قازاقستان • 17 تامىز، 2022

شەكارانىڭ شەبى بەرىك

158 رەت كورسەتىلدى

مەملەكەتتىك شەكارا – تۋ، ەلتاڭبا جانە انۇرانمەن قاتار تاۋەلسىز ەلدىڭ اجىراماس نىشانى بولىپ سانالادى. حالقىمىز ءۇشىن قاستەرلى ۇعىم بولىپ سانالاتىن مەملەكەتتىك شەكارانى قورعاۋ، اتا-بابادان قالعان جەردى كۇزەتۋ – ۇلكەن ابىروي، ماڭىزدى جاۋاپكەرشىلىك. بيىل قازاقستان رەسپۋبليكاسى ۇلتتىق قاۋىپسىزدىك كوميتەتى شەكارا قىزمەتىنىڭ قۇرىلعانىنا 30 جىل تولادى. كاسىبي مەرەكە قارساڭىندا ۇقك توراعاسىنىڭ ورىنباسارى – شەكارا قىزمەتىنىڭ ديرەكتورى، گەنەرال-مايور ەرلان الداجۇمانوۆ ۆەدومستۆونىڭ قالىپتاسۋى مەن دامۋ پەرسپەكتيۆالارى تۋرالى ايتىپ بەردى.

– ەرلان ەرعالي ۇلى، شەكارا قىز­مە­تىنىڭ قالىپتاسۋى مەن جاۋىن­گەر­لىك جولى حالىقتىڭ ءوزى كۋا بولىپ كەلەدى. تا­ۋەل­سىزدىكتىڭ 30 جىلدىعى تاريحىندا قا­زاق­ستاندىق شەكاراشىلار داڭقتى جول قالىپتاستىرا ءبىلدى. ءسوز باسىندا وسىنداي جارقىن وقيعالار مەن ماڭىزدى ىستەرگە توقتالساڭىز.

– ول راس. ماسەلەن، قازاقستاندىق شە­كا­را­شىلاردىڭ تاجىك-اۋعان شەكارا­سى­نىڭ ۋچاسكەسىندە تمد-نىڭ سىرتقى شەكارالارىندا بەيبىتشىلىك پەن قاۋىپسىزدىكتى ساق­تاۋ جونىندە اتقارعان ميسسياسىن ەسكە ال­ساق تا جەتكىلىكتى. قازاقستاندىق بىرىككەن اتقىشتار باتالونىنىڭ قۇرامىندا سەگىز جىل ىشىندە جاسىل كۇنقاعارلى جۇزدەگەن جا­ۋىنگەر وڭىردەگى بەيبىتشىلىك پەن تۇراق­تى­لىق جولىندا تاپسىرمانى ابىرويمەن اتقاردى.

ەل تاۋەلسىزدىگى قالىپتاسۋىنىڭ قيىن كە­زە­ڭىن­دە شەكاراشىلار رەسپۋبليكا اۋما­عى­­نىڭ تۇتاستىعىنىڭ بۇزىلۋىنا جول بەرمەي، مەملەكەتتىك شەكارانى سەنىمدى قور­عاۋ ارقىلى مەملەكەتتىڭ قورعانىس قابى­لە­تى مەن ۇلتتىق قاۋىپسىزدىگىن نىعايتۋعا ۇلەس قوستى.

شەكارا قىزمەتىنىڭ وتىز جىلى ادامزات تاريحىنىڭ اۋقىمىندا از ۋاقىتتى قام­تيتىندىعى انىق، بىراق ەگەر ءسىز وسى جىلدار ىشىندە شەكاراشىلاردىڭ باسىنان وتكەرگەن قيىن جولىن سارالاپ قاراساڭىز، جەكە قۇرامنىڭ وتان شەكاراسىن سەنىمدى قورعاۋداعى قىرۋار ەڭبەگىنە كوز جەتكىزەسىز.

