مەملەكەت باسشىسى قاسىم-جومارت توقاەۆ: «قازاق پەن دومبىرا – ءبىر-بىرىنەن بولە-جارۋعا بولمايتىن ەگىز ۇعىم. دومبىرا – كونە زاماننىڭ اڭىزدارىنا ارقاۋ بولعان كيەلى اسپاپ. «اقساق قۇلان» كۇيىنىڭ شىعۋ توركىنىن بىلمەيتىن قازاق كەمدە-كەم. ەجەلگى داۋىردەن جەتكەن قاستەرلى دومبىرا ۇرپاقتان-ۇرپاققا ميراس بولىپ كەلەدى. قازاق سان عاسىرلىق شەجىرەسىنىڭ كۋاسى بولعان قاسيەتتى اسپاپتى بويتۇمارىنا بالاعان. قازىرگى تىلمەن ايتساق, بۇل – ءبىزدىڭ ۇلتتىق برەندىمىز», دەگەن ەدى.
«اقىن قادىر مىرزا ءالىنىڭ «ناعىز قازاق قازاق ەمەس, ناعىز قازاق – دومبىرا» دەگەن ءسوزى بار. سوندىقتان بۇگىنگى ءىس-شارانىڭ نەگىزگى ماقساتى – جاس بۋىن وكىلدەرىنىڭ قاتىسۋىمەن «بايتەرەكتىڭ» ەڭ بيىك نۇكتەسىندە قازاقتىڭ دومبىراسىن كۇمبىرلەتىپ, كۇي شەرتۋ. بارىڭىزگە ءمالىم, بيىل مەملەكەت باسشىسى قاسىم-جومارت توقاەۆ بالالار جىلىن جاريالاعان بولاتىن. ءبىزدىڭ دە ماقساتىمىز وسىنداي دارىندى, قابىلەتتى بالالاردى قولداۋ, ءارى قاراي ونەرلەرىن شىڭداۋعا ىنتالاندىرۋ», دەدى «بايتەرەك» مونۋمەنتىنىڭ ديرەكتورى ءادىل ورىنباسار ۇلى.
بايتەرەك 20 جىل بويى ميلليونداعان ادامعا, ەلوردا تۇرعىندارى مەن قوناقتارىنا ەستەن كەتپەس اسەر قالدىرعانى انىق. مونۋمەنت بىرەگەي عيمارات بولا وتىرىپ, ونىڭ تامىرى قازاقستاننىڭ وتكەن تاريحىن قادىرلەيتىن, بۇگىنىنە بەرىك تىرەك بولاتىن جانە نىق ءارى سەنىمدى جۇزەگە اسىرىلىپ جاتقان بولاشاعىن باعالايتىن مەملەكەتتى بەينەلەيدى.
«وسىدان ءبىراز ۋاقىت بۇرىن شاكىرتتەرىمىزبەن تاۋەلسىزدىكتىڭ 30 جىلدىعىنا وراي 30 كۇي ورىنداعانبىز. بۇگىن مىنە, وسى ءداستۇردى ۇزبەي جالعاستىرىپ, ءوزىمىزدىڭ ورتالىقتىڭ جالىندى جاستارىمەن كۇي شاشۋىمىزدى الىپ كەلىپ وتىرعان جايىمىز بار. سەبەبى بۇگىن – مەرەكە. ەلوردانىڭ ەسىگىنەن ەنگەن ءاربىر مەيماننىڭ كەلەتىن كەرەمەت جەرى – «بايتەرەك» مونۋمەنتىنە 20 جىل تولىپ وتىر. «بايتەرەك» تەك قانا ەسىل اۋدانىندا ورنالاسقان قوناقتاردىڭ كەلىپ-كەتەتىن ورنى ەمەس, بۇل مەملەكەتىمىزدىڭ, تاۋەلسىزدىگىمىزدىڭ سيمۆولى دەپ قاراۋىمىز كەرەك. «بايتەرەككە» قاراپ بۇگىنگى بالدىرعاندارىمىز بيىك بولۋعا, اسقاق بولۋعا تالپىنادى. كونە تاريحىمىزدى كوز الدىمىزعا اكەلەتىن قاسيەتتى قارا دومبىرامىز دەسەك, ونى ۇيرەنۋگە, شەرتۋگە قىزىققان بالالارىمىز ەلدىڭ ەرتەڭگى بولاشاعى. قازىرگى جاھاندانۋ داۋىرىندە, ءتۇرلى اقپاراتتار تولاسسىز اعىلىپ جاتقان كەزەڭدە ۇلتىنىڭ ۇلى مۇراسىن ۇلىقتاپ, باباسىنان قالعان باعالى اسپاپتى جانىنا سەرىك ەتكەن جاستار ۇلتتىق يممۋنيتەتپەن قارۋلانسا, ادىلەتتى قازاقستاننىڭ جارقىن بولاشاعىن جاسايدى دەپ ويلايمىن. ءبىزدىڭ ورتالىق تا وسى ماقسات جولىندا ەڭبەك ەتۋدە», دەدى ءانشى, «التىن دومبىرا» ۇلتتىق ونەر ورتالىعىنىڭ كوركەمدىك جەتەكشىسى ەسكەندىر يبراگيم.
ۇيىمداستىرۋشىلاردىڭ سوزىنە قاراعاندا, ءىس-شارانىڭ باستى ماقساتى – وسكەلەڭ ۇرپاققا رۋحاني-ادامگەرشىلىك جانە پاتريوتتىق تاربيە بەرۋ, بەلسەندى ازاماتتىق ۇستانىم مەن ءپاتريوتيزمدى, ماڭىزدى رۋحاني-ادامگەرشىلىك جانە الەۋمەتتىك قۇندىلىقتاردى, قازاق حالقىنىڭ ۇلتتىق ادەت-عۇرىپتارىن دارىپتەۋ. «بايتەرەك» مونۋمەنتىنە قىدىرىپ كەلگەن قالا قوناقتارى دا كۇي تىڭداپ رۋحاني ءلاززات العاندارىن جاسىرمادى.
«بۇگىن ءوزىمنىڭ وتباسىممەن, نەمەرەلەرىممەن «بايتەرەككە» كەلدىم. ىشىنە كىرگەننەن باستاپ قۇلاعىما دومبىرانىڭ ءۇنى كەلدى. جوعارى قاباتقا كوتەرىلگەندە ادەمى كيىنگەن, قولىنا دومبىراسىن ۇستاعان جاستاردى كورگەندە, ولاردىڭ شەرتكەن «بالبىراۋىن», «كەلىنشەك», «ەركە سىلقىم» كۇيلەرىن تىڭداعاندا ءتىپتى تولقىدىم. ۇيالى تەلەفوننان, تەلەديداردان كۇي تىڭداپ ءجۇرمىز عوي, بىراق كورەرمەن بولعان بولەك ەكەن. ەرەكشە اسەر الدىم. ەلوردامىزعا كەلگەن سايىن كەلەتىن «بايتەرەك» مونۋمەنتىنە 20 جىل تولعان ەكەن. وسى ارالىقتا قانشاما قوناق كەلدى دەسەڭىزشى. ەلدىگىمىزدىڭ ەرەكشە سيمۆولى ىسپەتتى قاسقايىپ تۇرعان «بايتەرەگىمىز» بارىمىزگە ماقتانىش سىيلايدى. بۇگىنگى كۇي شەرتكەن بۇلدىرشىندەرگە جارقىن بولاشاق تىلەيمىن», دەدى الماتىدان قىدىرىپ كەلگەن قارلىعاش ەسىمدى قوناق.
