باسشىلىقتىڭ ءجىتى باقىلاۋى مەن ىركىلىسسىز اتقارىلعان جۇمىستاردىڭ ناتيجەسىندە اۋىل جۇرتىنىڭ ءوتىنىش-تالابى ورىندالىپ, 600 ابونەنتتىڭ گازعا قوسىلۋىنا مۇمكىندىك تۋدى. جالپى اۋداندا قازىر 20 503 ادامنىڭ نەمەسە تۇرعىنداردىڭ 43,7 پايىزىنىڭ كوگىلدىر وتىنعا قوسىلۋىنا جاعداي جاسالعان.
2020-2022 جىلدارعا كوكسۋ اۋدانىنداعى 8 ەلدى مەكەندى گازداندىرۋعا بيۋدجەتتەن 2,023 ملرد تەڭگە بولىنگەن بولاتىن.
وسى كۇنگە دەيىن مۇقىرىنى قوسقاندا 5 اۋىل گازعا قول جەتكىزسە, جىل سوڭىنا دەيىن 4 مىڭنان استام تۇرعىنى بار تاعى ۇشەۋى – بەسقاينار, جامبىل, مامبەت اۋىلدارى دا گازعا قوسىلادى. تاعى 12 اۋىلدى گازداندىرۋعا جوبالىق-سمەتالىق قۇجاتتاما ازىرلەنىپ جاتىر. ولاردىڭ قۇرىلىس-مونتاج جۇمىستارى 2023-2024 جىلدارى جۇرگىزىلەدى.
«گازعا قوسىلۋ باعاسى 30 مەترگە دەيىن ورتاشا 145 مىڭ تگ, 1 تەكشە مەتر گازدىڭ قۇنى 30 تەڭگە 33 تيىن جانە الەۋمەتتىك از قامتىلعان وتباسىلار توبىنا جاتاتىندارعا 30 پايىزعا دەيىن جەڭىلدىكتەر قاراستىرىلعان. وعان قوسا قاجەتتى پەش, دابىل قاققىش جانە ەسەپتەگىش (سچەتچيك) الۋعا 10 ايعا دەيىن ەش پايىزسىز ءبولىپ تولەۋگە بولادى. الداعى قىركۇيەك ايىنىڭ 20-نان كەيىن بەسقاينار, جامبىل, مامبەت اۋىلدارى دا گازعا قوسىلادى», دەيدى كوكسۋ اۋدانىنىڭ اكىمى مارلەن كولباەۆ.
ونىڭ ايتۋىنشا, گازعا قوسۋدى BSP GROUP LTD, ST LTD, ST GAZ, «سك مۋسليم», «اياكس-78» جانە «سۇڭقار- 2002» جشس قامتاماسىز ەتەتىن بولادى.
مۇقىرىدا العاشقى بولىپ ۇيىنە گاز تارتىلعان تۇرعىن – 44 جىل جەرگىلىكتى مەكتەپتە ۇستاز بولعان, جالعىز تۇراتىن ارداگەردىڭ ءبىرى, ەڭبەك ەرى نۇرمولدا الدابەرگەنوۆتىڭ قىزى رابيعا الدابەرگەنوۆا. ونىڭ قۋانىشىندا شەك جوق. بۇل ۇيگە «BSP گرۋپپ» كومپانياسى جەرگىلىكتى اكىمدىكپەن بىرلەسىپ گازدى تەگىن قوسىپ بەرگەن ەكەن. زەينەتكەر گاز تارتۋ ءىسىنىڭ باسى-قاسىندا جۇرگەن جاندارعا العىسىن جاۋدىردى.
«ۇيىمە تەگىن گاز قوسىپ بەرگەن دەمەۋشىلەرگە, بارشا ازاماتقا ايتار العىسىم شەكسىز. ەگدە ادام بولعان سوڭ جۇرەكتىڭ اۋرۋى, بەل ومىرتقامدا سىرقاتىم بار, سول ءۇشىن ماعان وت جاعىپ, كۇل شىعارعان قيىن. اۋىلعا گاز كەلگەنى ماعان ۇلكەن دەمەۋ بولدى. قىستا اياز 40 گرادۋسقا بارعاندا گازدىڭ قىسىمى تومەندەپ كەتەتىنى زاڭدى قۇبىلىس. ونى ءوزىم حيميا ءپانىنىڭ مۇعالىمى رەتىندە جاقسى بىلەمىن. سوندىقتان قاتتى ايازدا قوسىمشا قور بولسىن دەپ 1-2 توننا كومىر الىپ قويدىم. اۋىلعا جەتكەن تابيعي گازدىڭ قىزىعىن بارشا تۇرعىن كورە الاتىنىنا قۋانىشتىمىن», دەيدى ر.الدابەرگەنوۆا.
مىنە, ەندى كوپتەن كۇتكەن مۇقىرى اۋىلىنداعى 481 ءۇي كومىر جاعۋدان قۇتىلىپ, ونىڭ ورنىنا گازعا قوسىلا الادى.
جەتىسۋ وبلىسى
