مكك ءباسپاسوز قىزمەتى مالىمەتىنشە, بيىلعى 7 ايدا مەملەكەتتىك بيۋدجەتكە سالىق تۇسىمدەرى بويىنشا جوسپار 104,6% ورىندالدى. جوسپار بويىنشا – 7 740,9 ملرد تەڭگە, 352,2 ملرد تەڭگەگە اسىرا ورىندالىپ, ناقتى تۇسكەنى – 8 093,2 ملرد تەڭگە بولعان.
ونىڭ ىشىندە:
- رەسپۋبليكالىق بيۋدجەت 100,3% ورىندالدى (جوسپار بويىنشا – 5 417,9 ملرد تەڭگە, 18,1 ملرد تەڭگەگە اسىرا ورىنداۋمەن 5 436,1 ملرد تەڭگە ءتۇستى), وتكەن جىلعى سايكەس كەزەڭمەن سالىستىرعاندا 1,6 ەسە نەمەسە 1 934,6 ملرد تەڭگەگە ءوستى.
- جەرگىلىكتى بيۋدجەت 114,4% ورىندالدى (جوسپار بويىنشا – 2 323,0 ملرد تەڭگە, 334,1 ملرد تەڭگەگە اسىرا ورىنداۋمەن 2 657,1 ملرد تەڭگە ءتۇستى), 2021 جىلعى سايكەس كەزەڭمەن سالىستىرعاندا 30,6% نەمەسە 622,4 ملرد تەڭگەگە ءوستى.
2021 جىلعى سايكەس كەزەڭىمەن سالىستىرعاندا رەسپۋبليكالىق بيۋدجەتكە تۇسىمدەردىڭ ەڭ كوپ سوماسى كورپوراتيۆتى تابىس سالىعى بويىنشا 731,2 ملرد تەڭگەگە نەمەسە 1,8 ەسە, مۇنايعا سالىناتىن ەكسپورتتىق كەدەن باجدارى بويىنشا 490,7 ملرد تەڭگەگە نەمەسە 1,9 ەسە, ىشكى ءوندىرىس تاۋارلارىنا قوسىلعان قۇن سالىعى 333,9 ملرد تەڭگەگە نەمەسە 1,7 ەسە, ءۇشىنشى ەلدەردەن يمپورتقا قوسىلعان قۇن سالىعى 199,8 ملرد تەڭگەگە نەمەسە 46,0%-عا, ەاەو ەلدەرىنەن يمپورتقا قوسىلعان قۇن سالىعى 90,2 ملرد تەڭگەگە نەمەسە 18,9%-عا جانە پايدالى قازبالار وندىرىسىنە سالىق 71,1 ملرد تەڭگەگە نەمەسە 35,1%-عا وسكەنى بايقالادى.
سونىمەن, 7 ايدا وتكەن جىلعى ۇقساس كەزەڭمەن سالىستىرعاندا نەگىزگى ەكسپورتتىق پوزيتسيالارعا, ونىڭ ىشىندە مۇنايعا 63,3%, مىرىشقا 30,9%, اليۋمينيگە 30,6%, قورعاسىنعا 5,5%, مىسقا 3,2% جانە التىن 2,6% باعانىڭ ءوسۋى بايقالادى. شيكى مۇنايعا سالىناتىن كەدەندىك اكەتۋ باجىنىڭ مولشەرلەمەسى 53,1%-عا ءوستى (1 توننا ءۇشىن ورتاشا مولشەرلەمەسى 2021 جىلعى 7 ايىندا – 57,9$, 2022 جىلعى 7 ايىندا 1 توننا ءۇشىن – 88,6$).
7 ايدا ءۇشىنشى ەلدەرمەن تاۋار اينالىمى 48,9%-عا ءوستى (ەكسپورت 61,1%-عا, يمپورت 21,7%-عا).
وتكەن جىلعى ۇقساس كەزەڭمەن سالىستىرعاندا 2022 جىلعى 6 ايدا وتكىزۋ بويىنشا اينالىم 18,4%-عا ۇلعايدى (51 627 ملرد تەڭگەدەن 61 140 ملرد تەڭگەگە دەيىن).
