جوبانى ىسكە قوسۋعا ەكولوگيا دەپارتامەنتىنىڭ, سۋ رەسۋرستارىن پايدالانۋدى رەتتەۋ جانە قورعاۋ جونىندەگى ەسىل باسسەيندىك ينسپەكتسياسىنىڭ, «قازسۋشار» رمك, ەلوردانىڭ بەيىندى باسقارماسىنىڭ, «بۇقتىرما ۋىلدىرىق شاشۋ-ءوسىرۋ شارۋاشىلىعى» جشس وكىلدەرى مەن ەكو-بەلسەندىلەر قاتىستى.
بۇل جوبانىڭ ماقساتى سۋ قويماسىنىڭ ەكوجۇيەسىن قالپىنا كەلتىرۋ جانە بيولوگيالىق مەليوراتسيا ادىسىمەن انتروپوگەندىك جۇكتەمەنى ازايتۋ.
«قامتىلعان پيلوتتىق ۋچاسكەنىڭ اۋدانى اقبۇلاق بۇلاعى سۋ ايدىنىنىڭ جوعارعى بولىگىندە 50 گا قۇرايدى. بۇل ءادىس قوپسىتقىشتا وسىرىلگەن ءبىر كلەتكالى جاسىل بالدىرلاردىڭ «حلورەللا» شتامدارىن قولدانۋدى قامتيدى. سۋسپەنزيا - بالدىرلار جۇزەتىن قورەكتىك ورتا. سۋدىڭ باي جاسىل ءتۇسى مەن فيزيكالىق قاسيەتتەرى بار. ءوسىرۋ ءۇشىن پلانكتوندى شتامدار قولدانىلادى», دەلىنگەن حابارلامادا.
تازارتۋ جانە وڭالتۋ جۇمىستارى كەزىندە حلورەللا كونتسەنتراتسيالانعان سۋسپەنزياسىن پايدالانۋ ناتيجەسىندە سۋ ايدىنىنىڭ ەكولوگيالىق جاي-كۇيى كەلەسى كورسەتكىشتەر بويىنشا جاقسارادى دەپ كۇتىلۋدە:
- سۋ ايدىنىنىڭ فيزيكالىق-حيميالىق كورسەتكىشتەرىن جاقسارتۋ;
- سۋدا ەرىتىلگەن وتتەگى كونتسەنتراتسياسىنىڭ جوعارىلاۋى;
- سۋ ايدىنىنىڭ گيدروبيولوگيالىق كورسەتكىشتەرىن جاقسارتۋ, زووپلانكتون مەن زووبەنتوس سانىنىڭ جانە بيوماسساسىنىڭ ءوسۋى;
- يحتيوفاۋنا سانىنىڭ ارتۋى.
