كينەماتوگرافيستەر وداعىنىڭ باسقارما توراعاسى ەرمەك تۇرسىنوۆ جۇرگىزگەن باسقوسۋعا دوسحان جولجاقسىنوۆ, تۇڭعىشباي جامانقۇلوۆ, راشيد نۇعمانوۆ, قانات تورەباي, تاعى باسقا كينو ماماندارى قاتىستى.
كەزدەسۋدىڭ باستى سۇراقتارىنىڭ ءبىرى – كونكۋرستىق ىرىكتەۋگە قاتىسۋشىلارعا ارنالعان قارجىلىق تۇراقتىلىق تالابى. سالا وكىلدەرىنىڭ ايتۋىنشا, بۇل كوپتەگەن كومپانيالاردىڭ مەملەكەتتىك قولداۋعا يە بولۋىنا كەدەرگى كەلتىرەدى.
«بۇل تالاپتى قارجى مينيسترلىگى بەردى. قازىرگى ۋاقىتتا كينووندىرىس وكىلدەرىنىڭ پايداسىنا ماسەلەنى قاراستىرىپ جاتىرمىز. ءبىزدىڭ تاراپىمىزدان كينو مەن جالپى وسى سالانى دامىتۋ ءۇشىن بارلىق كۇش-جىگەر جۇمسالادى», دەدى داۋرەن اباەۆ.
ايتا كەتەيىك, بيىل كونكۋرستىق ىرىكتەۋ قورىتىندىسى بويىنشا 62 كينوجوبا مەملەكەتتىڭ قارجىلاندىرۋىنا يە بولدى. بۇل رەتتە ساراپتامالىق كەڭەستىڭ قۇرامى 80%-عا جاڭارتىلدى. كونكۋرستى وتكىزۋدىڭ اشىقتىعىن قامتاماسىز ەتۋ ءۇشىن قورعاۋدىڭ بارلىق پروتسەسى ونلاين-ترانسلياتسيا ارقىلى جۇرگىزىلدى.
«ەگەر 2020 جىلى مەملەكەت 39 جوبانى قولداسا, بيىل ەكى ەسە كوپ – 62 كارتينا قارجىلاندىرىلدى. پيتچينگ ناتيجەلەرىنە ساي ىرىكتەۋدەن وتكەندەردىڭ كوپشىلىگى – جاس رەجيسسەرلەر. ولار كينو الەمىنە العاش قادام جاساعاندار. ءبىز جاس مامانداردىڭ جارقىراپ تانىلۋلارىنا مۇمكىندىك بەرۋىمىز كەرەك», دەدى مينيستر.
سونىمەن قاتار قاتىسۋشىلار انيماتسيالىق فيلمدەر ءوندىرىسى تۋرالى دا ءسوز قوزعادى. اتاپ ايتقاندا, كينوستۋديا وكىلدەرى ينتەرنەت-كەڭىستىكتە قازاق مۋلتفيلمدەرىنىڭ جوعارى تانىمالدىلىعىن اتاپ ءوتتى.
«مەن وسىعان دەيىن دە بالالارعا ساپالى جانە كورۋگە لايىقتى انيماتسيالىق فيلمدەر قاجەت ەكەنىن ايتتىم. بيىل «قازاقفيلم» كينوستۋدياسىنىڭ بازاسىندا «قازاقانيماتسيا» شىعارماشىلىق بىرلەستىگى قۇرىلادى. جىل سوڭىنا دەيىن كەمىندە ون پيلوتتىق انيماتسيالىق جوبانى ۇسىنۋ جوسپارلانىپ وتىر. مەملەكەت انيماتسيا سالاسىنداعى كرەاتيۆتى يدەيالار مەن جوبالاردى قولداۋعا دايىن. بۇل جۇمىس ءوز جەمىسىن بەرەتىنىنە جانە باسەكەگە قابىلەتتى وتاندىق ءونىم الاتىنىمىزعا سەنىمدىمىن», دەپ اتاپ ءوتتى مينيستر.
سونداي-اق كينو سالاسىنداعى قولدانىستاعى زاڭنامانى وزگەرتۋ ماسەلەسى كوتەرىلدى. داۋرەن اباەۆتىڭ ايتۋىنشا, مادەنيەت جانە سپورت مينيسترلىگى كاسىبي ماماندار مەن تاجىريبەلى ساراپشىلار قاۋىمداستىعىمەن بىرلەسىپ, زاڭنامالىق بازاعا تۇزەتۋلەر مەن ۇسىنىستار ەنگىزۋ باعىتىندا جۇمىس ىستەۋگە دايىن.