– ەل پرەزيدەنتى قاسىم-جومارت توقاەۆ شەكارا قاۋىپسىزدىگىنە ەرەكشە نازار اۋدارۋدى تاپسىردى. مەملەكەت باس­­شىسىنىڭ نۇسقاۋلارىن ورىنداۋ بويىنشا قانداي جۇمىستار اتقا­رى­لىپ جاتىر؟

– الەمدەگى جاڭا سىن-قاتەرلەر مەن گەوساياسي جاعدايدىڭ كۇردەلەنۋى شەكارا قىز­مەتىن جەدەل دامىتۋدى جانە بۇكىل مەم­­لەكەتتىك شەكارانى جايلاستىرۋدى تالاپ ەتتى. بۇل جەردە ايتا كەتەتىنى، قا­زاق­­ستان باسشىسى ۇقك-ءنىڭ جاڭعىرتۋ ستراتەگياسىن قولداپ، القا وتىرىسىندا سويلەگەن سوزىندە بىرقاتار ناقتى تاپسىرما قويدى. ولاردىڭ ءبىرىنشىسى – الەمدىك ءتار­تىپتىڭ وزگەرۋى جاعدايىندا «وسى جا­ھان­دىق ەكسپەريمەنتتىڭ قاراپايىم باقى­لاۋشىلارى» عانا بولماۋ. كەيىنىرەك، رەس­پۋب­ليكالىق «انا ءتىلى» گازەتىنە بەرگەن سۇحباتىندا قازاقستاننىڭ جاھاندىق ارە­ناداعى ۇستانىمىن اتاي وتىرىپ، مەم­لەكەتتىك شەكارانىڭ مىزعىماستىعى ما­سە­لەسىنىڭ ماڭىزدىلىعىنا باسا نازار اۋداردى.

باستاپقىدا ءبىز تەحنيكالىق قۇرالدار­دىڭ جاڭا ۇلگىلەرىن پايدالانا وتىرىپ، مەملەكەتتىك شەكارالاردى باقىلاۋدى ۇيىمداستىرۋ بويىنشا شەتەلدەردىڭ وزىق تاجىريبەسىن زەردەلەدىك. ناتيجەسىندە، قىزمەتتىڭ جۇمىسىن جەتىلدىرۋ بويىنشا ۇسىنىستار ازىرلەندى. 2022 جىلعى 17 ما­مىردا پرەزيدەنت «قر ۇقك كەيبىر ماسە­لەلەرى تۋرالى» №893 جارلىققا قول قويدى. جوعارى ساياسي قولداۋ الىپ، قو­يىل­­عان مىندەتتەردى شەشۋ ءۇشىن ءبىز شە­كا­را قىزمەتىن اۋقىمدى رەفورمالاۋعا كىرىستىك.

جاڭعىرتۋ بارىسىندا اۋماقتىق قاعي­دات بويىنشا قايتا قۇرۋ جۇرگىزىلىپ، شەكارا ۆەدومستۆوسىنىڭ قازىرگى زامانعى قۇ­رىلىمى جاسالدى. شەكارانى قورعاۋ تاسىلدەرى مەن ادىستەرى، بولىمشەلەر مەن شەكارا ناريادتارىنىڭ ءىس-قيمىل تاكتيكاسى، شەكارا ۆەدومستۆوسىنىڭ نورماتيۆتىك-قۇقىقتىق بازاسى جەتىلدىرىلىپ، جان-جاقتى قامتاماسىز ەتۋ تەتىگى جولعا قويىلدى.

– ال وسى جۇرگىزىلگەن رەفورمالاردىڭ ناتيجەلەرى قانداي؟

– ناقتى ساندارعا توقتالاتىن بولساق، وسى جىلدىڭ ءبىرىنشى جارتىسىندا وتكەن جىل­مەن سالىستىرعاندا شەكارا كەڭىس­تى­گىندە قۇقىق بۇزۋشىلاردى ۇستاۋ 48 پا­يىز­عا وسكەنى بايقالادى.

قۇرلىق ۋچاسكەلەرىندەگى مەملەكەتتىك شەكارانى قورعاۋ كەزىندە كۇشتەر مەن قۇ­رال­­داردى كەشەندى قولدانۋعا مۇمكىندىك بەرەتىن شەكارالىق وپەراتسيالارعا باسا نا­زار اۋدارۋ قاجەت. شەكارالىق كەڭىس­تىك­تەگى وپەراتسيالار بارىسىندا 250-دەن استام قۇقىق بۇزۋشى ۇستالىپ، جاۋاپ­كەر­شى­لىككە تارتىلدى.

