پرەزيدەنت حالىققا ارناعان جولداۋىندا مەكتەپكە دەيىنگى ءبىلىم بەرۋ جۇيەسىنە ايرىقشا كوڭىل ءبولىپ, مەكتەپكە دەيىنگى تاربيە جۇمىسى باستى نازاردا بولۋى كەرەك ەكەنىن ايتتى. ءبىز «بالاپان» باعدارلاماسى ارقىلى 3 پەن 6 جاستاعى بالالاردى بالاباقشامەن 100 پايىز قامتي الدىق. وسىنداي كورسەتكىشكە مەملەكەت-جەكەمەنشىك ارىپتەستىگى نەگىزىندە قول جەتكىزدىك. بىراق مەملەكەت باسشىسى ماسەلە رەتىندە كوتەرگەندەي, ەكىدەن التى جاسقا دەيىنگى بالالاردىڭ جارتىسىنان كوبى عانا بالاباقشاعا بارادى. مۇنداي ولقىلىققا جول بەرۋگە بولمايدى. سول سەبەپتى دە قاسىم-جومارت كەمەل ۇلى بالالاردى بالاباقشامەن قامتاماسىز ەتۋ ماسەلەسىن تۇپكىلىكتى شەشۋدى تاپسىردى. بۇل رەتتە ءبىزدىڭ «قارلىعاش» بالاباقشاسى مەملەكەتتىك ساياساتپەن ۇندەستىكتە جۇمىس ىستەپ وتىر دەپ ايتا الامىن, ويتكەنى ءبىز بالالاردى 2 جاستان باستاپ قابىلدايمىز. ارينە, ەل كولەمىندە وسى ماسەلەنى شەشۋ ءۇشىن كاسىپكەرلىك تاراپىنان دا جاناشىرلىق پەن قولداۋ قاجەت.
كەز كەلگەن سالانىڭ دامۋى ونداعى كادرلاردىڭ كاسىبيلىگىنە تىكەلەي تاۋەلدى. بالالاردى 2 جاستان باستاپ تولىعىمەن مەكتەپكە دەيىنگى بىلىممەن قامتاماسىز ەتىپ, بالاباقشالاردى كوپتەپ اشۋعا قول جەتكىزەرمىز. دەگەنمەن سالاعا بىلىكتى كادرلار تارتپايىنشا جۇيەنى لايىقتى جەتىلدىرۋ قيىنعا سوعادى. ماسەلەنىڭ وسىنداي ەكىنشى جاعىن دا ەسكەرگەن مەملەكەت باسشىسى وسى جولعى جولداۋىندا تاربيەشىلەردىڭ الەۋمەتتىك مارتەبەسىن ارتتىرىپ, جالاقىسىن كوبەيتۋ كەرەكتىگىن, وسى سالاداعى ماماندارعا قويىلاتىن ناقتى تالاپتار بەكىتىلۋگە ءتيىس ەكەنىن اتاپ كورسەتىپ, ولاردىڭ جۇمىس جۇكتەمەسىن دە بىرتىندەپ ازايتقان ءجون بولاتىنىنا نازار اۋداردى. ال تاربيەشىلەردىڭ الەۋمەتتىك مارتەبەسى ارتىپ, جالاقىسى وسسە, كاسىبي كادرلار كوپتەپ تارتىلادى. وسىنداي جۇيەلى جۇمىستىڭ ناتيجەسىندە عانا مەكتەپكە دەيىنگى تاربيە مەن وقىتۋ ساپاسى ارتادى.
بەيبىتگۇل قازاقپاەۆا,
پرەزيدەنت ءىس باسقارماسىنىڭ مەديتسينالىق ورتالىعىنا قاراستى «قارلىعاش» بالاباقشاسىنىڭ ديرەكتورى
نۇر-سۇلتان
