قىلمىستىق توپ مۇشەلەرى مەرزىمدى تۇردە كيىكتەردى اتىپ, مۇيىزدەرىن قىتايعا جونەلتۋ ماقساتىندا وڭتۇستىك وڭىرگە ساتىپ وتىرعان. ولار قىلمىستىق جولمەن الىنعان كيىك ءمۇيىزىنىڭ ءبىر كەلىسىن 80-100 مىڭ تەڭگە ارالىعىندا ساتقان.
«قازىرگى ۋاقىتتا پوليتسيا قىزمەتكەرلەرى 6 ءتىنتۋ جۇمىستارىن جۇرگىزىپ, قىلمىستىق توپتىڭ ءۇش مۇشەسى (34 پەن 46 جاس ارالىعىندا) ۇستالىپ, ۇشەۋىنە ىزدەۋ جاريالاندى. 150 كەلى, ياعني 732 دانا كيىك ءمۇيىزى تاركىلەندى. سونداي-اق, كۇدىكتىلەردەن تارازى, پىشاق سۋىق قارۋى, تىركەلمەگەن قارۋ جانە اۆتو-موتوتەحنيكا تاركىلەنىپ الىندى», دەپ حابارلادى قاراعاندى وبلىستىق پوليتسيا دەپارتامەنتى باستىعىنىڭ ورىنباسارى ءابىل ءابىلدين.
اتالعان فاكتى بويىنشا قك-ءتىڭ 339-1-بابىنا (سيرەك كەزدەسەتىن جانە قۇرىپ كەتۋ قاۋپى تونگەن جانۋارلاردىڭ, سونداي-اق پايدالانۋعا تىيىم سالىنعان تۇرلەرىمەن, ولاردىڭ بولىكتەرىمەن نەمەسە دەريۆاتتارىمەن زاڭسىز اينالىسۋ) سايكەس قىلمىستىق ءىس قوزعالدى. اتالعان باپتىڭ سانكتسياسى مۇلكىن تاركىلەي وتىرىپ, 3 جىلدان 5 جىلعا دەيىن باس بوستاندىعىنان ايىرۋدى كوزدەيدى. تەرگەۋ ارەكەتتەرىمەن قاراعاندى وبلىستىق پوليتسيا دەپارتامەنتى تەرگەۋ باسقارماسىنىڭ تەرگەۋشىلەرى اينالىسىپ جاتىر.