قارۋلى كۇشتەر مەن ۇلتتىق ۇلان­نىڭ وپەراتسيالارعا تارتىلعان بولىم­شە­لەرى باسقارۋدىڭ جانە ءبىزدىڭ بولىمشە­لە­رىمىزبەن ءوزارا ارەكەتتەسۋدىڭ ءتيىمدى تا­جىري­بەسىن الاتىنىن اتاپ وتكەن ءجون.

تەڭىزدە بيولوگيالىق رەسۋرستارىن زاڭ­سىز وندىرۋگە قارسى شارالار ناتيجە­سى­ن­دە 69 ءجۇزۋ قۇرالى ۇستالىپ، 460 شاقى­رىم­­نان استام بالىق اۋى تاركىلەندى. 1،9 ملرد تەڭگەدەن استام ەكونوميكالىق زا­لال­­­دىڭ الدىن الدى.

پرەزيدەنتتىڭ قارجىلىق تۇراقتىلىق­تى قامتاماسىز ەتۋ جونىندەگى جارلىعىن ورىن­­داۋ ماقساتىندا 14 ناۋرىزدان باس­تاپ وتكىزۋ بە­كەتتەرىندە جالپى سوماسى 3،5 ملرد تەڭ­گەدەن استام ۆاليۋتانى اكە­تۋ­د­ىڭ 177 فاك­تىسىنىڭ جولى كەسىلدى.

«مەملەكەت باسشىسىنىڭ قازاقستان حالقىنا جولداۋىن ورىنداۋ جونىندەگى جال­پىۇلتتىق جوسپارعا» سايكەس قوس ازا­مات­تىعى بار ادامداردى انىقتاۋعا باعىت­تالعان كەشەندى ءىس-شارالار اتقا­رىلدى. وسى جىلدىڭ ءبىرىنشى جارتىسىندا قازاقستان ازاماتتارىنىڭ شەت مەملەكەتتەردىڭ جول ءجۇرۋ قۇجاتتارىن پايدالانۋ فاكتىلەرىنىڭ 23 پايىزعا وسكەنى انىقتالدى.

«كولەڭكەلى كريپتوۆاليۋتا ماينينگى» دەپ اتالاتىن ۇلتتىق ەنەرگەتيكالىق قا­ۋىپ-قا­تەر پروبلەماسىن شەشۋ تۋرالى مەم­لەكەتتىك ورگاندارعا بەرىلگەن ەل پرە­زي­­دەنتىنىڭ تاپسىرماسىن ورىنداۋ بويىنشا جۇمىس جالعاسىپ كەلەدى. جىل باسىنان بەرى ماينينگتىك جابدىقتى الىپ وتپەك بولعان 26 ارەكەت توقتاتىلدى. سونداي-اق 4 598 كوشى-قون زاڭناماسىن بۇزۋشى جانە 14 كولىك كومپانياسى اكىمشىلىك جاۋاپ­كەر­شىلىككە تارتىلدى. ءوندىرىپ الىنعان ايىپ­پۇلداردىڭ جالپى سوماسى 48 ملن تەڭگەدەن استى.

جالپى سالماعى 31 ملن تەڭگەگە باعا­لان­عان 45 كيلودان اساتىن زەرگەرلىك بۇ­يىم­­داردى شەكارا ارقىلى الىپ وتۋگە ارەكەت جاساۋ فاكتىلەرىنىڭ ءوسۋى بايقا­لا­دى. ءتۇرلى كاليبرلى قارۋ-جاراق پەن وق-ءدارىنى زاڭسىز الىپ ءوتۋدىڭ 203 فاك­تىسى تىركەلدى. جالپى سوماسى 3 ملرد تەڭ­گەدەن استام سوماعا تىيىم سالىنعان جانە تاسىمالداۋعا شەكتەلگەن ونىمدەر مەن كون­ترا­باندا زاتتارىن الىپ وتۋگە جول بەرىلمەدى.

ەسىرتكى ترافيگىنىڭ قولدانىستاعى ارنالارىنا قارسى ءىس-قيمىل شەڭبەرىندە 107 جاعدايدا ەسىرتكى قۇرالدارىنىڭ شەكارا ارقىلى وتۋىنە توسقاۋىل قويىلدى. 22 شىلدەدە قازاق-وزبەك شەكاراسىندا اسا ءىرى مولشەردەگى – شامامەن 35 كيلو گەروين ەسىرتكى زاتىنىڭ ۇستالۋى ەڭ ايقىن جە­تىس­تىكتەردىڭ ءبىرى بولىپ تابىلادى. قاس­كويلەر ەسىرتكىنى جۇك كولىگىنىڭ بەنزين باگىندا جاسىرىپ، الىپ وتپەك بولعان.

