ەكولوگيا, گەولوگيا جانە تابيعي رەسۋرستار ءمينيسترى سەرىكقالي برەكەشەۆ تاياۋدا مەملەكەت باسشىسىنىڭ حالىققا جولداۋىندا بەلگىلەنگەن مىندەتتەردى ورىنداۋ ءۇشىن سۋ سالاسىن دامىتۋدىڭ ءۇش جىلدىق كەشەندى جوسپارى ازىرلەنىپ جاتقانىن حابارلادى.
ونىڭ اياسىندا جاڭا سۋ كودەكسىن ازىرلەۋ باستالدى, ترانسشەكارالىق وزەندەر بويىنشا كەلىسسوزدەر پروتسەسىندە قازاقستاننىڭ پوزيتسياسىن نىعايتۋ جانە سۋ رەسۋرستارىن باسقارۋ جۇيەسىن دامىتۋدىڭ 2023-2030 جىلدارعا ارنالعان تۇجىرىمداماسىن بەكىتۋ جوسپارلانىپ وتىر.
بۇدان باسقا, اۋىل شارۋاشىلىعى وندىرۋشىلەرىن سۋ ۇنەمدەۋ تەحنولوگيالارىن پايدالانۋعا ىنتالاندىراتىن تەتىكتەر ازىرلەنەدى, سۋ شارۋاشىلىعى ينفراقۇرىلىمىن جاڭعىرتۋ جانە سۋ قويمالارىن سالۋ جۇمىستارى جاندانادى, ماگيسترالدىق جانە شارۋاشىلىقارالىق سۋارۋ كانالدارىن بىرىڭعاي تسيفرلىق ەسەپكە الۋ جۇيەسى داميدى.
پرەمەر-مينيستر اتالعان تاسىلدەردى قولداپ, ءار باعىتتى ساپالى پىسىقتاۋدىڭ ماڭىزىن اتاپ ءوتتى. سونىمەن قاتار ءاليحان سمايىلوۆ سالانى دامىتۋدىڭ جاڭا جوسپارىن ازىرلەۋدى جەدەلدەتۋدى جانە ونى وسى جىلدىڭ قاراشا ايىندا قاراۋعا ەنگىزۋدى تاپسىردى.
«سۋ ۇنەمدەۋدى ىنتالاندىرۋدىڭ ءتيىمدى تەتىكتەرىن ازىرلەۋ, كەزەڭ-كەزەڭمەن سۋ قويمالارىن رەكونسترۋكتسيالاپ, سالۋ قاجەت. مىندەتتى تۇردە سۋ رەسۋرستارىن باسقارۋدى تسيفرلاندىرۋ جانە اۆتوماتتاندىرۋ جونىندەگى جۇمىستى كەڭەيتۋ ماڭىزدى, سەبەبى بۇل – وسى سالاداعى تيىمدىلىكتى ارتتىرۋدىڭ نەگىزگى ادىستەرىنىڭ ءبىرى», دەدى ءاليحان سمايىلوۆ.
وتىرىسقا قاتىسۋشىلار اقتوبە, جامبىل جانە تۇركىستان وبلىستارىندا يرريگاتسيالىق جۇيەلەردى قالپىنا كەلتىرۋ بويىنشا ەقدب-مەن بىرلەسكەن جوبالاردى ىسكە اسىرۋدىڭ وزەكتى ماسەلەلەرىن قاراستىردى.
