الەمدىك ساياساتتى باسقاراتىندار بۇل تۋرالى ويلانىپ, جاناشىرلىق تانىتۋعا ءتيىس دەپ سانايمىن. ءدىن كوشباسشىلارى ءوز كەزەگىندە قاقتىعىستار مەن سوعىستاردى الدىن الۋ ءۇشىن ۇندەۋلەر مەن ۋاعىزدار ارقىلى بەيبىتشىلىك پەن ءوزارا قۇرمەتكە نەگىزدەلگەن قوعام قالىپتاستىرۋعا كۇش-جىگەرلەرىن جۇمساۋ قاجەت. قاسيەتتى قۇران كارىمدە ايتىلعانداي «اللا تاعالا جەر بەتىندە ءتارتىپ ورناتتى, سەندەر وندا ز ۇلىمدىق جاساماڭدار». قاسيەتتى كىتاپتا «بارلىق ءدىن ادامزاتقا, قورشاعان ورتاعا دەگەن سۇيىسپەنشىلىك پەن قۇرمەت رۋحىن وياتادى», دەلىنگەن سونداي-اق وندا اپات, داعدارىس پەن سىناقتار تۋرالى ەسكەرتۋ بار.
ءبىز باستان كەشكەن گۋمانيتارلىق داعدارىستار – قاقتىعىستار مەن سوعىستاردىڭ سالدارى. ماسەلەن, ازەربايجان 30 جىلدىق وككۋپاتسيانى اياقتاپ, الەمدىك قاۋىمداستىق مويىنداعان اۋماقتىق تۇتاستىعىن قالپىنا كەلتىرگەننەن كەيىن قاراباقتى جاۋلاپ الۋ كەزىندە جەرلەرى ورتەنىپ, سۋ قويمالارى لاستاندى. ۆانداليزم, زورلىق-زومبىلىق ارەكەتتەرىمەن مادەني جانە رۋحاني مۇرالارى جويىلدى, سانسىز جارىلعان مينالار قازىر حالىقتىڭ اتا-بابالارىنىڭ جەرلەرىنە قايتا ورالۋعا كەدەرگى كەلتىرىپ وتىر.
قازىرگى الەمنىڭ قاۋىپ-قاتەرلەرىن الدىن الۋعا جانە قوعامنىڭ ماسەلەلەرىن شەشۋدە مەملەكەتتىك, قوعامدىق جانە ءدىني قايراتكەرلەردىڭ ىنتىماقتاستىعى ارقاسىندا ناقتى ناتيجەلەرگە قول جەتكىزۋگە بولاتىنىن سەنىممەن ايتامىن. ازەربايجان حالقىنىڭ اتىنان باۋىرلاس قازاقستاننىڭ باسشىسىنا وسىنداي پىكىر الماسۋعا مۇمكىندىك تۋعىزعانى, ماڭىزدى ءىس-شارانى جوعارى دەڭگەيدە ۇيىمداستىرعانى, قوناقجايلىلىق تانىتقانى ءۇشىن زور العىسىمدى بىلدىرەمىن. باۋىرلاستىق رۋحىنداعى كەزدەسۋىمىز بەيبىتشىلىككە, ادىلەتتىلىككە, رۋحاني دامۋعا جانە ادامزاتتىڭ ورتاق مۇددەلەرىنە قىزمەت ەتەدى دەپ سەنەمىن.
شەيح ۋل-يسلام اللاحشۇكىر پاشا-زادە,
كاۆكاز مۇسىلماندار باسقارماسىنىڭ توراعاسى