ر

– قازىرگى ۋاقىتتا ەل باسشىلىعى تاراپىنان اسكەري قىزمەتشىلەردى الەۋ­مەت­تىك قامتاماسىز ەتۋگە كوپ كوڭىل بو­لى­نەدى. بۇل ماسەلەلەر ۆەدومستۆودا قان­شالىقتى شەشىمىن تاۋىپ وتىر؟

– رەفورمالار ۆەدومستۆونىڭ قۇرى­لى­مىن، شەكارانى قورعاۋ ادىستەرىن عانا ەمەس، اسكەري قىزمەتشىلەردىڭ الەۋمەتتىك جاع­دايىن دا قامتىدى. شەكاراداعى قىزمەت وتە كۇردەلى ەكەنى بەلگىلى. ءبىزدىڭ باستى مىندەتىمىز – شەكاراشى ءۇشىن قىزمەت پەن تۇرمىسقا قاجەتتى جاعداي جاساۋ.

مەملەكەت باسشىسى ۇلتتىق قاۋىپ­سىز­دىك كوميتەتى باسشىلىعىنىڭ ۇقك مەن شەكارا قىزمەتى لاۋازىمدارىن بىرىز­دەن­دىرۋ تۋرالى ءوتىنىشىن قولدادى. 2021 جىلعى 1 قاڭتاردان باستاپ ۆەدومستۆو اسكەري قىزمەتشىلەرىنىڭ جالا­قىسى ورتا ەسەپپەن – 75، ال شەكارا بولىم­شەلەرىندە ءتىپتى 110 پايىزدان استامعا كوتەرىلدى. مەم­لەكەت ەسەبىنەن اسكە­ري قىز­مەت­شىلەر مەن ولاردىڭ وتباسى مۇشە­لە­رىن مەدي­تسي­نا­لىق قامتاماسىز ەتۋ جۇزەگە اسىرىلادى.

سونىمەن قاتار كۇنتىزبەلىك ەسەپتەۋدە كەمىندە 8 جىل قىزمەت اتقارعان سارباز (ماتروستار)، سەرجانت (ستارشينالار) لاۋازىمدارىندا كەلىسىمشارت بويىنشا اسكەري قىزمەت اتقارىپ جۇرگەن اسكەري قىزمەتشىلەردىڭ قازاقستاننىڭ جوعارى وقۋ ورىندارىندا اقىلى نەگىزدە وقۋعا جۇمسالعان شىعىندارىن وقىتۋ قۇنىنىڭ 50 پايىزى مولشەرىندە بيۋدجەت قاراجاتى ەسەبىنەن وتەپ الۋعا قۇقىعى بار.

شەكارا بولىمشەلەرىنىڭ، اكىمشىلىك جانە تۇرعىن ءۇي عيماراتتارىنىڭ جاڭا كەشەن­دەرىن سالۋ ماسەلەلەرى جوسپارلى تۇردە شەشىلۋدە. 2004-2018 جىلدار ارا­لى­عىندا شامامەن 68 نىسان (وفيتسەرلىك جانە سەرجانتتىق قۇرامداعى تۇرعىن ۇيلەر، شەكارا بولىمشەلەرى، وتكىزۋ پۋنك­تەرى، اسكەري قالاشىقتار) سالىندى جانە پايدالانۋعا بەرىلدى. عيماراتتار مەن قۇ­رى­لىستار XXI عاسىردىڭ تالاپتارىنا جاۋاپ بەرەتىن شەكارا بولىمشەلەرىنىڭ زاماناۋي كەشەندەرى تۇرىندە سالىنعان.

2013 جىلى ماڭعىستاۋ وبلىسىنىڭ بەينەۋ ەلدى مەكەنىندە بارلىق ينفرا­قۇ­رى­لىمى بار شەكارالىق اسكەري قالاشىق پايدالانۋعا بەرىلدى. قورداي اۋدانى بو­يىنشا شەكارا باسقارماسىنىڭ قورداي ەلدى مەكەنىنە جاقىن جەردەگى قۇرىلىسىن ماقتانىشپەن ايتا الامىن.

