بانك نەسيەسىنىڭ كولەمى بويىنشا ForteBank كوش باستاپ تۇر. بۇل بانكتىڭ نەسيە ءوسىمى ءبىر ايدا 9,6 پايىز, 94,2 ملرد تەڭگەگە ءوسىپ, قارىز پورتفەلى 1,1 ترلن تەڭگەگە جەتتى. بانك قارىز پورتفەلىنىڭ ءوسىم ديناميكاسى سەكتورداعى جالپى كولەمنەن 3 ەسە كوپ. ەكىنشى ورىندا – 948,5 ملرد تەڭگەمەن «ەۋرازيالىق بانك». بۇل بانكتىڭ نەسيە پورتفەلىنە ءبىر ايدا 59,6 ملرد تەڭگە قوسىلعان. ءۇشىنشى ورىندى 45,7 ملرد تەڭگە وسىممەن Bank RBK تۇيىندەيدى. نەسيە پورتفەلىنىڭ جالپى كولەمى – 786,4 ملرد تەڭگە. وزگە قارجى ينستيتۋتتارى ايلىق 1,1 پايىزدان 5,1 پايىزعا دەيىنگى ارالىقتا ءوسىم كورسەتكەن. ۇزدىك وندىق ىشىندەگى نەسيە پورتفەلىن ازايتىپ العان جالعىز قارجى ينستيتۋتى – «سبەربانك قازاقستان».
توپ-10 قاتارىنا كىرمەيتىن باسقا بانكتەردىڭ قارىز پورتفەلىنىڭ جيىنتىق كولەمى 1,4 پايىزعا نەمەسە 17,5 ملرد تەڭگەگە قىسقارىپتى. ولارداعى نەسيە پورتفەلىنىڭ جيىنتىق كولەمى – 1,2 ترلن تەڭگە.
«جىل باسىنان بەرى ەكىنشى دەڭگەيلى بانكتەردىڭ قارىز پورتفەلى 5,5 پايىزعا ءوستى. قارىز پورتفەلى كولەمىنىڭ وسۋىمەن بىرگە تولەمى كەشىكتىرىلگەن نەسيە كولەمى دە 9 پايىزعا نەمەسە 2022 جىلدىڭ ماۋسىمىندا 128,2 ملرد تەڭگەگە ارتتى. ءبىرىنشى جارتىجىلدىق قورىتىندىسى بويىنشا تولەمى كەشىكتىرىلگەن نەسيە كولەمى 1,6 ترلن تەڭگەنى قۇراپ, ال مەرزىمى وتكەن بەرەشەك ۇلەسى ءبىر ايدا 6,9-دان 7,3 پايىزعا كوبەيدى», دەيدى Ranking ساراپشىلارى.
بيزنەس سالىمدارى بويىنشا ليدەر – Bank RBK. سوڭعى ءبىر ايدا قارجى ينستيتۋتىنداعى كورپوراتيۆتىك سالىم كولەمى 26,9 پايىزعا نەمەسە 123,2 ملرد تەڭگەگە كوبەيىپ, جالپى جيىنتىعى 623,5 ملرد تەڭگەگە جەتكەن. بانك ميكرو جانە شاعىن كاسىپكەرلەر, سونداي-اق ورتا مەن ءىرى بيزنەس ءۇشىن «شۇعىل» جانە «كورپوراتيۆتىك» سالىمدار ۇسىنادى. سالىمداردى تەڭگە, رۋبل جانە دوللارمەن اشۋعا بولادى. كورپوراتيۆتى سالىم كولەمىنىڭ ايلىق ءوسىمى بويىنشا ۇزدىك ۇشتىككە Kaspi Bank (+24,1 پايىز, 453,6 ملرد تەڭگە) جانە قازاقستانداعى قىتاي بانكى (+23,3 پايىز, 465,7 ملرد تەڭگە) كىرگەن.
جىلدىڭ العاشقى التى ايىندا زاڭدى تۇلعالاردىڭ بانكتەگى سالىمى 1,2 پايىزعا وسكەن. دەگەنمەن كۇردەلى گەوساياسي جاعدايعا قاراماستان بانكتەر كورپوراتيۆتى سەكتوردان 1 ترلن تەڭگەدەن استام قاراجات تارتىپ وتىر. ماۋسىمدا ەكىنشى دەڭگەيلى بانكتەردەگى زاڭدى تۇلعالار سالىمى 8,9 پايىزعا كوبەيىپ, 12,7 ترلن تەڭگەنى قۇرادى.
