«قازاتومونەركاسىپتىڭ» ءوندىرىس جونىندەگى باس ديرەكتورى, باسقارما توراعاسىنىڭ مىندەتىن اتقارۋشى ەرجان مۇقانوۆتىڭ ايتۋىنشا, كومپانيانىڭ 2022 جىلدىڭ ءبىرىنشى جارتىجىلدىقتاعى ءتۇسىمى 500 ملرد تەڭگەگە جۋىق سومانى قۇراعان. بۇل تۋرا ءبىر جىل بۇرىنعى كورسەتكىشتەن ەكى ەسە جوعارى.
– ءتۇسىمنىڭ ءوسۋى وپەراتسيالىق تابىستىڭ شامامەن 182 پايىزعا ۇلعايۋىنا جانە تۇزەتىلگەن تازا تابىستىڭ ءىس جۇزىندە ءۇش ەسە, ياعني 167,4 ملرد تەڭگەگە دەيىن وسۋىنە الىپ كەلدى. وسىدان-اق بىلتىر ۋران نارىعىنداعى احۋالدىڭ بيىل ەداۋىر جاقسارعانىن بايقاۋعا بولادى. سونداي-اق وسى جىلدىڭ ءبىرىنشى جارتىجىلدىعىندا سۇرانىستىڭ ارتۋىنا بايلانىستى ساتۋ كولەمى دە ۇلعايدى, – دەپ ناقتىلادى ە.مۇقانوۆ.
دەسە دە بيىلعى جىلدىڭ سوڭىنداعى ءوندىرىستىڭ قورىتىندى كولەمى نىسانالى ماندەردەن تومەن بولۋى مۇمكىن. مۇنداي تاۋەكەل ءالى دە ساقتالىپ وتىر. الايدا ۇلتتىق كومپانيا بيىلعا ارنالعان ۋران ءوندىرۋ جوسپارىن قالايدا ورىنداۋعا بەيىلدى ءارى تاۋەكەلدەردى تومەندەتۋ ءۇشىن ءتيىستى جۇمىستاردى جالعاستىرا بەرمەك.
– جاھاندىق ەكونوميكاداعى بەلگىسىزدىك جانە 2022 جىلدىڭ ءبىرىنشى جارتىسىنداعى گەوساياسي وقيعالار تاۋەكەلدەردى باسقارۋ جونىندەگى ىشكى جۇيەلەردىڭ سىناعىنا اينالدى. كومپانيانىڭ تاۋەكەلدەردى باسقارۋ تاجىريبەسى بىرنەشە نەگىزگى سالادا ءوز سەنىمدىلىگىن كورسەتتى. الايدا بەلگىسىزدىك پەن تاۋەكەلدەر كومپانيانىڭ وندىرىستىك جانە بيۋدجەتتىك جوسپارلاۋ پروتسەستەرىنىڭ كۇردەلەنۋىنە الىپ كەلىپ, شەشىم قابىلداۋعا ايتارلىقتاي اسەر ەتتى. كومپانيانىڭ نارىقتىق سۇرانىسى مەن كەلىسىمشارتتىق مىندەتتەمەلەرىنە سايكەس ءوندىرىس كولەمىن جوسپارلاۋمەن قاتار, قازىرگى جاعدايدا ءوسىپ كەلە جاتقان ينفلياتسيالىق قىسىمدى جانە وندىرىستىك جەتكىزىلىم تىزبەگىندەگى ىقتيمال كىدىرىستەردى ەسكەرۋ قاجەتتىلىگى تۋىندادى. بۇل ءبىزدىڭ وندىرىستىك جوسپارلارىمىزعا دا اسەر ەتۋى ابدەن ىقتيمال, – دەيدى باسقارما توراعاسىنىڭ مىندەتىن اتقارۋشى.
