كەنشىلەر استاناسىندا تۇڭعىش رەت ۇيىمداستىرىلعان بۇل كونكۋرسقا جالپى سانى 110 ءوتىنىم تۇسكەن ەكەن. قۇرامىنا مەملەكەتتىك ورگانداردىڭ, بيزنەس-قوعامداستىقتىڭ وكىلدەرى, دەپۋتاتتار مەن قوعام بەلسەندىلەرى ەنگەن كوميسسيا ءجۇزدىڭ ىشىندەگى جۇيرىكتەردى انىقتادى.
قالا اكىمىنىڭ گرانتىنا لايىقتى بولعان جاس كاسىپكەردىڭ ءبىرى – ۆيكتوريا پاك. ونىڭ قۇرعان شاعىن كاسىپورنى AVISHU ماركاسىمەن كيىم تىگەدى. مىسالى, بيىل جاز ماۋسىمىندا ۆيكتوريانىڭ تىگىن تسەحى وبلىس بويىنشا «جاسىل ەل» جاستار ەڭبەك جاساقتارىنىڭ جاۋىنگەرلەرىن تۇگەلدەي بىرىڭعاي فورمامەن كيىندىردى. ەندى جاس كاسىپكەر جاڭا جەلىنى ىسكە قوسىپ, سپورتتىق كيىمدەر تىگىپ شىعارماقشى.
ورگانيكالىق قالدىقتاردان ەڭ قۇندى تىڭايتقىش – بيوگۋمۋس الۋ ءۇشىن مودەلدىك ۋچاسكە قۇرعىسى كەلەتىن ارايلىم سەرىكبايعا دا قالا اكىمىنىڭ گرانتى اۋاداي قاجەت بولاتىن. ءوز جوباسىن ۆەرميكۋلتۋرامەن بايلانىستىراتىن جاس بيولوگ ءارى كاسىپكەر ارايلىم الداعى ۋاقىتتا نيەت بىلدىرگەندەر ءۇشىن ۆەرميكۋلتۋرا بويىنشا كۋرستار مەن سەمينارلار ۇيىمداستىرعىسى كەلەتىنىن ايتادى.
– بۇل تەحنولوگيانى ساياجايلاردا, باقشالاردا, مەكتەپ الاڭدارىندا جانە باسقا دا جەرلەردە قولدانۋعا بولادى. گرانت قارجىسىنا قاجەتتى جابدىقتار ساتىپ الامىن, قاراجاتتىڭ ءبىر بولىگى پوليگرافيالىق ونىمدەردى شىعارۋعا جۇمسالادى, – دەيدى بولاشاقتاعى بيولوگيا عىلىمدارىنىڭ دوكتورى.
جالپى, قالا اكىمىنىڭ گرانتىن العانداردىڭ اراسىندا قاراجاتتى فيتنەس-كلۋب, تاندىر, ۇلتتىق ونەر مەكتەبىن, ەكىنشى تسيفرلىق تەحنولوگيالار ورتالىعىن اشۋعا, پودولوگيالىق ورتالىقتى كەڭەيتۋگە, گەودەزيالىق قىزمەتتەرگە جانە باسقا دا جوبالارعا سالۋعا نيەتتى جاس كاسىپكەرلەر بولدى.
قاراعاندى قالاسىنىڭ اكىمى ەرماعانبەت بولەكپاەۆ جاس كاسىپكەرلەرگە بولىنگەن گرانتتاردىڭ شاعىن بيزنەستىڭ شارۋاسىن وركەندەتۋگە سەپ بولاتىنىنا نىق سەنىمدى.
– كاسىبىمدى دوڭگەلەتىپ, شاعىن بيزنەستىڭ دامۋىنا ۇلەس قوسسام دەگەن ماقساتكەر جاستاردىڭ قۇلشىنىسى قۋانتادى. ءبىز الداعى ۋاقىتتا دا وسىنداي باستاماشىل, ەڭبەكقور جانە ىسكەر جاستارعا بارىنشا قولداۋ كورسەتە بەرەتىن بولامىز, – دەيدى قالا باسشىسى.
جاس كاسىپكەرلەردى قولتىعىنان دەمەپ, قامقورلىققا الۋ جالپى وبلىس بويىنشا كەڭىنەن ەتەك العان. مىسالى, اكىمدەردىڭ گرانتتارى قالالار مەن اۋدانداردا بولىنگەن. ال الداعى قىركۇيەك ايىندا وبلىس اكىمىنىڭ گرانتىنا وتىنىمدەر قابىلدانا باستايدى. بيىل بۇل گرانتتاردىڭ سوماسى ەكى ەسەگە ارتىپ, ارقايسىسىنىڭ مولشەرى 2 ملن تەڭگەگە جەتكەن. ءساتىن سالسا, اتالعان قاراجاتتى سىناقتان سۇرىنبەي وتكەن 100 جاس كاسىپكەر يەمدەنەتىن بولادى.
قاراعاندى
