تامىز ايىندا الماتى وبلىسى, ەڭبەكشىقازاق اۋدانى, وليمپيادالىق دايارلاۋ ورتالىعىندا جالپى دەنە دايىندىعى بويىنشا جاتتىعۋ جاساپ, سپورتشىلار فيزيكالىق تۇرعىدان شىنىققان بولاتىن.
كەزەكتى وقۋ-جاتتىعۋ جيىنى 7-20 تامىز ارالىعىندا جامبىل وبلىسى, تاراز قالاسىنداعى «اتلەتيك» سپورت بازاسىندا ءوتتى. بۇل وقۋ-جاتتىعۋ جيىنىندا سپورتشىلار ارنايى دايىندىقتان ءوتىپ, اتتارمەن بىرگە جاتتىعۋ جاسادى.
كوكپاردان باس جاتتىقتىرۋشى قۋانىشبەك قۇراماەۆ ۇلتتىق قۇراماداعى 24 سپورتشىنى جان-جاقتى دايىندىقتان وتكىزۋدە. قۇرامادا ەلىمىزدىڭ بارلىق وڭىرىنەن مىقتى سپورتشىلار قامتىلعان.
ۇلتتىق قۇرامانىڭ ساپىندا كوكپاردان قر ەڭبەك سىڭىرگەن سپورت شەبەرى ابىلايحان نىشانبەكوۆ, كوكپاردان ازيا چەمپيونى - قۇرمانبەك تۇرعانبەك سىندى بەلدى شاباندوزدار بار. سونداي-اق, ەلىمىزدىڭ نامىسىن نۇرقاسقا, بۇركىت, زاڭعار, نايمان, كامپيت, قارشىعا سىندى ۇزدىك اتتار قورعايدى.
اتالعان وقۋ-جاتتىعۋ جيىندارى IV دۇنيەجۇزىلىك كوشپەندىلەر ويىندارىنا باعىتتالعان. كوشپەندىلەردىڭ ءداستۇرى مەن جاۋىنگەرلىك رۋحىن جاڭعىرتقان IV دۇنيەجۇزىلىك كوشپەندىلەر ويىندارى تۇركيانىڭ يزنيك قالاسىندا 29 قىركۇيەك پەن 2 قازان ارالىعىندا وتەدى.
قازىرگى تاڭدا «ۇلتتىق جانە ات سپورتى تۇرلەرى ورتالىعىنان» كوكپار مەن قازاق كۇرەسىنەن ۇلتتىق قۇرامالار دايىندىقتارىن پىسىقتاپ جاتىر.
سونىمەن قاتار, ورتالىققا قاراستى اسىق اتۋ, اۋدارىسپاق, جامبى اتۋ, توعىزقۇمالاق, ساياتشىلىق, تەڭگە ءىلۋ ۇلتتىق سپورت تۇرلەرى دە قاتىسادى دەپ كۇتىلۋدە.