ە.مۇقانوۆتىڭ پىكىرىنە قاراعاندا, ۋران نارىعىنىڭ جاقسارۋى جانە قىسقا مەرزىمدى نارىقتاعى بەلسەندىلىكتىڭ تومەندەۋى اياسىندا ۇزاق مەرزىمدى كەلىسىمشارتتارعا قىزىعۋشىلىق ءوسىپ كەلەدى. سونداي-اق باعا بەلگىلەۋدىڭ ايتارلىقتاي جاقسارۋىنا قاراماستان, سۇرانىس پەن ۇسىنىس بالانسىنىڭ ىرگەلى جىلجۋى ەكىنشى جەتىكىزىلىم قورلارىنىڭ شەكسىزدىگى جايلى قاتە بولجامدارعا بايلانىستى ءالى اياقتالعان جوق.
– بۇل «قازاتومونەركاسىپ» سەكىلدى ءتارتىپتى وندىرۋشىلەرگە مۇمكىندىك تۋعىزادى. وسىلايشا, ءبىزدىڭ نارىققا باعىتتالعان ستراتەگيامىزعا سايكەس جانە كەن ورىندارىن يگەرۋ مەن وندىرۋدەگى قازىرگى قيىندىقتاردى ەسكەرە وتىرىپ, ءوندىرىس كولەمىن شامامەن جەر قويناۋىن پايدالانۋعا ارنالعان كەلىسىمشارتتار شەڭبەرىندە ءوندىرۋدىڭ جوسپارلانعان دەڭگەيىمەن سالىستىرعاندا 10 پايىزعا قىسقارتۋدى جالعاستىرامىز. 2023 جىلعا جوسپارلانعان دياپازونمەن سالىستىرعاندا 2024 جىلى شامامەن 2-3 مىڭ توننا ۋران ءوندىرۋدىڭ الەۋەتتى ۇلعايۋىن جوسپارلاپ وتىرمىز, – دەدى ول.
سوڭعى بىرنەشە جىلدا جاھاندىق كومىرتەگى بەيتاراپتىعىنا قول جەتكىزۋ ءۇشىن ەنەرگەتيكالىق ينفراقۇرىلىمنىڭ قوعامدىق جانە ەكولوگيالىق سالدارلارىن حالىقارالىق دەڭگەيدە تالقىلاۋ, اتوم ەنەرگەتيكاسى ءۇشىن وپتيميستىك بولجامدار مەن ۋران نارىعىنىڭ كونيۋنكتۋراسىن جاقسارتۋعا ىقپال ەتەتىن اجىراماس فاكتورى بولدى. بۇل ماسەلەلەر رەسەي-ۋكراينا قاقتىعىسى اياسىندا ەنەرگەتيكالىق قاۋىپسىزدىككە جانە ەنەرگيا كوزدەرىن ارتاراپتاندىرۋعا كوبىرەك كوڭىل ءبولۋ اياسىندا ودان دا وزەكتى بولا ءتۇستى.
– ءتۇرلى يۋريسديكتسيالار, سونىڭ ىشىندە بۇرىن يادرولىق ەنەرگەتيكادان باس تارتۋ تۋرالى شەشىم قابىلداعاندار نەمەسە ونى كەزەڭ-كەزەڭىمەن تومەندەتۋ جوسپارىن ۇستانعاندار وسى باعىتتاعى ساياساتتى قايتا قاراستىرۋدا. ال كەيبىر جاعدايلاردا اتوم ەنەرگەتيكاسىن جاڭارتىلاتىن ەنەرگيا كوزدەرىنە كوشۋ ستراتەگياسىنىڭ قۇرامداس بولىكتەرىنىڭ ءبىرى رەتىندە قاراستىرادى. يادرولىق ەنەرگەتيكانى قولداۋداعى وسىنداي ىلگەرىلەۋ قازبالى وتىن ءوندىرىسىنىڭ قورشاعان ورتاعا تەرىس اسەرىن بولدىرماۋعا مۇمكىندىك بەرىپ قانا قويماي, تۋىنداعان الەۋمەتتىك تاۋەكەلدەر مەن ەنەرگەتيكالىق قاۋىپسىزدىكپەن بايلانىستى تاۋەكەلدەردى جۇمسارتۋعا دا كومەكتەسەدى, – دەيدى ە.مۇقانوۆ.
