فوتو: اشىق دەرەككوز
ءىس 1996 جىلعى 24 اقپاندا بولعان وقيعاعا قاتىستى قوزعالعان. سول كەزدە كۋبا اسكەري ۇشاقتارى اقش-تىڭ گۋمانيتارلىق ۇيىمىنا تيەسىلى ەكى ازاماتتىق ۇشاقتى اتىپ تۇسىرگەن.
تەرگەۋ مالىمەتىنشە, ۇشاقتار وڭتۇستىك فلوريدادان كۋبا باعىتىنا ۇشىپ شىققان. اقش تاراپىنىڭ مالىمدەۋىنشە, راۋل كاسترونىڭ بۇيرىعىمەن كۋبالىق جويعىش ۇشاقتار ەسكەرتۋسىز بەيبىت ماقساتتاعى Cessna ۇشاقتارىنا اۋە زىمىراندارىن اتقان. وقيعا سالدارىنان ءتورت اقش ازاماتى قازا تاپقان.
اقش ادىلەت مينيسترلىگى راۋل كاسترو مەن تاعى ءۇش ايىپتالۋشىعا ءولىم جازاسى نەمەسە ءومىر بويىنا باس بوستاندىعىنان ايىرۋ جازاسى تاعايىندالۋى مۇمكىن ەكەنىن مالىمدەدى.
سوڭعى ۋاقىتتا اقش پەن كۋبا اراسىنداعى قارىم-قاتىناس قايتا شيەلەنىسە ءتۇستى. اقش پرەزيدەنتى دونالد ترامپ كۋباداعى قازىرگى بيلىكتى «جاۋدىڭ اسكەري كۇشتەرىنە پانا بەرەتىن مەملەكەت» دەپ اتاپ, ەلدەگى رەجيمدى وزگەرتۋ قاجەت ەكەنىن ايتقان.
ال كۋبا پرەزيدەنتى ميگەل دياس-كانەل ارال مەملەكەتى ەشقانداي قاۋىپ توندىرمەيتىنىن مالىمدەپ, ترامپ ساياساتىن «گەنوتسيدتىك بلوكادا» جۇرگىزىپ وتىر دەپ ايىپتاعان.
قازىرگى كەزدە كۋبادا ەنەرگەتيكالىق داعدارىسقا بايلانىستى نارازىلىقتار جالعاسىپ جاتىر. ساراپشىلار جاعدايدىڭ ۋشىعۋىنا اقش سانكتسيالارى مەن وتىن تاپشىلىعى اسەر ەتكەنىن ايتادى.
