جاڭا مەشىتتى جاڭاارقالىق ابدىشەۆتەر اۋلەتى سالىپ وتىر. جاراتقاننىڭ ماداعىن الۋدى ماقسات ساناعان ولار يمان ورداسىنا بابالارى نايمانتاي مەن بايعوزى باتىرلار ەسىمىن بەرگەندى ءجون ساناعان. ەل-جۇرتى ءۇشىن اتقا قونعان اكەلى-بالالى قوس باتىردى ۇلىقتاۋ ماقساتىندا. مەشىتتىڭ اشىلۋ سالتاناتىنا قازاقستان مۇسىلماندارى ءدىني باسقارماسىنىڭ نايب ءمۇفتيى ەرشات وڭعار, ءدىن سالاسىنىڭ زيالى وكىلدەرى جانە اۋدان باسشىلىعى قاتىستى.
– اكەلى-بالالى قوس باتىردىڭ ەسىمىن ۇلىقتاۋ ماقساتىندا جاڭا مەشىتكە «بايعوزى-نايمانتاي باتىرلار» اتاۋى بەرىلىپ وتىر. قازاقستان مۇسىلماندارى ءدىني باسقارماسى سوڭعى بىرەر جىلدا قازاقتىڭ ارعى-بەرگى تاريحىندا اتى قالعان, تاۋەلسىزدىك جولىندا كۇرەسكەن ازاماتتاردىڭ ەسىمىن مەشىتكە بەرىپ كەلەدى. قازىرگى تاڭدا ەلىمىز بويىنشا 2700-دەن اسا مەشىت بار. بۇگىن, مىنە, قوس باتىردىڭ اتىن جاڭعىرتۋ ماقساتىندا جاڭا قۇلشىلىق ورداسىنا سول كىسىلەردىڭ اتى بەرىلدى. اللانىڭ جەردەگى ءۇيىن سالعان ادامدارعا قاتىستى پايعامبارىمىز (س.ع.س.) ءوز حاديسىندە بىلاي دەيدى: «كىم جەر بەتىندە اللانىڭ جەردەگى ءۇيىن سالۋعا اتسالىسسا, اللا تاعالا ول كىسىگە جۇماقتان ورىن دايىندايدى». يسلام تاريحىندا مەشىت سالۋ – قادىرلى ءىس بولعان, – دەدى ءوزىنىڭ قۇتتىقتاۋ سوزىندە نايب ءمۇفتي.
سالتاناتتى اشىلۋ راسىمىنەن كەيىن جاڭا مەشىتكە جيىلعان جاماعات اراسىندا ۇلتتىق ويىن كورىنىس تاپتى. اس بەرىلىپ, قۇران وقىلىپ, جاماعات ءبىر ساپقا تۇرىپ ناماز وقىدى. كوپشىلىك ىزگىلىكپەن ءىز قالدىرىپ جۇرەتىن ابدىشەۆتەر اۋلەتىنە ريزاشىلىقتارىن جەتكىزدى.
قاسىمحان عالىم,
جۋرناليست
ۇلىتاۋ وبلىسى,
جاڭاارقا اۋدانى
