ەلوردا • 18 تامىز، 2022

ەلوردادا شەكاراشىلاردىڭ قۇرمەتىنە ەسكەرتكىش ورناتىلدى

74 رەت كورسەتىلدى

نۇر-سۇلتان قالاسىندا شەكارا قىزمەتىنىڭ 30 جىلدىعىنا وراي شەكاراشىلارعا ارنالعان ەسكەرتكىش ورناتىلدى، دەپ حابارلايدى Egemen.kz.

ەسكەرتكىش اشۋ باستاماسىن «زاستاۆا تارلاندارى» ارداگەرلەر بىرلەستىگى مەن قر ۇقك شەكارا قىزمەتى كوتەرگەن. سالتاناتتى شاراعا قر ۇقك شەكارا قىزمەتى ديرەكتورىنىڭ ءبىرىنشى ورىنباسارى گەنەرال-مايور ايدار ايمۋرزين، قالا اكىمىنىڭ ورىنباسارى ەسەت بايكەن، قر ۇلتتىق قاۋىپسىزدىك كوميتەتى شەكارا قىزمەتىنىڭ ارداگەرلەرى كەلدى.

«بۇل – كەز كەلگەن ۋاقىتتا باس قوسا الاتىن وتە ماڭىزدى ورىن. ەسكەرتكىش ورناتۋدا ۇنەمى قارجىلىق شىعىندار جانە ۋچاسكەنى ءبولۋ ماسەلەسى بولادى. مۇندا شەكارا قىزمەتىنىڭ اسكەري قىزمەتشىلەرى مەن ارداگەرلەر ءوز مۇمكىندىكتەرىنە قاراي قاراجات جينادى. سودان كەيىن الماتى اۋدانىنىڭ اكىمىنەن جەر تەلىمىن سۇرادىق. ناتيجەسىندە ب. مومىش ۇلى، ابىلاي حان، مۇستافين كوشەلەرىنىڭ قيىلىسىنان جەر تەلىمىن ءبولدى. ونىڭ دا سيمۆولدىق ءمانى بار»، دەدى «زاستاۆا تارلاندارى» رەسپۋبليكالىق ارداگەرلەر قوعامدىق بىرلەستىگىنىڭ توراعاسى تۇرسىن ۋاجانوۆ.

ءوز سوزىندە ت. ۋاجانوۆ بارلىق شەكاراشىلاردى شەكارا قىزمەتىنىڭ 30 جىلدىعىمەن قۇتتىقتادى.

«بۇل ۇلكەن مەرەكە. وسى 30 جىلدا شەكارا قىزمەتى قارىشتاپ دامىدى. قازىرگى ۋاقىتتا شەكارا قىزمەتى پوستكەڭەستىك اۋماقتاعى لايىقتى قىزمەتتەردىڭ ءبىرى، كورشى مەملەكەتتەر مەن الىس شەتەلدەردىڭ بارلىق شەكارا قىزمەتتەرىمەن تەڭ جاعدايدا ىنتىماقتاسادى. شەكارا قىزمەتى ۇلكەن جەتىستىكتەرگە جەتىپ كەلەدى. ولارعا دەنساۋلىق، اشىق اسپان تىلەيمىن، شەكاراشىلار وتانىمىزدىڭ سەنىمدى قورعاۋشىسى بولىپ، اعا ۇرپاقتىڭ ءداستۇرىن جالعاستىرىپ، جاڭا جەتىستىكتەرگە جەتە بەرسىن»، دەيدى تۇرسىن ۋاجانوۆ.

ايتا كەتسەك، بۇگىن، 18 تامىز – شەكاراشىلاردىڭ كاسىبي مەرەكەسى. 

 

سوڭعى جاڭالىقتار

ۇقساس جاڭالىقتار