2017-2020 جىلدار ارالىعىندا ۇقك شق قىزىلوردا، تۇركىستان، اقتوبە جانە اتىراۋ وبلىستارى دەپارتامەنتتەرىنىڭ جا­ۋاپتى اۋماقتارىندا مودۋلدىك ۇلگى­دەگى 16 بولىمشە سالىندى، وندا شەكا­را­شىلارعا قىزمەت كورسەتۋ جانە تولىق­قان­دى تۇرعىن ۇيگە قاجەتتى بارلىق جاع­داي­ جاسالعان.

– ەرلان ەرعالي ۇلى، شەكارا قىز­مە­تى قانداي باعىت ۇستانعان؟ ۆەدوم­ست­ۆونىڭ ودان ءارى دامۋ پەرسپەكتيۆالارى تۋرا­لى ايتىپ بەرسەڭىز.

– شەكارا بولىمشەلەرى ءۇشىن، اسىرەسە شالعاي ۋچاسكەلەردە قىزمەتتىك تۇرعىن ءۇي ماسەلەلەرىن شەشۋ ماقساتىندا شەكارا زاستاۆالارىنىڭ مودۋلدىك كەشەندەرىن ساتىپ الۋ جانە ورناتۋ جالعاسادى.

قامتاماسىز ەتۋ ماسەلەلەرى بولىگىندە ەنەرگيا ۇنەمدەۋ تەحنولوگيالارىن، بالا­مالى ەنەرگيا كوزدەرىن ەنگىزۋگە، اۋىز سۋدىڭ اۆتونومدى كوزدەرىن جانە تۇششى­لان­دىرعىشتاردى قوسۋعا باسا نازار اۋدا­رى­­لاتىن بولادى. الداعى ۋاقىتتا مەم­­لەكەتتىك شەكارانىڭ قازاقستان – رە­سەي ۋچاسكەسىندە شەكارا بولىمشەلەرىنىڭ 20 كەشە­نىن سالۋ جوسپارلانىپ وتىر.

كەپتەلىستەردى بارىنشا ازايتۋ ماق­ساتىن­دا جانە ترانسۇلتتىق دالىزدەردى قا­لىپ­تاستىرۋدى ەسكەرە وتىرىپ، شەكارا قىزمەتى مەملەكەتتىك شەكاراداعى وتكىزۋ پۋنكتەرىنىڭ ينفراقۇرىلىمىن جاقسارتۋ، ولاردى تەحنيكالىق، اۆتوماتتاندىرىلعان جانە سەرۆيستىك جاراقتاندىرۋ، شەكارانى كەسىپ وتەتىن ادامدار ءۇشىن بارىنشا قولايلى جاعدايلاردى قامتاماسىز ەتۋ جونىندەگى شارالار كەشەنىن قابىلدايدى.

وتكىزۋ پۋنكتەرى ينفراقۇرىلىمىنىڭ تەپە-تەڭدىگىن ساقتاۋ ماقساتىندا 2025 جىلعا دەيىن قازاقستان-رەسەي شەكارا­سىن­داعى 30 اۆتوموبيل وتكىزۋ پۋنكتىن دامىتۋدىڭ جول كارتاسى بەكىتىلدى.

قازاقستان – قىرعىزستان ۋچاسكەسىندە 2020-2025 جىلدار كەزەڭىندە 7 وتكىزۋ پۋنك­تىن قايتا جاڭارتۋ كوزدەلگەن. «قور­داي» وتكىزۋ پۋنكتىن قايتا قۇرۋ وتكەن جىل­دىڭ ناۋرىز ايىندا اياقتالدى.

وسى ءىس-شارالاردى ىسكە اسىرۋ جاقىن ارادا «جىلدامدىق + ءتيىمدى باقىلاۋ + قاۋىپسىزدىك + جايلىلىق» قاعيداتى بو­يىن­شا وتكىزۋ پۋنكتەرىن قۇرۋعا مۇم­كىن­دىك بەرەدى.

