عىلىم سالاسى جولعا قويىلعان مونوشاھارداعى كوپسالالى اۋرۋحاناعا 10 مىڭداي ادام تىركەلگەن. الايدا قاجەتتى ماماننىڭ تاپشىلىعىنان حالىققا ساپالى مەديتسينالىق قىزمەت كورسەتۋ قيىن بولىپ تۇر.
اتالعان مەديتسينالىق ۇيىمنىڭ باس دارىگەرى زاۋرە سادىبەكوۆا قازىر عيماراتتىڭ ەكىنشى قاباتىندا كۇردەلى جوندەۋ جۇمىستارى جۇرگىزىلىپ جاتقانىن ايتتى.
ء«بىزدىڭ اۋرۋحانا 1980 جىلى سالىنعان. كۋرچاتوۆتا تەك ءبىر اۋرۋحانا, ياعني ءبىزدىڭ ۇيىم عانا حالىققا قىزمەت كورسەتىپ كەلەدى. الايدا تىركەلگەن حالىقتىڭ سانى – 10 مىڭ. مەكەمەدە تاۋلىك بويى قىزمەتكە ارنالعان 35 توسەكتىك ورىن, العاشقى مەديتسينالىق-سانيتارلىق كومەك قىزمەتى, قابىلداۋ ءبولىمىنىڭ جۇمىسى جانە كلينيكالىق-دياگنوستيكالىق ەمحانا جولعا قويىلعان. بيىل ەكىنشى قاباتقا 73 ملن تەڭگەگە كۇردەلى جوندەۋ جۇرگىزىلىپ جاتىر. 100 كيلوۆاتت-ساعات بولاتىن ديزەل ستانساسى سالىندى. سونىمەن قاتار اۋرۋحانا 24 ملن تەڭگەگە ليفت جابدىقتارىمەن قامتاماسىز ەتىلدى», دەدى ز.سادىبەكوۆا.
بۇل ورايدا مەديتسينالىق ۇيىم عيماراتىنىڭ باسقا دا قاباتتارى جوندەۋدى قاجەت ەتەتىنى ايتىلدى. سونىمەن قوسا مۇندا كەيبىر جابدىقتار مەن كادرلار جەتىسپەيدى.
«ۇنەمدەلگەن قاراجات ەسەبىنەن اۋماقتا كوركەيتۋ جۇمىستارى جۇرگىزىلىپ, تاس توسەمدەرى ورناتىلدى. كەلەسى جىلى عيماراتتىڭ قالعان قاباتتارىنا كۇردەلى جوندەۋ جۇرگىزۋ جوسپارلانىپ وتىر. نەگىزى جوبالىق-سمەتالىق قۇجات دايىن بولعان. بىراق ونىڭ ۋاقىتى ەسكىرىپ كەتكەندىكتەن جاڭاسى دايىندالىپ جاتىر. مەديتسينالىق جابدىقتار دا قاجەت. نەگە دەسەڭىز, بوساندىرۋ بولمەسىن ەكىنشى دەڭگەيگە اۋىستىرۋ جوسپارلانىپ وتىر. سوندىقتان بوساندىرۋ بولىمشەسىن بالالار مەن ەرەسەكتەرگە ارنالعان وكپەنى جاساندى جەدەلدەتۋ اپپاراتىمەن جاراقتاۋ قاجەت.
بۇدان بولەك, كادر ماسەلەسى وزەكتى. مىسالى, بىزگە حيرۋرگ, پەدياتر, كارديولوگ جانە گينەكولوگ سىندى ماماندار جەتىسپەيدى», دەدى اۋرۋحانانىڭ باس دارىگەرى.
سونداي-اق مەديتسينالىق ۇيىمنىڭ باسشىسى اۋرۋحاناعا كىرەبەرىس جولدىڭ جوقتىعىن ايتىپ, جارىقتاندىرۋ ماسەلەسى شەشىمىن تاپسا ەكەن دەگەن ءوتىنىشىن جەتكىزدى. سەبەبى كەشكى ۋاقىتتاردا بۇل ماڭنان اۋرۋحاناعا اپاراتىن جولدى تابۋ قيىن.
ءوڭىر باسشىسى كۋرچاتوۆتاعى الەۋمەتتىك-ەكونوميكالىق ماسەلەلەردى, ونىڭ ىشىندە جەرگىلىكتى دەنساۋلىق ساقتاۋ سالاسىن رەتتەۋ ءۇشىن قالاعا «عىلىم قالاشىعى» مارتەبەسىن بەرۋ كەرەك دەپ سانايدى. وسى ارقىلى جوعارىداعى قوردالانعان پروبلەمالار لايىقتى شەشىمىن تابار ەدى دەيدى وبلىس اكىمى.
اباي وبلىسى,
كۋرچاتوۆ قالاسى
