفى – 0,8 پايىز, ساقتاندىرۋ كەزەڭى – وسى جىلدىڭ 1 قاراشاسىنان كەلەسى كۇنتىزبەلىك جىلدىڭ 31 قازانىنا دەيىن. الما جەمىسىن ساقتاندىرۋ كوكتەمگى ۇسىكتەن, بۇرشاقتان, قاتتى جەلدەن, ورتتەن, نايزاعايدىڭ ءتۇسۋىنىڭ, زيانكەستەر مەن اۋرۋلاردان ەگىنگە كەلەتىن شىعىننان, بەلگىسىز تۇلعالاردىڭ زاڭدى نەمەسە زاڭسىز ارەكەتى سياقتى قاۋىپتەن ساقتايدى. بۇل ءونىم بويىنشا ساقتاندىرۋ ءتاريفى – 11,2 پايىز, ساقتاندىرۋ كەزەڭى – 15 ساۋىردەن 15 قازانعا دەيىن, ەگەر ءونىم 15 قازانعا دەيىن جينالسا, ۋاقىتىنان كەشىكتىرمەۋ قاجەت», دەلىنگەن ۆەدومستۆو حابارلاماسىندا.
«اگرارلىق نەسيە كورپوراتسياسى» اق باسقارۋشى ديرەكتورى ەرلان مولداشەۆتىڭ ايتۋىنشا, بۇل ساقتاندىرۋ, اسىرەسە الماتى, جامبىل, جەتىسۋ جانە تۇركىستان وبلىستارىنىڭ اۋىل شارۋاشىلىعى تاۋار وندىرۋشىلەرى ءۇشىن قولجەتىمدى. باقتاردى وسى جىلدىڭ 31 قازانىنا دەيىن ساقتاندىرىپ ۇلگەرۋ قاجەت. ساقتاندىرۋ باعدارلامالارى بويىنشا ساقتاندىرۋ سىياقىسىنىڭ 80 پايىزى سۋبسيديالاۋ تۇرىندە مەملەكەتتىك قولداۋ ەسەبىنەن تولەنەدى, ياعني فەرمەر ساقتاندىرۋ ءپوليسى قۇنىنىڭ 20 پايىزىن عانا تولەيدى.
باعباندىق بويىنشا ساقتاندىرۋ ونىمدەرىن قارجى نارىعىن رەتتەۋ جانە دامىتۋ جونىندەگى اگەنتتىگىنىڭ ليتسەنزياسى بار «Jusan Garant «سك» اق ساقتاندىرۋ كومپانياسى ەنگىزگەن. بۇعان الەمدىك ساقتاندىرۋ نارىعىندا «ا» رەيتينگىسى بار Swiss Re حالىقارالىق قايتا ساقتاندىرۋ كومپانياسى تارتىلدى. وتاندىق كومپانيا وزىنە الاتىن تاۋەكەلدەردى قايتا ساقتاندىرادى. بۇل ساقتاندىرۋ جاعدايى تۋىنداعان كەزدە كەپىلدەندىرىلگەن تولەمدى قامتاماسىز ەتەدى.
باسقا ساقتاندىرۋ كومپانيالارى وسىمدىك جانە مال شارۋاشىلىعىنداعى بۇرىن ازىرلەنگەن ونىمدەرگە ۇقساس ساقتاندىرۋدىڭ وسى تۇرىنە قوسىلا الادى. بۇل رەتتە ساقتاندىرۋ كومپانيالارى الما باقتارىنا ارنالعان باسقا دا ونىمدەردى ازىرلەۋگە قۇقىلى.
ايتپاقشى, ساقتاندىرۋ ءراسىمىن ءموبيلدى قوسىمشا ارقىلى جۇرگىزۋگە مۇمكىندىك بار. شارت جاساسۋدان تولەمگە دەيىنگى بارلىق ءراسىم اقپاراتتىق تسيفرلىق پلاتفورمادا جۇرگىزىلەدى.