بۇدان بولەك رەسەيلىك ارىپتەستەرمەن قازاقستان رەسپۋبليكاسىنىڭ ۇلتتىق قاۋىپ­سىزدىك كوميتەتى مەن رەسەي فەدەرا­تسيا­­سىنىڭ فەدەرالدىق قاۋىپسىزدىك قىز­مەتى اراسىندا قازاقستان-رەسەي شە­كا­­راسىنداعى تەمىر جول وتكىزۋ پۋنك­تەرىندە بىرلەسكەن باقىلاۋ جۇرگىزۋدىڭ ءتار­تىبى مەن نىساندارى تۋرالى حاتتاماعا قول قو­يىل­دى.

بۇل حاتتاما قازاقستان – رەسەي مەم­لەكەتتىك شەكاراسىن تەمىر جول كولى­گىمەن كەسىپ ءوتۋ كەزىندەگى فورمالدى­لىق­تاردى، باقىلاۋ ۇزاقتىعىن قىسقارتۋ، سونداي-اق بىرلەسكەن ءىس-قيمىل ارقىلى ونىڭ تيىمدىلىگىن ارتتىرۋ بويىنشا پراك­تي­كا­لىق قادام بولىپ تابىلادى.

اۆتوموبيل وتكىزۋ پۋنكتەرىندەگى بىر­لەسكەن باقىلاۋ حاتتاماسىنىڭ ۇقساس جوباسى قارالۋ ساتىسىندا.

تاياۋ بولاشاقتا ءبىز جاعدايدى نە­عۇر­لىم ءتيىمدى باقىلاۋعا جانە ونىڭ وزگە­رۋىنە اسەر ەتۋگە مۇمكىندىك بەرەتىن دە­رەك­تەردى وڭدەۋ مەن باسقارۋدىڭ بىر­ىڭ­­عاي اۆتوماتتاندىرىلعان جۇيەلە­رىنە، ينتەگراتسيالانعان قازىرگى زامانعى تەح­نيكالىق قۇرالداردى جابدىقتاۋعا جانە ەنگىزۋگە باسا نازار اۋدارۋدى جوسپارلاپ وتىرمىز.

مەملەكەتتىك قورعانىستىق تاپسىرىس شەڭبەرىندە سەنىمدىلىگى، ەكولوگيالىق قا­­ۋىپ­سىزدىگى، ءجۇرىپ ءوتۋى جانە دەربەستىگى جو­­عا­رى 5 جانە 6 بۋىندى اۆتوموبيل تەح­نيكاسىمەن جاراقتاندىرۋ اياقتالادى.

تەحنيكالىق قۇرالداردى بىرىڭعاي دە­رەك­تەردى وڭدەۋ ورتالىعىنا ينتەگراتسيا­لاۋ نەگىزىندە «ينتەللەكتۋالدى» قاعي­داتى بىرتىندەپ ەنگىزىلۋدە.

شەكارانى قورعاۋدىڭ تەحنيكالىق قۇ­رال­دارىن جاساندى ينتەللەكت الگو­ريتم­دەرىمەن كەلىپ تۇسەتىن اقپاراتتى وڭدەۋمەن ينتەگراتسيالاۋدى كوزدەيتىن «اقىلدى شەكارا»، «اقىلدى شەكارا بو­لىم­­شەسى»، «اقىلدى وتكىزۋ پۋنكتى» جوبا­لا­رى ىسكە اسىرىلۋدا.

ازىرلەنگەن تۇجىرىمدامالاردىڭ ءمانى تەحنيكالىق قۇرالداردى، ونىڭ ىشىندە شەكاراشىلاردا بار قۇرالداردى بىرىڭعاي زياتكەرلىك پلاتفورماعا بىرىكتىرۋ، سون­داي-اق ولاردان الىنعان اقپاراتتى وڭدەۋ جانە تالداۋ ءۇشىن جاساندى ينتەللەكت الگوريتمدەرىن پايدالانۋ بولىپ تابىلادى.

بيىلدان باستاپ شەكارانى قورعاۋدا پيلوتسىز ۇشۋ اپپاراتتارى قولدانىلۋدا، ولار ءوز تيىمدىلىگىن كورسەتتى. ۇۇا-نى پايدالانا وتىرىپ، شەكارانىڭ قۇرلىقتا دا، تەڭىز ۋچاسكەسىندە دە زاڭسىز ارەكەت­تەردى انىقتاۋعا جانە ۋاقتىلى جولىن كەسۋگە بولادى. قازىرگى زامانعى تەپلوۆيزيالىق جانە بەينەباقىلاۋ كامەرالارىن قولدانۋعا نەگىزدەلگەن شەكارانى قورعاۋدى قاشىقتىقتان باقىلاۋ بەلسەندى تۇردە ەنگىزىلۋدە.

