اقشا-كرەديت ساياساتى دەپارتامەنتى ديرەكتورىنىڭ ورىنباسارى دەنيس چەرنياۆسكيدىڭ ايتۋىنشا, بيىل ەكىنشى توقساندا اۋىل شارۋاشىلىعىندا, وڭدەۋ ونەركاسىبىندە جانە ساۋدادا سۇرانىسقا بايلانىستى جاعداي جاقسارادى دەگەن ءۇمىت بار. ال تاۋ-كەن ءوندىرۋ ونەركاسىبى مەن كولىكتە جانە قويمادا ساقتاۋ سالاسىندا سۇرانىس ءوسىمى ءبىرشاما باسەڭدەمەك.
«ەكىنشى توقساندا شيكىزات پەن ماتەريالدار باعاسىنىڭ ءوسۋ قارقىنى جەدەلدەگەنى بارلىق سالادا سەزىلدى. وندىرىستىك قۋاتتى جۇكتەۋدىڭ جالپى دەڭگەيى كوتەرىلدى. اناعۇرلىم جوعارى كورسەتكىش قۇرىلىستا بايقالدى. باسەكەلەستىكتەگى ماڭىزدىلىقتىڭ جوعارى دەڭگەيى بۇرىنعىسىنشا ساقتالىپ قالدى. نارىقتىق باسەكەنىڭ ىقپالىنا ءجيى تۇسەتىندەر – ساۋدا كاسىپورىندارى. دوللار مەن رۋبل – شەتەلدىك ارىپتەستەرمەن ەسەپ ايىرىسۋدا پايدالانىلاتىن نەگىزگى ۆاليۋتا. دوللار كەن ءوندىرۋ ونەركاسىبىندە ەسەپ ايىرىسۋدا باسىم (كاسىپورىنداردىڭ 62,1 پايىزى) بولسا, وڭدەۋ ونەركاسىبىندە كاسىپورىنداردىڭ 64,9 پايىزى, ساۋدادا 58,4 پايىزى ءرۋبلدى پايدالانادى», دەدى د.چەرنياۆسكي.
كوپتەگەن كاسىپورىننىڭ پىكىرى بويىنشا, ەكىنشى توقساندا بيزنەستى جۇرگىزۋگە نەگىزگى كەدەرگى بولعان فاكتور – قازاقستان ەكونوميكاسىنىڭ جاعدايى. ساۋدا كاسىپورىندارى ءۇشىن ەڭ ماڭىزدى شەكتەۋشى فاكتورلاردىڭ ءبىرى – باسقا كاسىپورىندار تاراپىنان تۋىندايتىن نارىقتىق باسەكەلەستىك.
«وڭدەۋ ونەركاسىبىنىڭ 26,4 پايىزى جانە اۋىل شارۋاشىلىعى كاسىپورىندارىنىڭ 31,3 پايىزى بىلىكتى كادرلاردىڭ جەتكىلىكسىزدىگىن اتاپ ءوتتى. الداعى 12 ايدا بارلىق سەكتور بويىنشا قارجىلاندىرۋ دەڭگەيى جالپى وزگەرىسسىز قالادى, سونىمەن بىرگە كەن ءوندىرۋ ونەركاسىبى جانە اۋىل شارۋاشىلىعى جانە وڭدەۋ ونەركاسىبى مەن كولىك سالاسى كاسىپورىندارىندا قارجىلاندىرۋدىڭ ەڭ ۇلكەن ءوسىمى, ساۋدا سالاسىندا جانە قۇرىلىستا ەڭ تومەن ءوسىمى كۇتىلۋدە. ينۆەستيتسيا كولەمىن تومەندەتۋدى جوسپارلاپ وتىرعان كاسىپورىنداردىڭ ەڭ جوعارى ۇلەسى قۇرىلىستا جانە وڭدەۋ وندىرىسىندە, ال ەڭ تومەن ۇلەسى ساۋدا سالاسىندا كۇتىلۋدە. قاراستىرىلىپ وتىرعان سالانىڭ بارىندە ينۆەستيتسيانى ارتتىرۋدى جوسپارلاپ وتىرعان كاسىپورىندار ۇلەسىنەن, ونى تومەندەتۋدى جوسپارلاپ وتىرعانداردىڭ ۇلەسى ارتىق», دەلىنگەن ۇلتتىق بانك بايانداماسىندا.
سونىمەن قاتار ساۋدا, قۇرىلىس جانە وڭدەۋ سالاسىنان باسقا بارلىق سالا بانك نەسيەسىنە قول جەتكىزۋ تۇرعىسىنان قيىندىققا ۇشىراعان. كرەديتتەۋ شارتتارىن قولايسىز دەپ ەسەپتەيتىن كاسىپورىنداردىڭ ەڭ كوپ ۇلەسى – اۋىل شارۋاشىلىعى سالاسىندا (18,5 پايىز). كولىك جانە قويمالاۋ سالاسىندا ولاردىڭ ۇلەسى ەڭ تومەنگى دەڭگەيدە (10,9 پايىز). 2022 جىلدىڭ ءۇشىنشى توقسانىندا نەسيە الۋعا نيەتتى كاسىپورىنداردىڭ ەڭ كوپ ۇلەسى وڭدەۋ ونەركاسىبى مەن ساۋدا سالاسىندا (20,5 پايىز جانە 16,6 پايىز, سايكەسىنشە), ەڭ تومەن ۇلەسى – تاۋ-كەن ونەركاسىبى مەن كولىك جانە قويمالاۋ سالاسىندا (7,8 پايىز جانە 8,2 پايىز) بولادى دەپ كۇتىلەدى.
