كاسىبي ماماندار مەن ۆەلوسپورت اۋەسقويلارى 20 شاقىرىمدى ەڭسەردى. 20-شى شاقىرىمدا ءارتۇرلى جاستاعى 700-گە جۋىق ۆەلوشاباندوز قوسشى جاققا قاراي اينالىپ ءوتىپ, ۇركەر (يلينكا) تۇرعىن الابىنىڭ ساياباعىندا مارەگە جەتتى. جارىس اياقتالعاننان كەيىن مارەدە تىركەلگەن ۆەلوسيپەدشىلەر اراسىندا باعالى سىيلىقتار ويناتىلدى.
«جىل سايىن قىستا شاڭعى, ال جازدا ۆەلوسيپەد تەبۋگە قاتىسامىز. ءتۇرلى مارافوندارعا دا قۋانا قاتىسامىز. جۇبايىم 21 كم جۇگىرىپ ءوتتى, ال مەن 10 كم جۇگىردىم. جاقىندا وتباسىمىزبەن «سەن مەنىڭ جۇرەگىمنىڭ چەمپيونىسىڭ» مارافونىنا قاتىستىق. مەنىڭ بالالارىم ەكى شاقىرىم جۇگىردى, ال ءبىز 10 شاقىرىم جۇردىك», دەدى ۆەلوشەرۋگە قاتىسۋشى ايناش جاقىپوۆا.
ۆەلوشەرۋدىڭ باستى ماقساتى - سالاۋاتتى ءومىر سالتىن ناسيحاتتاۋ جانە قالا تۇرعىندارىن بەلسەندى دەنە شىنىقتىرۋمەن, اتاپ ايتقاندا ۆەلوسپورتپەن اينالىسۋعا تارتۋ.
ايتا كەتسەك, بۇل مەرەكە كۇندەرى وتكىزىلگەن جالعىز سپورتتىق ءىس-شارا ەمەس. ەلوردا تۇرعىندارى مەن قوناقتارى ورتالىق ساياباقتاعى شاڭعى-روللەرلىك تراسسادا وتكەن سكانديناۆيالىق ءجۇرىس فەستيۆالىنە دە بەلسەنە قاتىستى.
