بۇيرەك ترانسپلانتاتسياسى سوزىلمالى بۇيرەك جەتكىلىكسىزدىگىنىڭ تەرمينالدىق ساتىسى بار پاتسيەنتتەر ءۇشىن بۇيرەكتى الماستىراتىن تەراپيانىڭ وڭتايلى ءادىسى, الايدا ەمدەۋدىڭ وسى ءادىسىنىڭ تارالۋى بارلىق ەلدە بار دونورلىق ورگانداردىڭ تاپشىلىعىمەن ايتارلىقتاي شەكتەلگەن.
ءتىرى دونوردان بۇيرەك الماستىرۋ – ماسەلەنى جەڭۋدىڭ ناقتى جولدارىنىڭ ءبىرى. 2022 جىلعى 10 تامىزداعى جاعداي بويىنشا قازاقستاندا 3 566 پاتسيەنت دونورلىق ورگانداردى ترانسپلانتاتسيالاۋدى قاجەت ەتەدى, ونىڭ ىشىندە 77 بالا بار. اعزا الماستىرۋعا مۇقتاجدار سانىنا توقتالساق, بۇيرەككە مۇقتاج –
3 154 ەرەسەك ادام, بالالار – 60; باۋىرعا مۇقتاج – 169 ەرەسەك, بالالار – 8; وكپەگە مۇقتاج – 17 ەرەسەك ادام, بالالار جوق; جۇرەككە – 147 ەرەسەك ادام, بالالار – 6; ال 2 ەرەسەك ادامعا, 3 بالاعا «جۇرەك پەن وكپە» قاجەت.
بىرنەشە ساعاتقا سوزىلعان وپەراتسيا بارىسىندا 35 جاستاعى ناۋقاسقا دونورلىق ورگان ءساتتى ترانسپلانتاتسيالاندى. ش. ەسىمدى ناۋقاس «5-ءشى ساتىداعى سوزىلمالى بۇيرەك اۋرۋى» دياگنوزىمەن كەلىپ ءتۇستى, ەكى جىل بويى باعدارلامالىق گەمودياليزدە بولدى. بۇل رەتسيپيەنتتە قان توبىنا سايكەس كەلمەيتىن دونور بولدى. دەسەنسيبيليزاتسيالاۋشى ەم جۇرگىزگەننەن كەيىن پاتسيەنتكە تۋىستىق دونوردان بۇيرەك ترانسپلانتاتسياسى جاسالدى. «دونور-رەتسيپيەنتتىڭ» جاي-كۇيى جۇرگىزىلگەن ارالاسۋلاردىڭ ۋاقىتى مەن اۋىرلىعىنا سايكەس كەلەدى جانە قاناعاتتانارلىق دەپ باعالانادى. قازىرگى ۋاقىتتا ولار بەلسەندى, توسەكتەن تۇرىپ, قوزعالادى. بۇگىنگى تاڭدا رەتسيپيەنت ۇيىنە شىعارىلدى, ولاردىڭ فۋنكتسيالارىن قالپىنا كەلتىرۋ ءۇشىن ترانسپلانتاتسيالانعان ورگانداردىڭ بەلسەندى تەراپياسى جالعاسۋدا.
بۇل تەحنولوگيا وتاندىق ورگانداردى ترانسپلانتاتسيالاۋ ورتالىعىندا داميتىن بولادى.
