اۋىل شارۋاشىلىعى باسقارماسىنىڭ باسشىسى اسقار ساناۋباروۆ جىل باسىنان بەرى وبلىستا 3 494 گا جىرتۋعا جارامدى جەر پايدالانۋعا بەرىلگەنىن ايتادى. مۇنىمەن قاتار شارۋاشىلىقتاردىڭ سانى دا ارتىپ كەلەدى. مىسالى, بيىل قاتارعا جاڭادان 6 اۋىلشارۋاشىلىق قۇرىلىمى قوسىلعان. بۇلار نەگىزىنەن ءداندى داقىلدار, كارتوپ, كوكونىس, مايلى جانە جەمشوپ داقىلدارىن وسىرۋمەن اينالىسادى.
قازىرگى تاڭدا مەملەكەت داقىلداردىڭ ونىمدىلىگىن ەكى-ءۇش ەسەگە ارتتىراتىن سۋارمالى ەگىنشىلىكپەن شۇعىلداناتىن كاسىپكەرلەرگە بارىنشا كومەكتەسىپ وتىر. ناقتى ايتقاندا, جابدىقتاردى ساتىپ الۋعا جانە سۋارمالى سۋدى جەتكىزۋگە سۋبسيديالار بولەدى. مىسالى, بيىلدىڭ وزىندە اۋىل شارۋاشىلىعى تاۋارلارىن وندىرۋشىلەرگە سۋ بەرۋ قىزمەتىنە ارناپ 206,1 ملن تەڭگە قاراستىرعان.
وبلىستىڭ بۇقار جىراۋ اۋدانىنداعى «بايمىرزا-اگرو 2018» جشس-نىڭ ديرەكتورى ماكسيم بۋكاەمسكي جاڭبىرلاتىپ سۋارۋ تەحنيكاسى مەن تىڭايتقىشتاردى ساتىپ الۋعا بولىنگەن سۋبسيديانىڭ دەر كەزىندە كورسەتىلگەن زور كومەك ەكەنىن ريزاشىلىقپەن ايتادى.
– بىزدە جوسپارلى كەڭەيتۋ ءجۇرىپ جاتىر. جىل سايىن شاشىراتقىش ماشينالار ساتىپ الامىز. باسىندا مۇنداي ەكى ماشينا تەك كارتوپ ءۇشىن عانا بولدى. ال قازىر سۋارمالى جۇيە ءداندى داقىلدار القابىندا دا بار, – دەيدى ول.
نەگىزىندە «بايمىرزا-اگرو 2018» جشس ءاۋ باستان سۋارمالى ەگىنشىلىكپەن اينالىسۋ ماقساتىندا قۇرىلعان ەدى. كاسىپورىن 2018 جىلدىڭ كۇزىندە سۋارۋ جۇيەسى, سىرتقى ەلەكترمەن جابدىقتاۋ, سۋارۋ قۇبىرى, سۋارۋ تەحنيكاسىن ساتىپ الىپ, بىرنەشە جوبانى بىردەن باستاپ كەتكەن بولاتىن.
قازىر «بايمىرزا-اگرو 2018» شارۋاشىلىعىندا 25 ادام تۇراقتى جۇمىس ىستەپ, ناپاقاسىن تاۋىپ ءجۇر. بۇدان بولەك, جۇمىسشى سانى ماۋسىم كەزىندە 70-كە دەيىن جەتەدى. بۇگىندە ماكسيم بۋكاەمسكي سۋارمالى ەگىستىك سالاسىنىڭ اسا بىلگىر مامانىنا اينالعان. ول بۇل ءىستى باستاعان العاشقى جىلدارى كارتوپ ەگىپ, شارۋاشىلىقتا اينالمالى ارەكەت ەتەتىن جاڭبىرلاتقىش ماشينالاردى قولدانعان.
– قوندىرعىلار داقىلداردىڭ بارلىق ءتۇرىن سۋارادى جانە سۋارۋدىڭ بىركەلكىلىگىن قامتاماسىز ەتەتىن ارنايى ساپتامالارى بار. سۋ ەلەكتر سورعىلارى بار بەتوندالعان اۆانكامەرالاردان الىنادى. ول جابىق قۇبىرلار ارقىلى وتەتىندىكتەن, شىعىنى مەيلىنشە از بولادى. قازىر بىزدە التى بۇرىككىش بار. كەلەسى جىلى تاعى ەكەۋىن ساتىپ الامىز. سۋارمالى ەگىستىك القابىن 600 گەكتارعا دەيىن ۇلعايتقىمىز كەلەدى, – دەيدى بولاشاققا سەنىممەن قاراعان كاسىپورىن باسشىسى.
ءيا, سوڭعى جىلدارى ماكسيم بۋكاەمسكي جەتەكشىلىك ەتەتىن شارۋاشىلىقتا ەگىس القاپتارى كەڭەيىپ كەلەدى. مىسالى, 2022 جىلى تاعى 126 گەكتار سۋارمالى جەر قوسىلىپ, قازىرگى ۋاقىتتا 266 گەكتارعا كارتوپ, 70 گەكتارعا بيداي, 50 گەكتارعا بۇرشاق, 90 گەكتارعا ارپا, 210 گەكتارعا ءداندى, بۇرشاق جانە مايلى داقىلدار تۇقىمى سىڭىرىلگەن. شارۋاشىلىق ەليتالىق تۇقىم تۇرلەرىن رەسەي مەن گەرمانيانىڭ جانە وزىمىزدەگى مامانداندىرىلعان شارۋاشىلىقتاردان ساتىپ الادى.
سۋارمالى ەگىنشىلىك تۇرلەرىن دامىتۋ بۇگىنگى كۇننىڭ تالابى بولىپ تۇر. ونىڭ ۇستىنە بۇل ىسكە مەملەكەتتىڭ وڭ كوزبەن قاراپ, بارىنشا قولداۋ كورسەتىپ وتىرعانى دا سەنىمدى كۇشەيتە تۇسەدى. ولاي بولسا, بۇل ىسكە بىلەك سىبانا كىرىسكەن شارۋانىڭ تاسى ورگە دومالاماي قويماس دەپ سەنىممەن ايتۋعا بولادى.
قاراعاندى وبلىسى
