قارجى نارىعىنىڭ كاسىبي قاتىسۋشىلارى, بانك, ساقتاندىرۋ, بروكەرلىك ۇيىمدار وكىلدەرى, تالداۋ جانە قازىناشىلىق بولىمشەلەرىنىڭ قىزمەتكەرلەرى التى نەگىزگى باعىت – Brent ماركالى مۇنايدىڭ قۇنى, رەسەي رۋبلىنە قارسى اقش دوللارىنىڭ قۇنى, قازاقستاندىق تەڭگەگە قارسى اقش دوللارىنىڭ قۇنى, ينفلياتسيا, ىشكى جالپى ءونىم جانە ۇلتتىق بانك بازالىق مولشەرلەمەسىنە بايلانىستى ءوز پايىمدارىن ۇسىنعان.
ساراپشىلاردىڭ پىكىرىنە قاراعاندا, جىل باسىنان بەرى بازالىق مولشەرلەمە ايتارلىقتاي كوتەرىلگەننەن كەيىن (9,75-تەن 14,5 پايىزعا دەيىن) ۇلتتىق بانك 5 قىركۇيەكتە وتەتىن وتىرىستا كىدىرىس جاسايدى. رەسپوندەنتتەردىڭ كوپشىلىگى (73 پايىز) مولشەرلەمەنىڭ ساقتالۋىن كۇتسە, قالعان 27 پايىزى 15 پايىزعا دەيىن كوتەرىلەدى دەيدى. مۇنداي كۇتۋلەر مۇناي باعاسىنىڭ ەلەۋلى تومەندەۋىنە (باررەلىنە 124-تەن 96 دوللارعا دەيىن), ازىق-ت ۇلىكتىڭ الەمدىك باعاسىنىڭ ءتورت ايلىق ۇزاق تومەندەۋىنە (فاو يندەكسى 160-تان 141 پۋنكتكە دەيىن تومەندەدى) جانە ەلدەگى ينفلياتسيالىق قىسىم كەزەڭىنىڭ تەز وتۋىنە بايلانىستى بولۋى مۇمكىن.
بۇل رەتتە ساراپشىلار ينفلياتسيانىڭ ءبىر جىلدان كەيىن 11,7% پايىزعا دەيىن باياۋلاۋىن جانە بازالىق مولشەرلەمەنىڭ 12,0 پايىزعا دەيىن تومەندەۋىن كۇتۋدە. ايتا كەتۋ كەرەك, پايىزدىق مولشەرلەمەلەر, ادەتتە, تاۋار باعالارىمەن ءبىر باعىتتا جۇرەدى.
قاتىسۋشىلاردىڭ ايتۋىنشا, مۇناي باعاسى بويىنشا كۇتۋلەر ايتارلىقتاي ناشارلادى: ءبىر جىلدان كەيىن ساراپشىلار ءبىر اي بۇرىن 106 دوللار كورسەتكىشىمەن (-16 پايىز) سالىستىرعاندا Brent باررەلىنىڭ باعاسىن 89 دوللار دەڭگەيىندە كۇتەدى. مۇناي باعاسىنىڭ بولجامدى تومەندەۋى جانە ءرۋبلدىڭ السىرەۋى ۇلتتىق ۆاليۋتا باعامىنا ءتيىستى اسەر ەتەدى. ءبىر جىلدان كەيىن ساراپشىلار USD/KZT جۇبى بويىنشا ءبىر دوللار ءۇشىن 495 تەڭگە دەڭگەيىندە باعامدى كۇتۋدە, بۇل ونىڭ اعىمداعى ءمانى 477-گە (+3,5 پايىز) قارسى. ۇلتتىق بانك توراعاسىنىڭ ورىنباسارى ءاليا مولدابەكوۆا مۇناي باعاسىنىڭ تومەندەۋىمەن قاتار اقش-تا مولشەرلەمەلەردى اگرەسسيۆتى كوتەرۋ – ۇلتتىق ۆاليۋتاعا, سونداي-اق دامۋشى نارىقتاردىڭ ۆاليۋتالارىنا قىسىم جاساۋىن توقتاتقان جوق دەيدى.
ساراپشىلاردىڭ باعالاۋى بويىنشا ءىجو ءوسىمى ءبىر جىلدان كەيىن 2,9 پايىزعا دەيىن باياۋلاۋى مۇمكىن (اعىمداعى 3,4 پايىز). بۇل مۇناي باعاسىنىڭ بولجامدى تومەندەۋىنەن باسقا, قارقىنىن شەكتەۋ جونىندەگى فيسكالدىق ەرەجەلەردى ساقتاۋمەن بايلانىستى بولۋى ىقتيمال.
