ايماق اكىمى مەملەكەت باسشىسىنا الماتى وبلىسىنىڭ الەۋمەتتىك-ەكونوميكالىق دامۋىندا وڭ ديناميكا بار ەكەنىن ايتىپ, ستراتەگيالىق دامۋ جوباسى تۋرالى باياندادى. دامۋدىڭ نەگىزگى 5 باعىتىنان تۇراتىن قۇجات 2 كەزەڭدى قامتيدى: 2025 جىلعا دەيىن جانە 2030 جىلعا دەيىن جۇزەگە اسىرىلماق. الماتى وبلىسىندا تاياۋ ۋاقىتتا ينۆەستيتسيانىڭ ءوسىمىن 455 ميلليارد تەڭگەدەن 686,5 ميلليارد تەڭگەگە دەيىن ارتتىرۋ جوسپارلانعان. وسى ماقساتتا قۇنى 618 ميلليارد تەڭگە بولاتىن ءارى 7 مىڭنان استام جۇمىس ورنىن اشۋعا مۇمكىندىك بەرەتىن 132 جوبادان تۇراتىن ينۆەستپورتفەل جاساقتالعان.
وبلىس اكىمىنىڭ ايتۋىنشا, الماتى اگلومەراتسياسىنىڭ ايماقارالىق جوسپارىنا سايكەس, وبلىستاعى وبەكتىلەر ينجەنەرلىك جانە الەۋمەتتىك ينفراقۇرىلىممەن قامتاماسىز ەتىلەدى. سونداي-اق ايماقتاعى ەڭ وزەكتى پروبلەمانىڭ ءبىرى – ءۇش اۋىسىمدى مەكتەپتەر ماسەلەسى قالاي شەشىلەتىندىگى ايتىلدى. 2025 جىلعا دەيىن «جايلى مەكتەپ» جوباسىمەن 51 مەكتەپ سالۋ جوسپارلانعان. سەبەبى وبلىستا ءۇش اۋىسىمدى مەكتەپتەر كوپ. سونىمەن قاتار وبلىس جەتەكشى جوعارى وقۋ ورىندارى مەن كوللەدجدەردىڭ فيليالدارى, دارىندى بالالارعا ارنالعان مەكتەپ ليتسەي, «G 4 City» اۋماعىندا مەديتسينالىق حابى مەن عىلىمي-ءبىلىم بەرۋ ايماعى بار «Gate District» اشىلادى, ء«بىلىمدى ۇلت» ۇلتتىق جوباسىنىڭ اياسىندا 11 كوللەدجدىڭ ماتەريالدىق-تەحنيكالىق بازاسى نىعايتىلادى.
پرەزيدەنتكە ۇسىنىلعان مالىمەتتەرگە سايكەس, وڭىردە 38 مەديتسينا نىسانى سالىنادى. وعان قوسا, وبلىس ورتالىعىندا 500 ورىندىق كوپسالالى اۋرۋحانا قۇرىلىسى جوبالانعان.
وبلىس ەكونوميكاسىن دامىتۋدىڭ نەگىزىن قايتا وڭدەۋ سەكتورى, اگروونەركاسىپتىك كەشەن, كولىك, لوگيستيكا جانە تۋريزم قۇراماق. ءوڭىر باسشىسىنىڭ ايتۋىنشا, قازىردىڭ وزىندە وبلىستا 2626 جۇمىس ورنىن اشۋعا مۇمكىندىك بەرەتىن قۇنى 290 ميلليارد تەڭگەلىك 23 جوبا ىسكە اسىرىلىپ جاتىر. اگروونەركاسىپ كەشەنى سالاسىندا 3330 جۇمىس ورنىن اشۋعا مۇمكىندىك بەرەتىن قۇنى 210 ميلليارد تەڭگە بولاتىن 78 جوبا جۇزەگە اسىرىلىپ كەلەدى. اوك جوبالارى وبلىستىڭ بارلىق اۋدانىندا قولعا الىنعان. مارات سۇلتانعازيەۆتىڭ ايتۋىنشا, تۋريزم سالاسىندا جەتىستىكتەر بار. الماتى وبلىسىندا ورنالاسقان ۇلتتىق پاركتەرگە كەلەتىندەر سانى كوبەيگەن.
قاسىم-جومارت توقاەۆ كەزدەسۋ سوڭىندا وبلىس دامۋىنىڭ ستراتەگيالىق جوسپارىن ءتيىستى مەملەكەتتىك ورگاندارمەن بىرلەسىپ جۇزەگە اسىرۋدى تاپسىردى.
