ساحنادا مارجان اراپباەۆا, بەيبىت قورعان, ءمادي قادىروۆ, عادىلبەك جاناي, سونداي-اق «ازيا», «زامان» جانە Kesh You توپتارى جانە وزگە دە انشىلەر ونەر كورسەتتى. كورەرمەن قاۋىم الاڭعا كونتسەرت باستالماي تۇرىپ جينالدى, ولار بي بيلەپ, سۇيىكتى انشىلەرىمەن بىرگە ءان ايتتى.
«قالا تۇرعىندارىن مەرەكەمەن قۇتتىقتايمىز! ەلدىڭ ەگەمەندىگىن نىعايتقان كونستيتۋتسيا – قازاقستان حالقى ءۇشىن ماڭىزدى قۇجات. سونداي-اق بۇگىن ءبىز تاعى ءبىر ەرەكشە كۇندى اتاپ وتەمىز. تاۋەلسىز قازاقستاننىڭ ارحيتەكتۋرالىق سيمۆولىنا اينالعان «بايتەرەك» مونۋمەنتىنىڭ اشىلعانىنا 20 جىل بولدى», دەدى نۇر-سۇلتان قالاسىنىڭ مادەنيەت باسقارماسى ءبولىم باسشىسىنىڭ مىندەتىن اتقارۋشى ناۋرىزبەك ناسىر.
ەلوردا تۇرعىندارى مەن قوناقتارى دا ءبىر-ءبىرىن كونستيتۋتسيا كۇنىمەن قۇتتىقتادى.
«كونتسەرتتەن ءلاززات الۋ ءۇشىن وتباسىمىزبەن بىرگە «بايتەرەك» الاڭىنا ارنايى كەلدىك. مەرەكەلىك كەش بىزگە جاعىمدى كوڭىل-كۇي سىيلادى. ەلىمىزدە ءاردايىم بەيبىتشىلىك پەن اماندىق بولسىن», دەدى ەلوردا تۇرعىنى وتەمىس قوجاباەۆ.