كاسپي تەڭىزىندە جاڭا كاتەرلەر مەن كەمەلەر، زاماناۋي تەحنيكالىق باقىلاۋ بەكەتتەرى پايدالانۋعا قابىلدانادى، بۇل سۋ شەپتەرىن قورعاۋدى ايتارلىقتاي كۇشەيتۋگە مۇمكىندىك بەرەدى.

اۋقىمدى جاڭعىرتۋ بارىسىندا قا­زاق­ستان شەكاراسى بۇگىننىڭ وزىندە جاڭا كەلبەتكە يە بولدى. ارينە، ول «اقىلدى شەكارا» ۇعىمىنا سايكەس كەلۋى جانە مەم­لەكەتتىك شەكارادا جانە شەكارا كەڭىستىگىندە ۇلتتىق قاۋىپسىزدىكتىڭ قازىرگى زامانعى قاۋىپ-قاتەرلەرىنە قارسى تۇرۋ ءۇشىن بارىنشا مۇمكىندىكتەرگە يە بولۋى ءۇشىن ءالى دە كوپ نارسە جاساۋ كەرەك. ورتاق كۇش-جىگەرىمىزبەن ءبىز ءوز ماقساتىمىزعا قول جەتكىزەمىز جانە بارلىق جوسپاردى ىسكە اسىراتىنىمىزعا سەنەمىن.

ەگەمەن قازاقستاننىڭ قاسيەتتى شەكاراسىن قورعاۋعا سەنىپ تاپسىرىلعان ادامدار ءۇشىن، سونداي-اق بارلىق كەزەڭدەگى شەكاراشى جاۋىنگەرلەر ءۇشىن باستى قاعيدا مەملەكەت پەن قوعام الدىنداعى جاۋاپكەرشىلىك بولىپ قالا بەرەدى. شەكارا قىزمەتىنىڭ جەكە قۇرامى قازاقستان پرە­زي­دەنتى مەن حالقى قوياتىن تالاپتارعا ساي، ءبىزدىڭ شەكارامىزدى كەز كەلگەن قول­سۇعۋ­­شىلىقتان قورعاۋدا قىراعىلىق، ۇس­تام­دى­لىق، باتىلدىق، تاباندىلىق پەن ەرىك تانىتادى دەپ سەنەمىن.

– اڭگىمەڭىزگە راحمەت.

 

اڭگىمەلەسكەن

بانۋ ءادىلجان،

«Egemen Qazaqstan»

سوڭعى جاڭالىقتار

سەمەي قالاسىنىڭ اكىمى تاعايىندالدى

تاعايىنداۋ • بۇگىن، 10:42

مەسسي جەڭىسكە جەتەلەي المادى

فۋتبول • بۇگىن، 07:35

شيرەك فينالعا ءوتتى

تەننيس • بۇگىن، 07:33

ءتورتىنشى ورىنعا تۇراقتادى

تەننيس • بۇگىن، 07:32

جۇلدەنىڭ اۋىلى الىس ەمەس

سپورت • بۇگىن، 07:28

بارىمتاعا – «قارىمتا»

قوعام • بۇگىن، 07:25

اسىق اتۋدان الەم چەمپيونى

ۇلتتىق سپورت • بۇگىن، 07:24

ادام كاپيتالىن ارتتىرۋعا ارنالادى

ەكونوميكا • بۇگىن، 07:20

جاڭا رەفورماعا سەنىم زور

پىكىر • بۇگىن، 07:16

ءۇمىت ءسوزى

پىكىر • بۇگىن، 07:12

بۇل – بولاشاقتىڭ تاڭداۋى

پىكىر • بۇگىن، 07:08

اشىقتىقتى ارتتىراتىن يگى ىستەر

قازاقستان • بۇگىن، 07:05

قۇقىق ۇستەمدىگى – كەلىسىم كەپىلى

قازاقستان • بۇگىن، 07:03

ەرتەڭىمىز ءۇشىن ۇتىمدى شەشىم

ساياسات • بۇگىن، 07:00

كاسىپ كوزى – ءناسىپ كوزى

ەكونوميكا • كەشە

ۇقساس جاڭالىقتار