اۋىلداعى اعايىننىڭ دەنساۋلىعىن دۇرىس كۇتپەيتىنى, وعان لايىقتى مەديتسينالىق ينفراقۇرىلىمنىڭ دا شالعايداعى ەلدى مەكەندەردە دۇرىس جاساقتالماعانى كوپتەن بەرى ايتىلىپ جۇرگەن كوكەيكەستى ماسەلە ەدى. ەل حالقىنىڭ جارتىسىنا جۋىعىن اۋىل حالقى قۇرايتىندىقتان, بۇل جاعدايعا باسا ءمان بەرىپ, جولعا قويۋ وتە ماڭىزدى. اتالعان ماسەلەنى پرەزيدەنتتىڭ قاتىسۋىمەن وتكەن جيىنداردا ءوزىم دە كوتەرگەنمىن. سوندىقتان وسى جولداۋ اياسىندا ناقتى تاپسىرمالار ارقىلى اۋىل مەديتسيناسىن جاقسارتۋ باعىتىندا ىلكىمدى ءىس-شارالار قولعا الىناتىنىنا قۋانىپ قالدىم.
مەملەكەت باسشىسى ايتقانداي, بۇگىندە ەلىمىزدە 650 ەلدى مەكەندە ەمدەۋ مەكەمەسى جوق. بۇل – بىلە-بىلگەنگە ۇلكەن ماسەلە. ويتكەنى وسىنشا اۋىل-ايماقتىڭ حالقى ساپالى مەديتسينادان تىس قالىپ وتىر دەگەن ءسوز. ەندى وسى ولقىلىق جويىلىپ, جولداۋدا جۇكتەلگەن تاپسىرما بويىنشا الداعى ەكى جىلدا بۇل اۋىلداردا مەديتسينالىق جانە فەلدشەرلىك-اكۋشەرلىك بولىمشەلەر سالىناتىن بولدى, سونداي-اق وعان قاجەتتى قۇرال-جابدىقپەن تولىق قامتاماسىز ەتىلەدى. ءوز كەزەگىندە وسى باستاما ارقىلى مەملەكەت 1 ملن-نان اسا ادامنىڭ العاشقى مەديتسينالىق-سانيتارلىق كومەك الۋىنا مۇمكىندىك جاسايدى.
اۋىل-ايماقپەن قاتار اۋدانداعى اۋرۋحانالاردىڭ دا احۋالى اجەپتاۋىر جاقسارادى. ايتالىق, جولداۋدا 32 اۋداندىق اۋرۋحانا زامانعا ساي جاڭارىپ, اۋدانارالىق كوپبەيىندى مەكەمەگە اينالاتىنى ايتىلدى. بۇل اۋرۋحانالاردا ينسۋلتتەن ەمدەۋ ورتالىقتارى, حيرۋرگيا, جانساقتاۋ جانە وڭالتۋ بولىمدەرى اشىلادى. وسىلايشا, 4 ملن-نان اسا ادامعا كورسەتىلەتىن مەديتسينالىق قىزمەتتىڭ ساپاسى ارتادى. سونىمەن قاتار تەلەمەديتسينا باعىتىن دامىتۋ جولعا قويىلىپ, شالعايدا تۇراتىن حالىققا ساپالى مەديتسينالىق قىزمەت كورسەتىلەدى. پرەزيدەنت ايتقانداي, مۇنىڭ ءبارى ۇلت دەنساۋلىعىن ءسوز جۇزىندە ەمەس, ءىس جۇزىندە جاقسارتۋعا باستايدى.
وسى ورايدا ەرىكتى مەديتسينالىق ساقتاندىرۋ جۇيەسىن ەنگىزۋدى دە جاقسى باستاما دەپ اتاپ وتەر ەدىم. سەبەبى مەديتسينالىق ساقتاندىرۋ جۇيەسىنە حالىق تاراپىنان تۋىپ جاتقان ارىز-شاعىم, قىنجىلىستار از بولماي تۇر. باسىنان سىن ارىلماي قويعان بۇل مەديتسينالىق كومەكتىڭ مەملەكەت كەپىلدىك بەرگەن جانە ساقتاندىرۋ پاكەتى دەپ ەكىگە بولىنگەنى اسا ءتيىمدى بولا قويماعانىن ۋاقىت كورسەتتى. مۇنى پرەزيدەنت دۇرىس ايتىپ وتىر. الدا بۇل ماسەلەنىڭ دە وڭ شەشىمىن تاباتىنىنان ۇمىتتەنەمىز.
اباي بايگەنجين,
«ۇلتتىق عىلىمي مەديتسينالىق ورتالىعى» اق باسقارما توراعاسى
