قازاق جەرىندە وتكەن سەزگە الەمنىڭ تۇكپىر-تۇكپىرىنەن كوپتەگەن ءدىن وكىلىنىڭ قاتىسۋى ولاردىڭ بەيبىتشىلىككە دەگەن ىنتاسىن, قازاقستاننىڭ باياندى بايلانىستىڭ التىن كوپىرى ەكەنىن ايقىنداي ءتۇستى. بۇل الاڭدا قاتىسۋشىلار وي-پىكىرىن ورتاعا سالىپ, ىنتىماقتاستىقتىڭ ىرگەتاسىن نىعايتۋعا جول اشىلماق. ءوزىنىڭ ساپالىق دەڭگەيىن ارتتىرا تۇسكەن بۇل ءداستۇرلى فورۋم – الەمنىڭ ءدىني-ەكونوميكالىق جانە ساياسي ماسەلەلەرى ۋشىعىپ تۇرعان ۋاقىتتا مادەنيەتتەر مەن وركەنيەتتەر اراسىن جالعاپ, ولاردىڭ ءتىل تابىسۋىنا, ءبىر-بىرىمەن ىمىراعا كەلىپ, ىنتىماقتاستىعىن كۇشەيتۋگە باعىتتالعان ءىس-شارا. وتكەن كەزەڭدەردە تۋىنداعان الماعايىپ ساياسي وقيعالار مەن ءدىني قىرعي-قاباق قاقتىعىستار, كوپكونفەسسيالى قوعامداعى پروبلەمالار ءالى كۇنگە دەيىن ءوز شەشىمىن كۇتىپ, وزەكتىلىگىن جويماي كەلە جاتىر. سول سەبەپتى ءداستۇرلى ءدىن وكىلدەرى ءبىر-ءبىرىن جاتسىنباي, دىنارالىق ديالوگ الاڭىندا وزدەرىن تولعاندىرعان ماسەلەلەر تۋرالى ورتاق وي وربىتۋگە نيەتتى.
قازىرگى ۋاقىتتا قازاقستان ديپلوماتيالىق ەلدەردىڭ ءبىرى بولىپ تابىلىپ, ماسەلەلەردى بەيبىت جولمەن شەشۋگە بارلىق مەملەكەتتەردى شاقىرادى. مۇندا ۇلتارالىق جانە كونفەسسياارالىق كەلىسىمدى نىعايتۋ جانە ساقتاۋدىڭ وزىندىك مودەلى قالىپتاستى. ءاربىر كوپۇلتتى مەملەكەتتىڭ باستى باعىتى – ءوزارا تۇسىنۋشىلىك پەن كەلىسىم. ماڭىزدى ءىس-شارادا بەيبىتشىلىك پەن تۇراقتىلىقتى نىعايتۋعا باعىتتالعان ۇسىنىستار جاسالادى. باستىسى – وركەنيەتتەر جانە دىندەردىڭ اراسىنداعى شيەلەنىسۋشىلىك دەڭگەيىن تومەندەتۋگە اسەر ەتەتىنى ءسوزسىز.
اارون فرەنكەل,
ەۆرەيلەردىڭ ەۋرازيالىق كونگرەسىنىڭ ۆيتسە-پرەزيدەنتى
