ۇلى سۋرەتشى ءابىلحان قاستەەۆ نەسىمەن ءالى كۇنگە وقۋلىقتىڭ بەتىنەن تۇسپەدى دەپ ويلايسىز؟ نەگە الدىمەن قازاق بالاسى قاستەەۆكە قاراپ بوي تۇزەۋى كەرەك؟ سەبەبى ونىڭ شىعارمالارىندا ۇلت رۋحىنىڭ جۇرەگى سوعىپ تۇر. سول سوم جۇرەكتىڭ ءدۇرسىلىن سەزگەن وقۋشى ەل مەن جەرگە دەگەن سۇيىسپەنشىلىگىنەن ءلاززات الادى. ول ءلاززات – دۇنيەدەگى ەڭ اسىل ءلاززات. ءاربىر كومپوزيتسياسىنىڭ ىشىندە قازاق جۇرەدى. دەمى, تىنىسى, قيمىلى, كيىمى, جۇپارى, ءىزى ءبارى-ءبارى كوزگە انىق, كوڭىلگە تانىس كورىنەدى. سەنبەسەڭىز, قاراڭىزشى…
قىلقالام شەبەرىنىڭ 1936 جىلى جازعان «كولحوزدىڭ ءسۇت فەرماسى» كارتيناسى. بۇل كورىنىستەردىڭ شىنايىلىعى سونشاما, ءبىر ءسات ءوزىڭىزدى سول ءبىر قايماعى بۇزىلماعان, تامىلجىعان تابيعات قۇشاعىندا تۇرعانداي سەزىنەتىنىڭىز بار. سىڭسىعان نۋ ورمان, گۇل كومكەرگەن شالعىندى القاپ, سىلدىراي اققان تۇما بۇلاق... ءبارى-ءبارى دە جانىڭا سونشالىقتى جاقىن كورىنىستەر.
ەرتەدە قازاق توپىراعىنىڭ قاي پۇشپاعىنا تابانىڭىز تيسە دە الدىڭىزدان ءدال وسىنداي سۇلۋ تابيعات سىزىلىپ شىعا كەلەتىن. ول جىلدارى تابيعات-انا كەلبەتىنە ءالى قاياۋ تۇسە قويماعان-دى. قاستەەۆ پولوتنولارىنداعى الگى كورىنىستەر – سوندىقتان دا كوزگە ىستىق, كوڭىلگە جاقىن. ال سۋرەتشى كەيىپكەرلەرىنىڭ جۇزدەرى جارقىن, قاناعاتشىل, تاۋبەشىل كەيىپتە بەينەلەنگەن. ادام جانىنىڭ ەڭ ىزگى, ەڭ اياۋلى مەزەتىنەن جىر ءورىپ, ءتۇس بەرىپ, كومپوزيتسيانى شيرىقتىرا تۇسكەن.
بۇل – قايتالانباس قاستەەۆ! بايىرعى قازاق ءومىرىنىڭ قىز-قىز قايناعان شاعى, البىرت كۇننىڭ اسپانىندا تەربەلگەن تىرشىلىك قول بۇلعاپ تۇرعانداي. تابيعاتتىڭ قۇشاعىندا بالقىعان ءتىرى سۋرەت.
